Udupi: ಜಿಲ್ಲೆಯ ನ್ಯಾಯಾಲಯಗಳಲ್ಲಿವೆ 34,981ಪ್ರಕರಣ

ಉಡುಪಿ: ಜಿಲ್ಲೆಯ ವಿವಿಧ ನ್ಯಾಯಾಲಯಗಳಲ್ಲಿ ವಿಚಾರಣ ಹಂತದಲ್ಲಿ ಹಲವು ವರ್ಷಗಳಿಂದ ಬಾಕಿ ಇರುವ ಪ್ರಕರಣಗಳನ್ನು ರಾಜೀ ಸಂಧಾನ ಮೂಲಕ ಇತ್ಯರ್ಥ ಪಡಿಸಿಕೊಳ್ಳಲು ಮೆಗಾ ಆದಾಲತ್‌ ಸಹಕಾರಿಯಾಗಲಿದೆ.

ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಸಹಯೋಗದಲ್ಲಿ ಡಿ.14ರಂದು ಜಿಲ್ಲೆಯ ವಿವಿಧ ನ್ಯಾಯಾಲಯಗಳಲ್ಲಿ ಲೋಕ ಅದಾಲತ್‌ ನಡೆಯಲಿದೆ. ಅಂದು ನಡೆಯುವ ಲೋಕ್‌ ಅದಾಲತ್‌ಗಾಗಿ ದಾಖಲಿಸಿಕೊಂಡ ಪಿಎಲ್‌ಸಿ ಪ್ರಕರಣಗಳ ಸಂಖ್ಯೆ 5,230. ರಾಜಿಯಾಗಲು ಗುರುತಿಸಿದ ಪ್ರಕರಣಗಳು 4,331.

2024ರ ಡಿ.1ಕ್ಕೆ ಜಿಲ್ಲೆಯ ವಿವಿಧ ನ್ಯಾಯಾಲಯಗಳಲ್ಲಿ ದಾಖಲಾದ ಪ್ರಕರಣಗಳಲ್ಲಿ ಕ್ರಿಮಿನಲ್‌ ಸಂಯೋಜಿತ ಅಪರಾಧ 532, ಎನ್‌ಎ ಆ್ಯಕ್ಟ್ ಸೆಕ್ಷನ್‌ 138ರಲ್ಲಿ 6,490 ಪ್ರಕರಣ, ಬ್ಯಾಂಕ್‌ ಪ್ರಕರಣ 455, ಮನಿ ರಿಕವರಿ ಪ್ರಕರಣ, 272, ಎಂಎಸಿಟಿ ಪ್ರಕರಣ 2690, ಎಂಪ್ಲಾಯಿಸ್‌ ಪರಿಹಾರ ಪ್ರಕರಣ 38, ಕಾರ್ಮಿಕ ವಿವಾದ ಪ್ರಕರಣ 44, ಎಂಆರ್‌ಡಿ ಪ್ರಕರಣ 104, ವೈವಾಹಿಕ ಪ್ರಕರಣ 332, ಭೂ ಸ್ವಾಧೀನ 240 ಹಾಗೂ 24316 ಸಿವಿಲ್‌ ಸಹಿತ ಇನ್ನಿತರ ಪ್ರಕರಣಗಳು ಸೇರಿ 34,981 ಪ್ರಕರಣಗಳು ಇತ್ಯರ್ಥಕ್ಕೆ ಬಾಕಿಯಿವೆ.

2024ರ ಮಾ. 16ರಂದು ನಡೆದ ಲೋಕ್‌ ಅದಾಲತ್‌ನಲ್ಲಿ ಉಡುಪಿ 17,772, ಕಾರ್ಕಳ 3,946, ಕುಂದಾಪುರ 12, 467 ಸೇರಿ 34,185 ನ್ಯಾಯಾಲಯದಲ್ಲಿ ಪ್ರಕರಣಗಳಿದ್ದವು. ಅದರಲ್ಲಿ ರಾಜಿ ಆಗಲು ಗುರುತಿಸಿದ ಪ್ರಕರಣಗಳು 3509 ಆಗಿತ್ತು. ನ್ಯಾಯಾಲಯದ ಮೆಟ್ಟಿಲು ಏರುವ ಮೊದಲು ವ್ಯಾಜ್ಯ ಪೂರ್ವ ಪ್ರಕರಣ ಉಡುಪಿ 20,759, ಕಾರ್ಕಳ 4,166, ಕುಂದಾಪುರ 15,755 ಸಹಿತ ಒಟ್ಟು 40,680 ಇದೆ.

ಬಾಕಿಯಿರುವ ಎಂದು ಗುರುತಿಸಲಾದ 3,509 ಪ್ರಕರಣಗಳ ಪೈಕಿ 2,381 ಪ್ರಕರಣ ನ್ಯಾಯಾಲಯದಲ್ಲಿ ಬಾಕಿಯಿದ್ದ ಪ್ರಕರಣಗಳು ಹಿಂದಿನ ಅದಾಲತ್‌ನಲ್ಲಿ ಇತ್ಯರ್ಥಗೊಂಡಿದೆ. ವ್ಯಾಜ್ಯ ಪೂರ್ವ ಪ್ರಕರಣಗಳಲ್ಲಿ 40,680 ಪ್ರಕರಣ ಪೈಕಿ 40,241 ಪ್ರಕರಣ ಇತ್ಯರ್ಥ ಆಗಿದ್ದವು.

2024ರ ಜು.13ರ ಲೋಕ್‌ ಅದಾಲತ್‌ನಲ್ಲಿ ಉಡುಪಿ 18,777, ಕಾರ್ಕಳ 3,969, ಕುಂದಾಪುರ 12,144 ಸೇರಿ 34,885 ಪ್ರಕರಣ ಇದ್ದು ಅದರಲ್ಲಿ 4,953 ಪ್ರಕರಣಗಳನ್ನು ರಾಜಿಯಾಗುವ ಪ್ರಕರಣಗಳೆಂದು ಗುರುತಿಸಿ, 4012 ಪ್ರಕರಣ ಇತ್ಯರ್ಥಪಡಿಸಲಾಗಿದೆ. ವ್ಯಾಜ್ಯ ಪೂರ್ವ 85,176 ಪ್ರಕರಣ ದಾಖಲು ಮಾಡಿಕೊಂಡಿದ್ದು ಅದರಲ್ಲಿ 84,913 ಪ್ರಕರಣ ಇತ್ಯರ್ಥ ಆಗಿದೆ.

ಸಾರ್ವಜನಿಕರಲ್ಲಿ ಜಾಗೃತಿ ಅರಿವು
ನ್ಯಾಯಾಧೀಕರಣದ ಜತೆಗೆ ನಾಗರಿಕರಲ್ಲಿ ಜಾಗೃತಿ ಮೂಡಿಸುವ ಕಾರ್ಯವೂ ನಡೆದಿದೆ. ಎಲ್‌ಎಲ್‌ಪಿ ಕಾರ್ಯಕ್ರಮ, ಮಹಿಳೆಯರಿಗಾಗಿ ಕಾನೂನು ಸಾಕ್ಷರತಾ ಕಾರ್ಯಕ್ರಮ, ಮಕ್ಕಳಿಗಾಗಿ ಕಾನೂನು ಸುರಕ್ಷತಾ ಕಾರ್ಯಕ್ರಮ, ಮಹಿಳೆಯರಿಗಾಗಿ ಕಾರ್ಯಾಗಾರ, ಲೈಂಗಿಕ ಕಿರುಕುಳ ತಡೆಗಟ್ಟುವಿಕೆ ಸಹಿತ ಹಲವು ಜಾಗೃತಿ, ಮಾಹಿತಿ ಕಾರ್ಯಕ್ರಮಗಳನ್ನು ಜಿಲ್ಲಾದ್ಯಂತ ನಡೆಸಲಾಗಿದೆ.

41,078 ಪ್ರಕರಣ ಇತ್ಯರ್ಥ
ಸೆ.14ರಂದು ನಡೆದ ಲೋಕ ಅದಾಲತ್‌ನಲ್ಲಿ ಉಡುಪಿ 18,521, ಕಾರ್ಕಳ 3,899, ಕುಂದಾಪುರ 11,706 ಸೇರಿ ಜಿಲ್ಲೆಯಲ್ಲಿ 34,126 ಪ್ರಕರಣ ದಾಖಲಾಗಿತ್ತು. ಅವುಗಳಲ್ಲಿ 3,705 ಪ್ರಕರಣ ರಾಜಿಯಾಗುವ ಪ್ರಕರಣವೆಂದು ಗುರುತಿಸಿದ್ದು ಅದರಲ್ಲಿ 3,015 ಪ್ರಕರಣ ಇತ್ಯರ್ಥವಾಗಿದೆ. ವ್ಯಾಜ್ಯಪೂರ್ವ 43,350 ಪ್ರಕರಣ ತೆಗೆದುಕೊಂಡಿದ್ದು ಅದರಲ್ಲಿ 41,078 ಪ್ರಕರಣ ಇತ್ಯರ್ಥವಾಗಿದೆ.

ಪ್ರಯೋಜನ ಪಡೆದುಕೊಳ್ಳಿ
ರಾಜ್ಯ ಕಾನೂನು ಸೇವೆಗಳ ಪ್ರಾಧಿಕಾರವು ಡಿ.14ರಂದು ರಾಜ್ಯಾದ್ಯಂತ ರಾಷ್ಟ್ರೀಯ ಲೋಕ ಅದಾಲತ್‌ ಹಮ್ಮಿಕೊಂಡಿದ್ದು, ಜಿಲ್ಲೆಯ ಎಲ್ಲ ನ್ಯಾಯಾಲಯಗಳಲ್ಲಿ ಅಂದು ಲೋಕ ಅದಾಲತ್‌ ನಡೆಯಲಿದೆ. ಸಾರ್ವಜನಿಕರು ನ್ಯಾಯಾಲಯದಲ್ಲಿ ಬಾಕಿಯಿರುವ ಪ್ರಕರಣ ಹಾಗೂ ವ್ಯಾಜ್ಯ ಪೂರ್ವ ಪ್ರಕರಣಗಳನ್ನು ಇತ್ಯರ್ಥಪಡಿಸಿಕೊಳ್ಳಲು ಅವಕಾಶವಿದೆ. ನಾಗರಿಕರು ಅದಾಲತ್‌ನಲ್ಲಿ ಭಾಗವಹಿಸಿ ಪ್ರಯೋಜನ ಪಡೆದುಕೊಳ್ಳಬಹುದಾಗಿದೆ.
-ಕಿರಣ್‌ ಎಸ್‌. ಗಂಗಣ್ಣವರ್‌, ನ್ಯಾಯಾಧೀಶರು, ಜಿಲ್ಲಾ ಪ್ರಧಾನ ಮತ್ತು ಸತ್ರ ನ್ಯಾಯಾಲಯ

ರಾಜಿಗೆ ಮಾರ್ಗದರ್ಶನ
ಅದಾಲತ್‌ನ ಮೂಲಕ ನ್ಯಾಯಾಲಯಗಳಲ್ಲಿ ಎರಡೂ ಕಡೆಯವರಿಗೆ ರಾಜೀ ಮಾಡಿಕೊಳ್ಳಲು ಮಾರ್ಗದರ್ಶನ ನೀಡಲಾಗುವುದು. ಇಬ್ಬರಿಗೂ ಒಪ್ಪಿಗೆಯಾಗುವಂತೆ ಪ್ರಕರಣ ತೀರ್ಮಾನ ಆಗುವುದರಿಂದ ವಿವಾದ ಅಂತ್ಯವಾಗಲಿದೆ.
-ಪಿ.ಆರ್‌. ಯೋಗೇಶ್‌, ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ