ಯುಎಸ್‌ ಓಪನ್‌ ಟೆನಿಸ್‌: ಗಾಯದ ನಡುವೆಯೂ ಗೆದ್ದ ರಫೆಲ್‌ ನಡಾಲ್‌

ನ್ಯೂಯಾರ್ಕ್‌: ಸ್ಪೇನ್‌ನ ರಫೆಲ್‌ ನಡಾಲ್‌ ಪಂದ್ಯದ ನಡುವೆ ಗಾಯಗೊಂಡರೂ ಚೇತರಿಸಿಕೊಂಡು ಇಟಲಿಯ ಫ್ಯಾಬಿಯೊ ಫಾಗ್ನಿನಿ ಅವರರನ್ನು ನಾಲ್ಕು ಸೆಟ್‌ಗಳ ಹೋರಾ ಟದಲ್ಲಿ ಸೋಲಿಸಿ ಯುಎಸ್‌ ಓಪನ್‌ ಟೆನಿಸ್‌ ಕೂಟದಲ್ಲಿ ಮೂರನೇ ಸುತ್ತು ತಲುಪಿದರು.

ದ್ವಿತೀಯ ಸುತ್ತಿನ ಪಂದ್ಯದ ವೇಳೆ ಚೆಂಡನ್ನು ಹೊಡೆಯುವ ವೇಳೆ ನಡಾಲ್‌ ಅವರ ರ್ಯಾಕೆಟ್‌ ಮೂಗಿಗೆ ಬಲವಾಗಿ ಬಡಿದ ಕಾರಣ ತೀವ್ರವಾದ ನೋವನ್ನು ಅನುಭವಿಸಿ ದರು. ರಕ್ತ ನಿಲ್ಲಿಸಲು ಬ್ಯಾಂಡೇಜ್‌ ಹಾಕಲಾಯಿತು. ನೋವು ಶಮನ ಗೊಳ್ಳಲು ಅವರು ವೈದ್ಯಕೀಯ ವಿಶ್ರಾಂತಿ ಪಡೆದರು. ಈ ಘಟನೆ ಮೂರನೇ ಸೆಟ್‌ ವೇಳೆ ನಡೆದಿತ್ತು.

ಗಾಯದ ನೋವಿನ ನಡುವೆಯೂ ಆಡಿದ 22 ಬಾರಿಯ ಗ್ರ್ಯಾನ್‌ ಸ್ಲಾಮ್‌ ವಿಜೇತ ನಡಾಲ್‌ ಅವರು ಫಾಗ್ನಿನಿ ಅವರನ್ನು 2-6, 6-4, 6-2, 6-1 ಸೆಟ್‌ಗಳಿಂದ ಸೋಲಿಸಲು ಯಶಸ್ವಿ ಯಾದರು. ರ್ಯಾಕೆಟ್‌ನ ಹೊಡೆತದಿಂದ ಒಮ್ಮೆ ತಲೆತಿರುಗಿದಂತೆ ಆಯಿತು. ತೀವ್ರವಾದ ನೋವಿನಿಂದ ಬಳಲಿದೆ ಎಂದು ಅವರು ಹೇಳಿದರು.

ಕಿರ್ಗಿಯೋಸ್‌ಗೆ ದಂಡ
ಬುಧವಾರ ನಡೆದ ಯುಎಸ್‌ ಓಪನ್‌ನಲ್ಲಿ ಎರಡನೇ ಸುತ್ತಿನ ಗೆಲುವಿನ ಸಂದರ್ಭ ಉಗುಳುವುದು ಮತ್ತು ಕೇಳಬಹುದಾದ ಅಶ್ಲೀಲ ಮಾತಿಗಾಗಿ ಆಸ್ಟ್ರೇಲಿಯದ ಆಟಗಾರ ನಿಕ್‌ ಕಿರ್ಗಿಯೋಸ್‌ ಅವರಿಗೆ 7,500 ಡಾಲರ್‌ ದಂಡ ವಿಧಿಸಲಾಗಿದೆ ಎಂದು ಪಂದ್ಯಾವಳಿಯ ಸಂಘಟಕರು ತಿಳಿಸಿದ್ದಾರೆ. ಇದು ಇದುವರೆಗೆ ಈ ಪಂದ್ಯಾವಳಿಯಲ್ಲಿ ಆಟಗಾರನಿಗೆ ನೀಡಿದ ದೊಡ್ಡ ಮೊತ್ತದ ದಂಡವಾಗಿದೆ.

ವಿಂಬಲ್ಡನ್‌ನಲ್ಲಿ ಫೈನಲಿಗೇರಿದ್ದ ಕಿರ್ಗಿಯೋಸ್‌ ಫ್ರಾನ್ಸ್‌ನ ಬೆಂಜಲಿನ್‌ ಬೊಂಜಿ ವಿರುದ್ಧ 7-6 (3), 6-4, 4-6, 6-4 ಅಂತರದಲ್ಲಿ ಜಯ ಗಳಿಸುವ ವೇಳೆ ಉಗುಳುವುದು ಮತ್ತು ಅಶ್ಲೀಲ ಮಾತು ಆಡಿದ್ದರು.

ಸೆರೆನಾ ಜೋಡಿಗೆ ಸೋಲು
ಸೆರೆನಾ ಮತ್ತು ವೀನಸ್‌ ವಿಲಿಯಮ್ಸ್‌ ಅವರು ಡಬಲ್ಸ್‌ನ ಮೊದಲ ಸುತ್ತಿನಲ್ಲಿ ಜೆಕ್‌ನ ಲೂಸಿ ಹೃದೆಕ್ಕಾ ಮತ್ತು ಲಿಂಡಾ ನೊಸ್ಕೋವಾ ಅವರಿಗೆ 7-6 (5), 6-4 ಸೆಟ್‌ಗಳಿಂದ ಸೋತು ಹೊರಬಿದ್ದಿದ್ದಾರೆ.

ಎರಡು ಯುಎಸ್‌ ಸಹಿತ ಒಟ್ಟಾರೆ 14 ಗ್ರ್ಯಾನ್‌ ಸ್ಲಾಮ್‌ ಕೂಟದ ಪ್ರಶಸ್ತಿ ಗೆದ್ದಿರುವ ವಿಲಿಯಮ್ಸ್‌ ಸಹೋದರಿಯರು ಕಳೆದ ನಾಲ್ಕು ವರ್ಷಗಳಲ್ಲಿ ಮೊದಲ ಬಾರಿ ಜತೆಯಾಗಿ ಆಡಿದ್ದರು. ಆದರೆ ನೇರ ಸೆಟ್‌ಗಳಿಂದ ಸೋತಿರುವುದು ಅವರಿಗೆ ಆಘಾತವನ್ನುಂಟು ಮಾಡಿದೆ.