Vijayapura: ಸೇನಾ ಹವಾಲ್ದಾರ್ ರಾಜು ಕರ್ಜಗಿ ನಿಧನ

ವಿಜಯಪುರ : ಭಾರತೀಯ ಸೇನೆಯಲ್ಲಿ ಹವಾಲ್ದಾರ್ ಹುದ್ದೆಯಲ್ಲಿದ್ದ ವಿಜಯಪುರ ಜಿಲ್ಲೆಯ ಯೋಧ ಸಾವಿಗೀಡಾಗಿರುವ ಕುರಿತು ಸೇನೆ ಮಾಹಿತಿ ನೀಡಿದೆ.

ಈ ಕುರಿತು ಮಾಧ್ಯಮಗಳಿಗೆ ವಿವರ ನೀಡಿರುವ ಜಿಲ್ಲಾಧಿಕಾರಿ ಭೂಬಾಲನ್, ವಿಜಯಪುರ ಜಿಲ್ಲೆಯ ತಿಕೋಟಾ ಮೂಲದ ಭಾರತೀಯ ಸೇನೆಯ ರಾಷ್ಟ್ರೀಯ ರೈಫಲ್ಸ್ ಬಟಾಲಿಯನ್ ಹವಾಲ್ದಾರ್ ರಾಜು ಗಿರಿಮಲ್ಲ ಕರ್ಜಗಿ ಮೃತ ಯೋಧ.

ಭಾರತೀಯ ರೈಫಲ್ಸ್ ನ 51 ಯುನಿಟ್ ನ ಮಹಾರ್ ರೆಜಿಮೆಂಟ್ -13 ರ ಯೋಧ ಹವಾಲ್ದಾರ್ ರಾಜು ಮೃತಪಟ್ಟಿದ್ದಾಗಿ ಸೇನೆಯಿಂದ ಸೋಮವಾರ ಕುಟುಂಬ ಸದಸ್ಯರಿಗೆ ಮಾಹಿತಿ ಬಂದಿದೆ.

ಮತ್ತೊಂದೆಡೆ ಜಿಲ್ಲಾಡಳಿತ ಕೂಡ ಯೋಧ ಹವಾಲ್ದಾರ್ ರಾಜು ಅವರು ಮೃತಪಟ್ಟಿರುವುದನ್ನು ಖಚಿತ ಪಡಿಸಿದೆ. ಆದರೆ ಯೋಧನ ಸಾವು ಆಗಿರುವುದು ಎಲ್ಲಿ, ಯೋಧನ ಸಾವಿಗೆ ನಿಖರ ಕಾರಣಗಳೇನು ಎಂಬುದನ್ನು ಈ ವರೆಗೂ ಬಹಿರಂಗವಾಗಿಲ್ಲ.

ಹೈದ್ರಾಬಾದ್ ಮಾರ್ಗವಾಗಿ ಮೃತ ಯೋಧನ ಪಾರ್ಥೀವ ಶರೀರ ಮಂಗಳವಾರ ತವರು ಜಿಲ್ಲೆಗೆ ಆಗಮಿಸುವ ನಿರೀಕ್ಷೆ  ಇದೆ ಎಂದು ಕುಟುಂಬದ ಮೂಲಗಳು ತಿಳಿಸಿವೆ.