ರಷ್ಯಾ-ಉಕ್ರೇನ್‌ ಯುದ್ಧ: ಮರಿಯುಪೋಲ್‌ನ 24 ಮಕ್ಕಳು ಸೇರಿ ಒಟ್ಟು 287 ಮಕ್ಕಳ ಸಾವು

ನವದೆಹಲಿ: ಉಕ್ರೇನಿನ ಆಗ್ನೇಯ ಭಾಗದಲ್ಲಿರುವ ಬಂದರು ನಗರಿ ಮರಿಯುಪೋಲ್‌ನಲ್ಲಿ ಇತ್ತೀಚೆಗೆ ರಷ್ಯಾ ನಡೆಸಿದ ದಾಳಿಯಲ್ಲಿ 24 ಮಕ್ಕಳು ಸಾವನ್ನಪ್ಪಿದ್ದಾರೆ. ಯುದ್ಧಾರಂಭದಿಂದ ಇಲ್ಲಿಯವರೆಗೆ ಒಟ್ಟು 287 ಮಕ್ಕಳು ಕೊನೆಯುಸಿರೆಳೆದಿದ್ದಾರೆ. 492 ಮಕ್ಕಳು ಗಾಯಗೊಂಡಿದ್ದಾರೆ.

ಪೂರ್ವ ಉಕ್ರೇನ್‌ನಲ್ಲಿ ಸದ್ಯ ರಷ್ಯಾ-ಉಕ್ರೇನ್‌ ನಡುವೆ ತೀವ್ರ ಸೆಣೆಸಾಟ ನಡೆಯುತ್ತಿದೆ. ಈ ಭಾಗ ಉಕ್ರೇನಿನ ಕೈಗಾರಿಕೆಗಳ ಹೃದಯಭಾಗ. ಇಲ್ಲಿ ಕಾದಾಟ ಹೆಚ್ಚಾಗಿರುವುದರಿಂದ ಇಲ್ಲಿರುವ ಮಕ್ಕಳು, ಹಿರಿಯ ನಾಗರಿಕರು, ಮಹಿಳೆಯರು ಪಶ್ಚಿಮ ಭಾಗಕ್ಕೆ ವಿಶೇಷ ಟ್ರೈನಿನಲ್ಲಿ ವಲಸೆ ಹೋಗಿದ್ದಾರೆ.

ಮತ್ತೊಂದೆಡೆ, ಫೆ. 24ರಿಂದ ಆರಂಭವಾದ ಉಕ್ರೇನ್‌- ರಷ್ಯಾ ನಡುವಿನ ಯುದ್ಧದಿಂದಾಗಿ ಇಲ್ಲಿಯವರೆಗೆ ತಾನು 10 ಸಾವಿರಕ್ಕೂ ಹೆಚ್ಚು ಸೈನಿಕರನ್ನು ಕಳೆದುಕೊಂಡಿರುವುದಾಗಿ ಉಕ್ರೇನ್‌ ತಿಳಿಸಿದೆ.

ರಷ್ಯಾ ಹೊರಕ್ಕೆ:
ವಿಶ್ವಸಂಸ್ಥೆಯ ಅಂಗವಾದ ವಿಶ್ವ ಪ್ರವಾಸೋದ್ಯಮ ಸಂಸ್ಥೆಯಿಂದ ರಷ್ಯಾ ಹೊರಬಂದಿದೆ. ಉಕ್ರೇನ್‌ ವಿರುದ್ಧ ದಾಳಿ ಮಾಡಿದ್ದರಿಂದ ಏ.27ರಂದೇ ಪ್ರವಾಸೋದ್ಯಮ ಸಂಸ್ಥೆ ರಷ್ಯಾಕ್ಕೆ ನಿಷೇಧ ಹೇರಿತ್ತು!

ಚೆಕ್‌ ಸ್ವಯಂಸೇವಕ ಸಾವು:
ಉಕ್ರೇನ್‌ನಲ್ಲಿ ಚೆಕ್‌ ಗಣರಾಜ್ಯದ ಹಲವರು ಸ್ವಯಂಸೇವಕರು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ನೂರಾರು ಮಂದಿ ಚೆಕ್ಕರು ತಮ್ಮ ಸರ್ಕಾರದ ಅನುಮತಿಯೊಂದಿಗೆ ಉಕ್ರೇನ್‌ ಸೇನೆಯನ್ನೇ ಸೇರಿದ್ದಾರೆ. ಇದೀಗ ಮೊದಲ ಚೆಕ್‌ ಸ್ವಯಂಸೇವಕ ಸಾವನ್ನಪ್ಪಿರುವುದು ವರದಿಯಾಗಿದೆ.