ಹೈದರಾಬಾದ್: ಟಾಲಿವುಡ್‌ ನಟ ವಿಜಯ್ ದೇವರಕೊಂಡ ಸೋಶಿಯಲ್‌ ಮೀಡಿಯಾದಲ್ಲಿ ಸಕ್ರಿಯರಾಗಿರುತ್ತಾರೆ. ಇತ್ತೀಚೆಗೆ ಅವರು ವಿಡಿಯೋವೊಂದಕ್ಕೆ ಮಾಡಿರುವ ರಿಪ್ಲೈವೊಂದು ವೈರಲ್ ಆಗಿದೆ.
ʼಅರ್ಜುನ್‌ ರೆಡ್ಡಿʼ ನಟನಿಗೆ ದೊಡ್ಡ ಅಭಿಮಾನಿಗಳ ವಲಯವಿದೆ. ಇದರಲ್ಲಿ ಯುವ ಜನತೆಯೇ ಹೆಚ್ಚು. ಅಭಿಮಾನಿಗಳು ತನ್ನ ನೆಚ್ಚಿನ ನಟ- ನಟಿಯರೊಂದಿಗೆ ಫೋಟೋ ಕ್ಲಿಕ್ಕಿಸಿಕೊಳ್ಳಬೇಕು. ಅವರ ಆಟೋಗ್ರಾಫ್‌ ಪಡೆದುಕೊಳ್ಳಬೇಕೆನ್ನುವ ಆಸೆಗಳನ್ನು ಹೊಂದಿರುತ್ತಾರೆ. ಆದರೆ ಇಲ್ಲಿಬ್ಬರು ಯುವತಿಯರು ವಿಜಯ್ ದೇವರಕೊಂಡ ಬಳಿ ಬೇಡಿಕೆಯೊಂದನ್ನು ಇಟ್ಟಿದ್ದಾರೆ. ಆ ಬೇಡಿಕೆಯ ವಿಡಿಯೋ ವೈರಲ್ ಆಗಿದೆ.
ಇಬ್ಬರು ಯುವತಿಯರು ವಿಡಿಯೋವೊಂದನ್ನು ಹಾಕಿದ್ದು, ಅದರಲ್ಲಿ “ವಿಜಯ್ ದೇವರಕೊಂಡ ಅವರು ಈ ವಿಡಿಯೋಗೆ ಕಮೆಂಟ್‌ ಮಾಡಿದರೆ ನಾವು ಪರೀಕ್ಷೆಗೆ ಸಿದ್ದತೆಯನ್ನು ಆರಂಭಿಸುತ್ತೇವೆ” ಎಂದು ಬರೆದುಕೊಂಡಿದ್ದಾರೆ. ಈ ವಿಡಿಯೋಗೆ 3 ಲಕ್ಷಕ್ಕೂ ಅಧಿಕ ಲೈಕ್ಸ್‌ ಬಂದಿದೆ.
ಇದಕ್ಕೆ ಕಾರಣ ನಟ ವಿಜಯ್ ದೇವರಕೊಂಡ ಅವರು ಕೊಟ್ಟ ಪ್ರತಿಕ್ರಿಯೆ. ಹೌದು ಯುವತಿಯ ಬೇಡಿಕೆಗೆ ಸ್ಪಂದಿಸಿದ ದೇವರಕೊಂಡ ಅವರು, “ಪರೀಕ್ಷೆಯಲ್ಲಿ 90% ದಷ್ಟು ಅಂಕಗಳಿಸಿ, ನಾನು ನಿಮ್ಮನ್ನು ಭೇಟಿ ಆಗುತ್ತೇನೆ” ಎಂದು ಕಮೆಂಟ್‌ ಮಾಡಿದ್ದಾರೆ. ಈ ಕಮೆಂಟ್‌ ಸಿಕ್ಕಾಪಟ್ಟೆ ವೈರಲ್ ಆಗಿದೆ.
ಸದ್ಯ ದೇವರಕೊಂಡ ʼಫ್ಯಾಮಿಲಿ ಸ್ಟಾರ್‌ʼ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ.
