Unbelievable! ಭಾರತದಲ್ಲಿ ಆ್ಯಪಲ್‌ ಐಫೋನ್‌ 5ಎಸ್‌ 15,000 ರೂ.ಗೆ

ಹೊಸದಿಲ್ಲಿ : ಭಾರತದ ಸ್ಮಾರ್ಟ್‌ ಫೋನ್‌ ಮಾರುಕಟ್ಟೆಯಲ್ಲಿನ ತನ್ನ ಅಸ್ತಿತ್ವವನ್ನು ವಿಸ್ತರಿಸುವ ಮಾರ್ಗೋಪಾಯಗಳನ್ನು ಕಂಡುಕೊಳ್ಳಲು ಯತ್ನಿಸುತ್ತಿರುವ ಆ್ಯಪಲ್‌ ಇದೀಗ ತನ್ನ ಐಫೋನ್‌ 5ಎಸ್‌ ಸ್ಮಾರ್ಟ್‌ ಫೋನನ್ನು  ಕೇವಲ 15,000 ರೂ. ಬೆಲೆಗೆ ಶೀಘ್ರವೇ ಒದಗಿಸುವ ಸಾಧ್ಯತೆ ಇದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ. 

ಇಕಾನಮಿಕ್‌ ಟೈಮ್ಸ್‌ ಪ್ರಕಟಿಸಿರುವ ವರದಿಯ ಪ್ರಕಾರ ಆ್ಯಪಲ್‌, ಭಾರತೀಯ ಮಾರುಕಟ್ಟೆಯಲ್ಲಿ ತನ್ನ ಚಿಲ್ಲರೆ ಮಾರಾಟ ತಂತ್ರಗಾರಿಕೆಯನ್ನು ಚುರುಕುಗೊಳಿಸುವ ನಿಟ್ಟಿನಲ್ಲಿ ನಾಲ್ಕು ವರ್ಷ ಹಳೆಯ ತನ್ನ ಐಫೋನ್‌ 5ಎಸ್‌ ಸ್ಮಾರ್ಟ್‌ ಫೋನ್‌ಗಳನ್ನು ಕೇವಲ 15,000 ರೂ.ಗೆ ಮಾರಲು ಉದ್ದೇಶಿಸಿದೆ. 

ಕಂಪೆನಿಯ ಹಿರಿಯ ಎಕ್ಸಿಕ್ಯೂಟಿವ್‌ಗಳನ್ನು ಉಲ್ಲೇಖೀಸಿರುವ ಇಕಾನಮಿಕ್‌ ಟೈಮ್ಸ್‌, “ಐಫೋನ್‌ 5ಎಸ್‌ ಸ್ಮಾರ್ಟ್‌ ಫೋನ್‌ಗಳನ್ನು ಕಡಿಮೆ ಬೆಲೆಯಲ್ಲಿ ಮಾರುಕಟ್ಟೆಗೆ ಬಿಡುಗಡೆ ಮಾಡುವ ಬಗ್ಗೆ ಆ್ಯಪಲ್‌ ಕಂಪೆನಿ ಈಗಾಗಲೇ ತನ್ನ ವಿತರಣಗಾರರಿಗೆ ತಿಳಿಸಿದೆ. ಆದರೆ ಈ ಸ್ಮಾರ್ಟ್‌ ಪೋನ್‌ಗಳನ್ನು ಗ್ರಾಹಕರು ಕೇವಲ ಆನ್‌ಲೈನ್‌ ನಲ್ಲಿ ಮಾತ್ರವೇ ಬುಕ್‌ ಮಾಡಿ ಪಡೆಯಬಹುದಾಗಿದೆ ಎಂದು ತಿಳಿಸಿರುವುದಾಗಿ ವರದಿ ಮಾಡಿದೆ. 

ಐಫೋನ್‌ 5ಸ್‌ ಸ್ಮಾರ್ಟ್‌ ಫೋನಿನ ಬೆಲೆ ಪ್ರಕೃತ ಭಾರತೀಯ ಮಾರುಕಟ್ಟೆಯಲ್ಲಿ 20,000 ರೂ.ಇದೆ. ಫ್ಲಿಪ್‌ಕಾರ್ಟ್‌ ಮತ್ತು ಸ್ನಾಪ್‌ ಡೀಲ್‌ ನಂತಹ ಕೆಲವೊಂದು ಆನ್‌ಲೈನ್‌ ರಿಟೇಲರ್‌ಗಳಲ್ಲಿ ಇದು 17,499 ರೂ.ಗೆ ಲಭ್ಯವಿದೆ.