ಟಿ20 ವಿಶ್ವಕಪ್‌ ಅರ್ಹತಾ ಸುತ್ತಿನ ಪಂದ್ಯ: ನೇಪಾಲ ವನಿತೆಯರು 8 ರನ್ನಿಗೆ ಆಲೌಟ್‌

ಬಾಂಗಿ (ಮಲೇಶ್ಯ): ಐಸಿಸಿ ಅಂಡರ್‌-19 ವನಿತೆಯರ ಟಿ20 ವಿಶ್ವಕಪ್‌ ಅರ್ಹತಾ ಕೂಟದ ಪಂದ್ಯದಲ್ಲಿ ನೇಪಾಲ ವನಿತೆಯರು ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ (ಯುಎಇ) ತಂಡದೆದುರು ಕೇವಲ 8 ರನ್ನಿಗೆ ಆಲೌಟಾಗಿದ್ದಾರೆ.

ಈ ಕೂಟ ಇದೇ ಮೊದಲ ಬಾರಿ ನಡೆಯುತ್ತಿದೆ. ನೇಪಾಲ, ಯುಎಇ, ಥಾಯ್ಲೆಂಡ್‌, ಭೂತಾನ್‌ ಮತ್ತು ಕತಾರ್‌ ಈ ಅರ್ಹತಾ ಕೂಟದಲ್ಲಿ ಭಾಗವಹಿಸುತ್ತಿದೆ.

ವಿಜೇತರು 2023ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲಿರುವ ಉದ್ಘಾಟನ ಅಂಡರ್‌-19 ವನಿತೆಯರ ಟಿ20 ವಿಶ್ವಕಪ್‌ನಲ್ಲಿ ಸ್ಪರ್ಧಿಸಲು ಅರ್ಹತೆ ಗಳಿಸಲಿದ್ದಾರೆ.

ಎರಡೂ ತಂಡಗಳ ಯಾವುದೇ ಆಟಗಾರ ಎರಡಂಕೆಯ ಮೊತ್ತ ಗಳಿಸುವ ಅವಕಾಶವೇ ಇರಲಿಲ್ಲ. ಯುಎಇಯ ತೀರ್ಥ ಸತೀಶ್‌ ಅಜೇಯ 4 ರನ್‌ ಗಳಿಸಿರುವುದು ತಂಡದ ಗರಿಷ್ಠ ಮೊತ್ತವಾಗಿತ್ತು.

ನೇಪಾಲದ ಆರು ಆಟಗಾರ್ತಿಯರು ರನ್‌ ಗಳಿಸಲು ಒದ್ದಾಡಿದ್ದರು. ಸ್ನೇಹಾ ಮಹಾರಾಜ್‌ ಅವರ 3 ರನ್‌ ಗರಿಷ್ಠ ಮೊತ್ತವಾಗಿತ್ತು.

ಯುಎಇ ಪರ ಆಫ್ ಸ್ಪಿನ್ನರ್‌ ಮಹಿಕಾ ಗೌರ್‌ ತನ್ನ 4 ಓವರ್‌ಗಳ ದಾಳಿಯಲ್ಲಿ 2 ಮೇಡನ್‌ ಮಾಡಿದ್ದಲ್ಲದೇ ಕೇವಲ 2 ರನ್‌ ನೀಡಿ 5 ವಿಕೆಟ್‌ ಹಾರಿಸಿದ್ದರು.

ಇನ್ನೋರ್ವ ಬೌಲರ್‌ ಇಂದುಜಾ ನಂದಕುಮಾರ್‌ 6 ರನ್ನಿಗೆ 3 ವಿಕೆಟ್‌ ಪಡೆದಿದ್ದರು. ನೇಪಾಲ ಇನ್ನಿಂಗ್ಸ್‌ ಕೇವಲ 8.1 ಓವರ್‌ಗಳಲ್ಲಿ ಮುಗಿದಿದ್ದರೆ ಯುಎಇ ಕೇವಲ ಏಳು ಎಸೆತಗಳಲ್ಲಿ ಗೆಲ್ಲಲು ಅಗತ್ಯವಿರುವ ರನ್‌ ಗಳಿಸಿತ್ತು.