ಪಾಟ್ನಾ: ಒಂದು ವರ್ಷದ ಮಗುವೊಂದು ಹಾವನ್ನು ಕಚ್ಚಿ ಕೊಂದಿರುವ ಅಚ್ಚರಿಯ ಘಟನೆ ಬಿಹಾರದಲ್ಲಿ ನಡೆದಿರುವುದು ವರದಿಯಾಗಿದೆ.
ಫತೇಪುರ್ ಪೊಲೀಸ್ ಠಾಣೆ ವ್ಯಾಪ್ತಿಯ ಜಮುಹರ್ ಗ್ರಾಮದಲ್ಲಿ ಶನಿವಾರ (ಆಗಸ್ಟ್ 17) ಈ ಘಟನೆ ನಡೆದಿದ್ದು, ರಿಯಾಂಶ್ ಎನ್ನುವ ಒಂದು ವರ್ಷದ ಮಗು ಹಾವನ್ನು ಕಚ್ಚಿ ಕೊಂದಿದೆ.
ಮನೆಯ ಟೆರೇಸ್‌ ನಲ್ಲಿ ಮಗು ಆಡುತ್ತಿತ್ತು. ಈ ವೇಳೆ ಎಲ್ಲಿಂದಲೂ ಹಾವೊಂದು ಮಗುವಿನ ಪಕ್ಕಕ್ಕೆ ಬಂದಿದೆ. ಆದರೆ ಮಗು ಆ ಹಾವನ್ನು ಆಟದ ಸಾಮಾಗ್ರಿವೆಂದು ತಿಳಿದು ಅದನ್ನು ಕೈಯಲ್ಲಿಟ್ಟು, ಬಾಯಿಯಲ್ಲಿ ಅಗೆದು ಕೊಂದಿದೆ. ಆ ಬಳಿಕ ಬಿಸಾಕಿದೆ.
ಈ ಘಟನೆಯನ್ನು ನೋಡಿದ ಮಗುವಿನ ತಾಯಿ ಆಘಾತಗೊಂಡು, ಮಗುವನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾಳೆ. ಆಸ್ಪತ್ರೆಯಲ್ಲಿ ಮಗುವಿನ ಪಕ್ಕದಲ್ಲಿ ಹಾವು ಸತ್ತು ಬಿದ್ದಿರುವ ಘಟನೆಯನ್ನು ವಿವರಿಸಿದ್ದಾರೆ. ಮಗುವಿನ ಬಾಯಿಯನ್ನು ಪರಿಶೀಲಿಸಿದಾಗ ಮಗು ಹಾವನ್ನು ಕಚ್ಚಿರುವುದನ್ನು ನೋಡಿ ವೈದ್ಯರು ಶಾಕ್‌ ಆಗಿದ್ದಾರೆ.
ಹಾವಿನ ಮರಿಯೊಂದು ಸತ್ತು ಬಿದ್ದಿದ್ದು, ಮಗು ಕಚ್ಚಿಕೊಂದ ಹಾವು ವಿಷಕಾರಿ ಆಗಿಲ್ಲದ ಕಾರಣ ಮಗುವಿನ ಆರೋಗ್ಯದ ಮೇಲೆ ಇದರ ಪರಿಣಾಮ ಬೀರಿಲ್ಲ ಎಂದು ವೈದ್ಯರು ಹೇಳಿದ ಮೇಲೆ ಕುಟುಂಬಸ್ಥರು ನಿಟ್ಟುಸಿರುವ ಬಿಟ್ಟಿದ್ದಾರೆ.
ಸದ್ಯ ಈ ಘಟನೆ ಗ್ರಾಮದಲ್ಲೆಡೆ ಹರಿದಾಡಿದ್ದು, ವೈರಲ್ ಆಗಿದೆ.
