UKP; ಕೃಷ್ಣಾ ಮೇಲ್ದಂಡೆ ಯೋಜನೆ 3ನೇ ಹಂತ ಜಾರಿ ಹೋರಾಟಕ್ಕೆ 150ಕ್ಕೂ ಹೆಚ್ಚು ಶ್ರೀಗಳ ಬಲ

ಬಾಗಲಕೋಟೆ: ಕೃಷ್ಣಾ ಮೇಲ್ದಂಡೆ ಯೋಜನೆ (UKP) 3ನೇ ಹಂತವನ್ನು ಏಕಕಾಲಕ್ಕೆ ಪೂರ್ಣಗೊಳಿಸುವಂತೆ ಒತ್ತಾಯಿಸಿ ಸಂತ್ರಸ್ತರು ಕಳೆದ 5 ದಿನಗಳಿಂದ ನಡೆಸುತ್ತಿರುವ ಅಹೋರಾತ್ರಿ ಹೋರಾಟಕ್ಕೆ 150ಕ್ಕೂ ಅಧಿಕ ಸ್ವಾಮೀಜಿಗಳ ಬೆಂಬಲ ದೊರೆತಿದೆ.

ಹೋರಾಟ ತೀವ್ರಗೊಳ್ಳುತ್ತಿದ್ದಂತೆ ರವಿವಾರ ಸ್ವತಃ ಸಚಿವ ಆರ್‌.ಬಿ. ತಿಮ್ಮಾಪುರ ಹೋರಾಟದ ಸ್ಥಳಕ್ಕೆ ಭೇಟಿ ನೀಡಿ, ನಾನು ಸಚಿವ-ಶಾಸಕ ಆನಂತರ. ಮೊದಲು ನಾನೊಬ್ಬ ರೈತ. ಈ ಹೋರಾಟಕ್ಕೆ ರೈತನಾಗಿ ಬೆಂಬಲ ಕೊಡುವೆ, ಸಚಿವನಾಗಿ ನನ್ನ ಜವಾಬ್ದಾರಿ ನಿಭಾಯಿಸುವೆ ಎಂದು ಹೇಳಿದರು. ಸೋಮವಾರ ದಿಂಗಾಲೇಶ್ವರ ಶ್ರೀ, ತೋಂಟದ ಸಿದ್ಧಲಿಂಗ ಶ್ರೀ, ನಿಡಸೋಸಿ ಶ್ರೀಗಳ ನೇತೃತ್ವದಲ್ಲಿ 150ಕ್ಕೂ ಹೆಚ್ಚು ಸ್ವಾಮೀಜಿಗಳು ಹೋರಾಟದ ಸ್ಥಳಕ್ಕೆ ಆಗಮಿಸಿ ಬೆಂಬಲ ವ್ಯಕ್ತಪಡಿಸಲಿದ್ದಾರೆ.

ವಿಜಯಪುರ-ಬಾಗಲಕೋಟೆ ಅವಳಿ ಜಿಲ್ಲೆಯ ವಕೀಲರು ಡಿ. 9ರಂದು ಕೋರ್ಟ್‌ ಕಲಾಪದಿಂದ ದೂರ ಉಳಿದು ಹೋರಾಟಕ್ಕೆ ಬೆಂಬಲಿಸಲಿದ್ದಾರೆ. ಯುಕೆಪಿ ಪೂರ್ಣಕ್ಕೆ ಸರಕಾರ ತತ್‌ಕ್ಷಣ ಸೂಕ್ತ ನಿರ್ಧಾರ ಪ್ರಕಟಿಸದಿದ್ದರೆ ಪ್ರತ್ಯೇಕ ರಾಜ್ಯದ ಕೂಗು ಅನಿವಾರ್ಯ ಎಂದು ವಕೀಲ ಸಂಘಗಳು ಎಚ್ಚರಿಕೆ ನೀಡಿವೆ.