ಸಿಡಿಲ ಹೊಡೆತಕ್ಕೆ ಇಬ್ಬರು ಬಾಲಕರ ಸಾವು; ಒಬ್ಟಾತ ಗಂಭೀರ

ಕೋರ್ಬಾ : ಛತ್ತೀಸ್‌ಗಢದ ಜಂಜ್‌ಗೀರ್‌ – ಚಂಪಾ ಚಿಲ್ಲೆಯಲ್ಲಿ ಹೊಲದಲ್ಲಿ ಕೆಲಸ ಮಾಡುತ್ತಿದ್ದ ವೇಳೆ ಸಿಡಿಲು ಬಡಿದು 16 ಮತ್ತು 18ರ ಹರೆಯದ ಇಬ್ಬರು ಹುಡುಗರು ಮೃತಪಟ್ಟ ಘಟನೆ ವರದಿಯಾಗಿದೆ. 

ಇದೇ ಘಟನೆಯಲ್ಲಿ 14ರ ಹರೆಯದ ಮತ್ತೋರ್ವ ಹುಡುಗ ತೀವ್ರವಾಗಿ ಗಾಯಗೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಮರ್ಕಮ್‌ಗೊಡಿ ಗ್ರಾಮದಲ್ಲಿ ಈ ಮೂವರೂ ಹುಡುಗರು ತಮ್ಮ ಪಶುಗಳನ್ನು ಮೇಯಿಸಿಲು ಹೊಲಕ್ಕೆ ಒಯ್ದಿದ್ದರು. ಮಳೆ ಸುರಿಯಲು ಆರಂಭಗೊಂಡಂತೆಯೇ ಇವರು ಮರದ ಕೆಳಗೆ ಆಶ್ರಯ ಪಡೆದರು. 

ಆಗ ಇದ್ದಕ್ಕಿದ್ದಂತೆಯೇ ಸಿಡಿಲು ಹೊಡೆದು ಬಾಲಕರು ಗಾಯಗೊಂಡರು. ಗ್ರಾಮಸ್ಥರು ಅವರನ್ನು ಒಡನೆಯೇ ಆಸ್ಪತ್ರೆಗೆ ಸಾಗಿಸಿದರು. ಆದರೆ ಅಷ್ಟರೊಳಗಾಗಿ ಇಬ್ಬರು ಬಾಲಕರು ತೀರಿಕೊಂಡಿದ್ದರು.