ಶೀಘ್ರದಲ್ಲೇ ಕೊಹ್ಲಿ ಪಡೆ ವೇತನ 12 ಕೋಟಿ ರೂ.ಗೆ ಹೆಚ್ಚಳ

ಹೊಸದಿಲ್ಲಿ: ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್‌ ಕೊಹ್ಲಿ ಮತ್ತು ತಂಡದ ಒಟ್ಟಾರೆ ಸಂಭಾವನೆಯನ್ನು ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ಶೀಘ್ರ 12 ಕೋಟಿ ರೂ.ಗೆ ಹೆಚ್ಚಿಸಲಿದೆ. ಅಂದುಕೊಂಡಂತೆ ನಡೆದರೆ ಭಾರತ ಕ್ರಿಕೆಟಿಗರು ವಿಶ್ವದಲ್ಲೇ ಹೆಚ್ಚಿನ ವೇತನ ಪಡೆದ ಕ್ರಿಕೆಟ್‌ ಆಟಗಾರರಾಗಿದ್ದಾರೆ. ಸದ್ಯ ಆಸ್ಟ್ರೇಲಿಯ, ಇಂಗ್ಲೆಂಡ್‌ ಆಟಗಾರರು ವಿಶ್ವ ಕ್ರಿಕೆಟ್‌ನಲ್ಲಿ ಹೆಚ್ಚು ವೇತನ ಪಡೆಯುತ್ತಿದ್ದಾರೆ.

ಕೊಹ್ಲಿ, ಧೋನಿ ಮತ್ತು ರವಿಶಾಸ್ತ್ರೀ ಅವರು ಸುಪ್ರೀಂ ಕೋರ್ಟ್‌ ನೇಮಕ ಮಾಡಿದ ಆಡಳಿತಗಾರರ ಸಮಿತಿ (ಸಿಒಎ) ಜತೆ ಆಟಗಾರರ ವೇತನ ಹೆಚ್ಚಿಸುವ ಕುರಿತು ಚರ್ಚಿಸಿದ್ದಾರೆ. ಗ್ರೇಡ್‌ “ಎ’ ಆಟಗಾರರಿಗೆ ವರ್ಷಕ್ಕೆ 12 ಕೋಟಿ ರೂ., ಗ್ರೇಡ್‌ “ಬಿ’ ಆಟಗಾರರಿಗೆ 8 ಕೋಟಿ ರೂ. ಮತ್ತು ಗ್ರೇಡ್‌ “ಸಿ’ ಆಟಗಾರರಿಗೆ 4 ಕೋಟಿ ರೂ. ನೀಡುವಂತೆ ಮನವಿ ಮಾಡಿದ್ದಾರೆ. ಸದ್ಯ ಗ್ರೇಡ್‌ “ಎ’ ಆಟಗಾರರಾದ ಕೊಹ್ಲಿ, ಪೂಜಾರ ಮತ್ತು ಅಶ್ವಿ‌ನ್‌ ವರ್ಷಕ್ಕೆ 2 ಕೋಟಿ ರೂ. ಪಡೆಯುತ್ತಿದ್ದಾರೆ.