ನ್ಯೂಯಾರ್ಕ್: ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ (UNSC) ಯ ಶಾಶ್ವತ ಸದಸ್ಯತ್ವಕ್ಕಾಗಿ ಭಾರತದ ಪ್ರಯತ್ನಕ್ಕೆ ಮತ್ತಷ್ಟು ಬೆಂಬಲ ಸಿಕ್ಕಿದೆ. ಯುಕೆ ಪ್ರಧಾನಿ ಕೀರ್ ಸ್ಟಾರ್ಮರ್ (Keir Starmer) ಅವರು ಈ ವಿಚಾರದಲ್ಲಿ ಗುರುವಾರ (ಸೆ.26) ಭಾರತವನ್ನು ಬೆಂಬಲಿಸಿದ್ದಾರೆ.
ಯುಎಸ್ ಅಧ್ಯಕ್ಷ ಜೋ ಬಿಡನ್ ಮತ್ತು ಫ್ರಾನ್ಸ್‌ನ ಇಮ್ಯಾನುಯೆಲ್ ಮ್ಯಾಕ್ರನ್ ಅವರು ಬೆಂಬಲ ನೀಡಿದ ನಂತರ ಯುನೈಟೆಡ್ ಕಿಂಗ್‌ ಡಮ್‌ ಕೂಡಾ ಬೆಂಬಲ ನೀಡಿದರು.
ನ್ಯೂಯಾರ್ಕ್‌ನಲ್ಲಿ ನಡೆದ ವಿಶ್ವಸಂಸ್ಥೆಯ ಜನರಲ್ ಅಸೆಂಬ್ಲಿಯ ಎಪ್ಪತ್ತೊಂಬತ್ತನೇ ಅಧಿವೇಶನದ ಸಾಮಾನ್ಯ ಚರ್ಚೆಯನ್ನು ಉದ್ದೇಶಿಸಿ ಮಾತನಾಡಿದ ಕೀರ್ ಸ್ಟಾರ್ಮರ್, ಯುಎನ್‌ಎಸ್‌ಸಿ “ಹೆಚ್ಚು ಪ್ರಾತಿನಿಧಿಕ ಸಂಸ್ಥೆ” ಆಗಲು ಬದಲಾಗಬೇಕು ಎಂದು ಹೇಳಿದರು.
ಪ್ರಸ್ತುತ, ಯುಎನ್‌ಎಸ್‌ಸಿ ಐದು ಖಾಯಂ ಸದಸ್ಯರು ಮತ್ತು 10 ಶಾಶ್ವತವಲ್ಲದ ಸದಸ್ಯ ರಾಷ್ಟ್ರಗಳನ್ನು ಒಳಗೊಂಡಿದೆ. ಶಾಶ್ವತವಲ್ಲದ ರಾಷ್ಟ್ರಗಳನ್ನು ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಿಂದ ಎರಡು ವರ್ಷಗಳ ಅವಧಿಗೆ ಆಯ್ಕೆ ಮಾಡಲಾಗುತ್ತದೆ. ರಷ್ಯಾ, ಯುಕೆ, ಚೀನಾ, ಫ್ರಾನ್ಸ್ ಮತ್ತು ಯುನೈಟೆಡ್ ಸ್ಟೇಟ್ಸ್ ಐದು ಖಾಯಂ ಸದಸ್ಯ ರಾಷ್ಟ್ರಗಳಾಗಿದೆ. ಈ ದೇಶಗಳು ಯಾವುದೇ ವಸ್ತುನಿಷ್ಠ ನಿರ್ಣಯವನ್ನು ವೀಟೋ ಮಾಡುವ ಅಧಿಕಾರವನ್ನು ಹೊಂದಿವೆ.
“ನಾವು ಬ್ರೆಜಿಲ್, ಭಾರತ, ಜಪಾನ್ ಮತ್ತು ಜರ್ಮನಿಯಲ್ಲಿ ಕೌನ್ಸಿಲ್ ಶಾಶ್ವತ ಸದಸ್ಯರಾಗಿ ಶಾಶ್ವತ ಆಫ್ರಿಕನ್ ಪ್ರಾತಿನಿಧ್ಯವನ್ನು ನೋಡಲು ಬಯಸುತ್ತೇವೆ. ಚುನಾಯಿತ ಸದಸ್ಯರಿಗೆ ಹೆಚ್ಚಿನ ಸ್ಥಾನಗಳನ್ನು ಸಹ ನೋಡಲು ಬಯಸುತ್ತೇವೆ” ಎಂದು ಸ್ಟಾರ್ಮರ್ ಹೇಳಿದರು.
ಫ್ರಾನ್ಸ್ ಬೆಂಬಲ
ವಿಶ್ವಸಂಸ್ಥೆ ಭದ್ರತಾ ಮಂಡಳಿಗೆ ಭಾರತ ಖಾಯಂ ಸದಸ್ಯತ್ವ ಪಡೆಯುವ ಪ್ರಯತ್ನಕ್ಕೆ ಫ್ರಾನ್ಸ್ ಅಧ್ಯಕ್ಷ ಇಮಾನ್ಯುವೆಲ್‌ ಮ್ಯಾಕ್ರನ್ ಬೆಂಬಲ ಸೂಚಿಸಿದ್ದಾರೆ. ವಿಶ್ವಸಂಸ್ಥೆ ಸಾಮಾನ್ಯ ಸಭೆಯಲ್ಲಿ ಮಾತನಾಡಿ, “ನಮ್ಮಲ್ಲಿ ಭದ್ರತಾ ಮಂಡಳಿ ಇದ್ದರೂ ಅದನ್ನು ನಾವು ನಿರ್ಬಂಧಿಸಿದ್ದೇವೆ. ವಿಶ್ವಸಂಸ್ಥೆಯನ್ನು ಇನ್ನಷ್ಟು ಸಮರ್ಥಗೊಳಿಸೋಣ. ಇನ್ನಷ್ಟು ಪ್ರಾತಿನಿಧಿಕವಾಗಬೇಕಿದೆ. ಹಾಗಾಗಿ, ಫ್ರಾನ್ಸ್ ವಿಶ್ವಸಂಸ್ಥೆ ಇನ್ನು ವಿಸ್ತರಣೆಯಾಗಲಿ ಎಂದು ಬಯಸುತ್ತಿದೆ ಎಂದಿದ್ದಾರೆ.
