ಉಮಿಲ್‌ನ ಬೆನ್ನುತಟ್ಟಿದ ಡಾ|ರಾಜ್‌ ಫ್ಯಾಮಿಲಿ!

ಇನ್ನೇನು ಬಿಡುಗಡೆಯ ಹೊಸ್ತಿಲಲ್ಲಿರುವ ತುಳುವಿನಲ್ಲಿ ಮೊದಲ ಬಾರಿಗೆ ಗ್ರಾಫಿಕ್ಸ್‌ ಲುಕ್‌ನಲ್ಲಿ ಸಿದ್ಧಗೊಳಿಸಿದ ‘ಉಮಿಲ್‌’ ಸಿನೆಮಾಕ್ಕೆ ಪುನೀತ್‌ ರಾಜ್‌ ಕುಮಾರ್‌ ಹಾಡಿರುವುದು ಗೊತ್ತೇ ಇದೆ. ಆದರೆ, ಸದ್ಯದ ವಿಷಯ ಏನೆಂದರೆ, ರಾಜ್‌ಕುಮಾರ್‌ ಕುಟುಂಬದ ಮಾಲಕತ್ವದಲ್ಲಿರುವ ಪಿಆರ್‌ಕೆ ಸಂಸ್ಥೆಯು ಈ ಸಿನೆಮಾದ ಧ್ವನಿಸುರುಳಿಯ ಹಕ್ಕನ್ನು ಪಡೆದುಕೊಂಡಿದೆ. ಈ ಮೂಲಕ ಕೋಸ್ಟಲ್‌ವುಡ್‌ ಲೋಕ ಸ್ಯಾಂಡಲ್‌ವುಡ್‌ ನಲ್ಲೂ ಹಿರಿಮೆ ತೋರಿಸಿದಂತಾಗಿದೆ.

ಪುನೀತ್‌ ರಾಜ್‌ಕುಮಾರ್‌ ಅವರು ಈ ಚಿತ್ರದ ಟೈಟಲ್‌ ಸಾಂಗ್‌ ‘ರಾವೊಂದು ರಾವೊಂದು ಬತ್ತ್ಂಡ್‌ ಉಮಿಲ್‌..ನಮ್ಮ ಈ ಊರುದ ಉಮಿಲ್‌’ ಎಂದು ಹಾಡುವ ಮೂಲಕ ಗಮನ ಸೆಳೆದಿದ್ದಾರೆ. ಕೀರ್ತನ್‌ ಭಂಡಾರಿ ಸಾಹಿತ್ಯಕ್ಕೆ ರವಿ ಬಸ್ರೂರು ಸಂಗೀತ ಸಂಯೋಜನೆ ಮಾಡಿದ್ದಾರೆ. ಯುವ ನಿರ್ದೇಶಕ ರಂಜಿತ್‌ ಸುವರ್ಣ ನಿರ್ದೇಶನದಲ್ಲಿ ಸಿನೆಮಾ ಮೂಡಿಬಂದಿದೆ. ಅರವಿಂದ ಬೋಳಾರ್‌, ಅರ್ಜುನ್‌ ಕಾಪಿಕಾಡ್‌, ಉಮೇಶ್‌ ಮಿಜಾರ್‌ ಕೂಡ ಈ ಸಿನೆಮಾದಲ್ಲಿ ಹಾಡಿದ್ದಾರೆ ಎಂಬುದು ವಿಶೇಷ.

ಜತೆಗೆ ನವೀನ್‌ ಡಿ.ಪಡೀಲ್‌, ಅರವಿಂದ ಬೋಳಾರ್‌, ಭೋಜರಾಜ್‌ ವಾಮಂಜೂರು, ಉಮೇಶ್‌ ಮಿಜಾರ್‌, ಪೂಜಾ ಶೆಟ್ಟಿ ಸೇರಿದಂತೆ ಹಲವು ಕಲಾವಿದರು ಅಭಿನಯಿಸಿದ್ದಾರೆ. ಕರುಣಾಕರ ಶೆಟ್ಟಿ ಹಾಗೂ ಪ್ರಜ್ಞೆಶ್ ಶೆಟ್ಟಿ ನಿರ್ಮಾಣ ಮಾಡಿದ್ದಾರೆ. ಹಲವಾರು ವಿಶೇಷತೆಗಳ ಈ ಸಿನೆಮಾ ಯಾವಾಗ ಬಿಡುಗಡೆಯಾಗಲಿದೆ? ಇದರಲ್ಲಿ ಬಳಸಿರುವ ಗ್ರಾಫಿಕ್ಸ್‌ ಯಾವ ರೂಪದಲ್ಲಿರಲಿದೆ? ಈ ಮೂಲಕ ಕೋಸ್ಟಲ್‌ವುಡ್‌ನ‌ಲ್ಲಿ ಯಾವ ರೀತಿಯ ಟ್ರೆಂಡ್‌ ಸೆಟ್ಟಿಂಗ್‌ ಆಗಬಹುದು? ಎಂಬ ಸಹಜ ಕುತೂಹಲ ಈಗ ‘ಉಮಿಲ್‌’ ಮೂಲಕ ಎದುರಾಗಿದೆ. ಅಂತೂ ಕೆಲವೇ ದಿನದಲ್ಲಿ ಉಮಿಲ್‌ನ ಆಡಿಯೋ ರಿಲೀಸ್‌ ಹಾಗೂ ಟೀಸರ್‌ ರಿಲೀಸ್‌ ಆಗಲಿದೆ ಎನ್ನುವುದು ನಿರ್ದೇಶಕ ರಂಜಿತ್‌ ಸುವರ್ಣ ಅಭಿಪ್ರಾಯ.