ಉಡುಪಿ-ಚಿಕ್ಕಮಗಳೂರು ಲೋಕಸಭಾ ಕ್ಷೇತ್ರ; 536 ಶತಾಯುಷಿಗಳು, 29,000 ಯುವ ಮತದಾರರು

ಉಡುಪಿ: ಆದ್ಯತೆ ಲೋಕಸಭೆ ಚುನಾವಣೆಗೆ ದಿನಾಂಕ ನಿಗದಿಯಾಗಿದೆ. ಮತದಾರರ ಪಟ್ಟಿಯೂ ಬಹುತೇಕ ಅಂತಿಮಗೊಂಡಿದೆ ಮತ್ತು ಕೊನೆಯ ಹಂತ ಸೇರ್ಪಡೆಗೂ ಅವಕಾಶ ನೀಡಲಾಗಿದೆ. ಉಡುಪಿ-ಚಿಕ್ಕಮಗಳೂರು ಕ್ಷೇತ್ರದಲ್ಲಿ ಈ ಬಾರಿ 536 ಶತಾಯುಷಿಗಳು ಮತದಾನಕ್ಕೆ ಸಿದ್ಧರಾಗಿದ್ದಾರೆ. 29 ಸಾವಿರ ಯುವ ಜನತೆ ಮೊದಲ ಬಾರಿಗೆ ಮತದಾನ ಮಾಡಲು ಹೆಸರು ನೋಂದಾಯಿಸಿಕೊಂಡಿದ್ದಾರೆ.

ಲೋಕಸಭಾ ಕ್ಷೇತ್ರ ವ್ಯಾಪ್ತಿಯ 8 ವಿಧಾನಸಭಾ ಕ್ಷೇತ್ರ ಬರುತ್ತದೆ. 8, 10, 362 ಮಹಿಳೆಯರು, 7,62,558 ಪುರುಷರು ಹಾಗೂ 38 ತೃತೀಯ ಲಿಂಗಿಯರು ಸೇರಿದಂತೆ 15,72,958 ಮತದಾರರಿದ್ದಾರೆ. ಇದರಲ್ಲಿ 536 ಶತಾಯುಷಿ ಮತದಾರರಾಗಿದ್ದಾರೆ. ಚಿಕ್ಕಮಗಳೂರು ವಿಧಾನಸಭಾ ಕ್ಷೇತ್ರವೊಂದರಲ್ಲೇ 148 ಶತಾಯುಷಿಗಳಿದ್ದರೆ, ತರಿಕೆರೆಯಲ್ಲಿ 121 ಶತಾಯುಷಿಗಳಿದ್ದಾರೆ. ಕುಂದಾಪುರದಲ್ಲಿ 21, ಉಡುಪಿಯಲ್ಲಿ 71, ಕಾಪುವಿನಲ್ಲಿ 50, ಕಾರ್ಕಳದಲ್ಲಿ 36, ಶೃಂಗೇರಿಯಲ್ಲಿ 34 ಹಾಗೂ ಮೂಡಿಗೆರೆಯಲ್ಲಿ 55 ಶತಾಯುಷಿ ಮತದಾರರಿದ್ದಾರೆ.

ಮನೆಯಿಂದಲೇ ಮತದಾನ ಕಳೆದ ಬಾರಿ 80 ವರ್ಷ ಮೇಲ್ಪಟ್ಟ ಹಿರಿಯ ನಾಗರಿಕರಿಗೆ ಮನೆಯಿಂದಲೇ ಮತದಾನ ಮಾಡಲು ಚುನಾವಣೆ ಆಯೋಗ ಅವಕಾಶ ಕಲ್ಪಿಸಿತ್ತು. ಈ ಬಾರಿ 85 ವರ್ಷ ಮೇಲ್ಪಟ್ಟ ಹಿರಿಯ ನಾಗರಿಕರಿಗೆ ಮಾತ್ರ ಮನೆಯಿಂದಲೇ ಮತದಾನ ಮಾಡಲು ಅವಕಾಶ ನೀಡಲಾಗಿದೆ.ಹಾಗೆಯೇ ಅಂಗವಿಕಲರಿಗೂ ಮನೆಯಿಂದಲೇ ಮತದಾನಕ್ಕೆ ಅವಕಾಶವಿದೆ.

ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ 85 ವರ್ಷ ಮೇಲ್ಪಟ್ಟ 21,521 ಹಿರಿಯ ನಾಗರಿಕರಿದ್ದಾರೆ. ಹಾಗೆಯೇ 17,959 ಅಂಗವಿಕಲರಿದ್ದಾರೆ. ಮನೆಯಿಂದಲೇ ಮತದಾನ ಮಾಡಲು ಇಚ್ಛಿಸುವ ಅರ್ಹ ಮತದಾರರು ಮುಂಚಿತವಾಗಿಯೇ ಅರ್ಜಿ ಸಲ್ಲಿಸಬೇಕು. ಅರ್ಜಿ ಪರಿಶೀಲಿಸಿ ಮನೆಯಿಂದಲೇ ಮತದಾನಕ್ಕೆ ಬೇಕಾದ ವ್ಯವಸ್ಥೆಯನ್ನು ಚುನಾವಣಾಧಿಕಾರಿಗಳ ಮೂಲಕ ಮಾಡಲಾಗುತ್ತದೆ.

ಕ್ಷೇತ್ರದಲ್ಲಿ 29,909 ಯುವ ಅಥವಾ ಹೊಸ ಮತದಾರರಿದ್ದಾರೆ. ಲೋಕಸಭೆ ಚುನಾವಣೆಯಲ್ಲೇ ಮೊದಲು ಮತದಾನ ಮಾಡಲಿರುವ ಇರುವ ಈಗಾಗಲೇ ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರು ನೋಂದಾಯಿಸಿಕೊಂಡಿದ್ದಾರೆ. ಯುವ ಮತದಾರರಲ್ಲಿ ಉಡುಪಿಯ ನಾಲ್ಕು ವಿಧಾನಸಭಾ ಕ್ಷೇತ್ರದವರೆ ಹೆಚ್ಚಿದ್ದಾರೆ. ಕಾರ್ಕಳದ 4,528, ಉಡುಪಿಯ 4,477,
ಕಾಪುವಿನ 4,235, ಕುಂದಾಪುರದ 3,916 ಯುವ ಮತದಾರರು ಹಾಗೂ ಚಿಕ್ಕಮಗಳೂರಿನ 3,796, ಶೃಂಗೇರಿಯ 3,346, ತರೀಕೆರೆಯ
2,919 ಹಾಗೂ ಮೂಡಿಗೆರೆಯ 2,692 ಯುವ ಮತದಾರರು ಸೇರಿದ್ದಾರೆ.

ಶೇ. 100 ಮತದಾನಕ್ಕೆ ಆದ್ಯತೆ 85 ವರ್ಷ ಮೇಲ್ಪಟ್ಟವರಿಗೆ ಮನೆಯಿಂದಲೇ ಮತದಾನಕ್ಕೆ ಅವಕಾಶವಿದೆ. ಯಾರಿಗೆ ಮತದಾನ ಕೇಂದ್ರಕ್ಕೆ ಬರಲು ಸಾಧ್ಯವಿದೆಯೋ ಅಂತವರು ಮತದಾನ ಕೇಂದ್ರಕ್ಕೆ ಬಂದು ಮತದಾನ ಮಾಡಿದರೆ ಉತ್ತಮ. ಯುವ
ಮತದಾರರ ನೋಂದಣಿ ಚೆನ್ನಾಗಿ ಆಗಿದೆ. ಪ್ರತಿಶತ 100ರಷ್ಟು ಮತದಾನಕ್ಕೆ ಅರಿವು ಮೂಡಿಸುತ್ತಿದ್ದೇವೆ.
ಡಾ| ವಿದ್ಯಾಕುಮಾರಿ, ಚುನಾವಣಾಧಿಕಾರಿ,
ಉಡುಪಿ-ಚಿಕ್ಕಮಗಳೂರು ಲೋಕಸಭಾ ಕ್ಷೇತ್ರ

1,842 ಮತಗಟ್ಟೆ
ಈ ಬಾರಿ ಲೋಕಸಭೆ ಚುನಾವಣೆಯಲ್ಲಿ ಮತದಾನವನ್ನು ವ್ಯವಸ್ಥಿತವಾಗಿ ನಡೆಸಲು ಕ್ಷೇತ್ರದಲ್ಲಿ 1,842 ಮತಗಟ್ಟೆ ಸ್ಥಾಪಿಸ
ಲಾಗುತ್ತದೆ. ಕುಂದಾಪುರದಲ್ಲಿ 222, ಉಡುಪಿಯಲ್ಲಿ 226, ಕಾಪುವಿನಲ್ಲಿ 209, ಕಾರ್ಕಳದಲ್ಲಿ 209, ಶೃಂಗೇರಿಯಲ್ಲಿ 256, ಮೂಡಿಗೆರೆಯಲ್ಲಿ 231, ಚಿಕ್ಕಮಗಳೂರಿನಲ್ಲಿ 261 ಹಾಗೂ ತರೀಕೆರೆಯಲ್ಲಿ 228 ಮತಗಟ್ಟೆ ಸ್ಥಾಪನೆ ಮಾಡಲಾಗುತ್ತದೆ.