ಉಗ್ರರ ಬಳಿ ಸೈಬರ್‌ಸೈನ್ಯ

ಹೊಸದಿಲ್ಲಿ: ಭಾರತದ ವಿರುದ್ಧ ಉಗ್ರರನ್ನು ನುಗ್ಗಿಸುವ ಪಾಕಿಸ್ಥಾನ ಈಗ ಹೊಸ ದುಸ್ಸಾಹಸ ನಡೆಸಲು ಮಂದಾಗಿದೆ. ಟರ್ಕಿಯ ನೆರವಿನಿಂದ ಸೈಬರ್‌ ಆರ್ಮಿ ಸಿದ್ಧಗೊಳಿಸಲು ಮುಂದಾಗಿದೆ. ಈ ಮೂಲಕ ದೇಶದ ವಿರುದ್ಧ ಹೊಸ ಮಾದರಿಯ ಯುದ್ಧ ಸಾರಲು ನಿರ್ಧರಿಸಿದೆ.

ಕೆಲದಿನಗಳ ಹಿಂದಷ್ಟೇ ಪ್ಯಾರಿಸ್‌ ಮೂಲದ ಫೈನಾನ್ಶಿಯಲ್‌ ಆ್ಯಕ್ಷನ್‌ ಟಾಸ್ಕ್ ಫೋರ್ಸ್‌ (ಎಫ್ಎಟಿಎಫ್)ನ ಬೂದು ಪಟ್ಟಿಯಿಂದ ಹೊರಬಂದ ಬೆನ್ನಲ್ಲೇ ಹೊಸ ಸಂಚಿನ ವಿಚಾರ ಹೊರಬಂದಿದೆ. 2018ರಲ್ಲಿ ಟರ್ಕಿಯ ಗೃಹ ಸಚಿವ ಸುಲೇಮಾನ್‌ ಸ್ಯೋಲು ಜತೆಗೆ ದ್ವಿಪಕ್ಷೀಯ ಸಹಕಾರ ವೃದ್ಧಿ ವ್ಯಾಪ್ತಿಯಲ್ಲಿ ಈ ಬಗ್ಗೆ ಮಾತುಕತೆ ನಡೆದಿತ್ತು. ಇಮ್ರಾನ್‌ ಖಾನ್‌ ಅವರು ಪ್ರಧಾನಿಯಾಗಿದ್ದ ಅವಧಿಯಲ್ಲಿ ಈ ಬಗ್ಗೆ ಸಹಮತ ವ್ಯಕ್ತಪಡಿಸಿ, ಯೋಜನೆಗೆ ಅನುಮೋದನೆ ನೀಡಿದ್ದರು.

ದಕ್ಷಿಣ ಏಷ್ಯಾದಲ್ಲಿ ಮುಸ್ಲಿಂ ಸಮುದಾಯದ ಮನಸ್ಸು ಗೆಲ್ಲುವ ನಿಟ್ಟಿನಲ್ಲಿ ಅಮೆರಿಕ ಹಾಗೂ ಭಾರತ ಹಾಗೂ ಅಮೆ ರಿಕದ ವಿರುದ್ಧ ಪದೇ ಪದೆ ಟೀಕೆ ಮಾಡಲು ಈ ಪಡೆಯನ್ನು ಬಳಕೆ ಮಾಡಿಕೊಳ್ಳಲು ಪಾಕಿಸ್ಥಾನ ಮುಂದಾಗಿದೆ. ಈ ಮೂಲಕ ಪಾಕಿಸ್ಥಾನದ ಧಾರ್ಮಿಕ ಮತ್ತು ರಾಜಕೀಯ ನಾಯಕರ ವಿರುದ್ಧದ ಉಂಟಾಗುತ್ತಿರುವ ದಾಳಿಯ ತೀವ್ರತೆ ತಗ್ಗಿಸುವ ನಿಟ್ಟಿನಲ್ಲಿ ಕೂಡ ಈ ಪಡೆಯನ್ನು ಬಳಕೆ ಮಾಡಿ ಕೊಳ್ಳಲಾಗುತ್ತದೆ.

ಪಾಕಿಸ್ಥಾನದ ಜತೆಗೂಡಿ ಇಂಥ ಕಿಡಿ ಗೇಡಿತನದ ಕೃತ್ಯಕ್ಕೆ ಕೈ ಹಾಕಲಾಗಿದೆ ಎಂಬ ಬಗ್ಗೆ ಟರ್ಕಿಯ ಸಚಿವ ಅ.13ರಂದು ಸಂದರ್ಶನವೊಂದರಲ್ಲಿ ಒಪ್ಪಿಕೊಂಡಿದ್ದರು. ಟರ್ಕಿ ಕೂಡ ಪಾಕಿಸ್ಥಾನದ ಅತ್ಯಾಪ್ತ ಮಿತ್ರ ರಾಷ್ಟ್ರವಾಗಿದ್ದು, ವಿಶ್ವಸಂಸ್ಥೆಯಲ್ಲಿ ಹಲವು ಬಾರಿ ಕಾಶ್ಮೀರ ವಿಚಾರ ಪ್ರಸ್ತಾವ ಮಾಡಿತ್ತು.