Vijayapur: ಟ್ರಾಫಿಕ್ ಕಂಟ್ರೋಲ್ ಕೆಲಸಕ್ಕಿಳಿದ ಜಿಲ್ಲಾಧಿಕಾರಿ ಭೂಬಾಲನ್

ವಿಜಯಪುರ: ತಾವು ನಗರದಲ್ಲಿ ಪ್ರಯಾಣಿಸುತ್ತಿದ್ದ ಮಾರ್ಗದಲ್ಲಿ ಟ್ರಾಫಿಕ್ ಸಮಸ್ಯೆ ಸೃಷ್ಟಿಯಾಗಿದ್ದನ್ನು ಕಂಡ ಜಿಲ್ಲಾಧಿಕಾರಿ ಸ್ವಯಂ ಟ್ರಾಫಿಕ್ ಸಮಸ್ಯೆ ಬಗೆಹರಿಸಿ ಗಮನ ಸೆಳೆದಿದ್ದಾರೆ.

ಗುರುವಾರ ರಾತ್ರಿ ಜಿಲ್ಲಾ ಪಂಚಾಯತ್ ನಿಂದ ತಮ್ಮ ಕಚೇರಿಯತ್ತ ಮರಳುತ್ತಿದ್ದಾಗ ಮನಗೂಳಿ ಅಗಸಿ ಬಳಿ ಏಕಾಏಕಿ ಟ್ರಾಫಿಕ್ ಸಮಸ್ಯೆ ಉಂಟಾಗಿದೆ.

ಇಕ್ಕಟ್ಟಾದ ಅಗಸಿಯ ಎರಡೂ ಬದಿಯಲ್ಲಿ ವಾಹನಗಳು ಸಾಲಗಟ್ಟಿ ನಿಂತಿವೆ. ಮತ್ತೊಂದೆಡೆ ಅದೇ ಮಾರ್ಗವಾಗಿ ಬಂದ ಅಂಬ್ಯುಲೆನ್ಸ್ ಕೂಡ ವಾಹನ ದಟ್ಟಣೆಯ ಟ್ರಾಫಿಕ್ ನಲ್ಲಿ ಸಿಲುಕಿಕೊಂಡಿದೆ.

ಇದೇ ವೇಳೆ ಅದೇ ಮಾರ್ಗವಾಗಿ ಹೊರಟಿದ್ದ ಜಿಲ್ಲಾಧಿಕಾರಿ ಭೂಬಾಲನ್ ಕೂಡಲೇ ನಾರಿನಿಂದ ಕೆಳಗೆ ಇಳಿದು ಟ್ರಾಫಿಕ್ ನಿಯಂತ್ರಿಸಿ, ಅಂಬ್ಯುಲೆನ್ಸ್ ವಾಹನ ಸಹಿತ ಇತರೆ ವಾಹನಗಳ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಟ್ಟಿದ್ದಾರೆ.

ಜಿಲ್ಲಾಧಿಕಾರಿ ಭೂಬಾಲನ್ ಅವರ ಸಮಯ ಪ್ರಜ್ಞೆ ಹಾಗೂ ಟ್ರಾಫಿಕ್ ಸಮಸ್ಯೆ ನಿವಾರಿಸುವಲ್ಲಿ ತೋರಿದ ಕಾರ್ಯ ಜನತೆಯ ಶ್ಲಾಘನೆಗೆ ಕಾರಣವಾಗಿದೆ.