ಭರ್ತಿಯತ್ತ ತುಂಗಾ ಜಲಾಶಯ

ಶಿವಮೊಗ್ಗ: ರಾಜ್ಯದ ಅತಿ ಚಿಕ್ಕ ಹಾಗೂ ಸುಂದರ ಜಲಾಶಯವಾಗಿರುವ ಶಿವಮೊಗ್ಗ ಸಮೀಪದ ಗಾಜನೂರಿನಲ್ಲಿರುವ ತುಂಗಾ ಜಲಾಶಯ ಭರ್ತಿಯಾಗುವ ಹಂತ ತಲುಪಿದೆ.

ತುಂಗಾ ಜಲಾಶಯದಲ್ಲಿ 3.24 ಟಿಎಂಸಿ ನೀರು ಸಂಗ್ರಹಣಾ ಸಾಮರ್ಥ್ಯ ಇದ್ದು, ಪ್ರಸ್ತುತ ತುಂಗಾ ಜಲಾಶಯದಲ್ಲಿ 3.02 ಟಿಎಂಸಿಯಷ್ಟು ನೀರು ಸಂಗ್ರಹವಾಗಿದೆ. ಈ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ಕ್ರಮವಾಗಿ ಜಲಾಶಯದ ನಾಲ್ಕು ಕ್ರಸ್ಟ್‌ ಗೇಟ್‌ ಗಳನ್ನು ತೆರೆದು ಎರಡು ಸಾವಿರ ಕ್ಯೂಸೆಕ್‌ ನೀರನ್ನು ಹೊರಬಿಡಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಹೆಚ್ಚಿನ ಪ್ರಮಾಣದ ನೀರನ್ನು ನದಿಗೆ ಬಿಡುವ ಸಾಧ್ಯತೆಯಿದೆ.

ತುಂಗಾ ಜಲಾಶಯಕ್ಕೆ 7 ಸಾವಿರ ಕ್ಯೂಸೆಕ್‌ನಷ್ಟು ನೀರು ಹರಿದು ಬರುತ್ತಿದೆ. ಹೀಗಾಗಿ ಕೇವಲ ಅರ್ಧ ದಿನದಲ್ಲಿ ಜಲಾಶಯ ಸಂಪೂರ್ಣ ತುಂಬುತ್ತದೆ. ಆದರೆ ಜಲಾಶಯ ತುಂಬಿಸದೆ ನೀರಿನ ಪ್ರಮಾಣ ಬ್ಯಾಲೆನ್ಸ್‌ ಮಾಡಬೇಕಿದೆ.  ಪ್ರಸ್ತುತ 48 ಮಿಮೀ ಮಳೆಯಾಗುತ್ತಿದೆ. ಪರಿಣಾಮ ಏಳು ಸಾವಿರ ಕ್ಯೂಸೆಕ್‌ ನಷ್ಟು ನೀರು ಜಲಾಶಯಕ್ಕೆ ಹರಿದು ಬರುತ್ತಿದೆ. ಜಲಾಶಯ ತುಂಬುವ ಹಂತ ತಲುಪಿರುವುದರಿಂದ ಜಲಾಶಯಕ್ಕೆ ಬಂದಷ್ಟೇ ನೀರನ್ನು ಹೊರಗೆ ಕಳುಹಿಸಬೇಕಾಗಿದೆ. ಜಲಾಶಯದ ಪಕ್ಕದಲ್ಲೇ ಇರುವ ವಿದ್ಯುತ್‌ ಉತ್ಪಾದನಾ ಘಟಕಕ್ಕೆ 4700 ಕ್ಯೂಸೆಕ್‌ ನೀರನ್ನು ಬಿಡಲಾಗುತ್ತಿದೆ. ಜಲಾಶಯದ ನೀರನ್ನು ಬಳಸಿಕೊಂಡು ಈ ವಿದ್ಯುದ್ದಾಗಾರದಲ್ಲಿ ಪ್ರತಿ ಗಂಟೆಗೆ 24 ಸಾವಿರ ಯುನಿಟ್‌ ವಿದ್ಯುತ್‌ ಉತ್ಪಾದಿಸಲಾಗುತ್ತಿದೆ.

ತುಂಗಾ ಜಲಾಶಯ ಒಂದು ವಿಶಿಷ್ಟ ಜಲಾಶಯಗಳ ಸಾಲಿಗೆ ಸೇರುತ್ತದೆ. ಶಿವಮೊಗ್ಗ ನಗರದ ಕುಡಿಯುವ ನೀರಿನ ಮೂಲವೇ ಈ ಜಲಾಶಯ. ಇದಲ್ಲದೆ 89 ಸಾವಿರ ಹೆಕ್ಟೇರ್‌ ಪ್ರದೇಶಕ್ಕೆ ನೀರೊದಗಿಸುತ್ತದೆ.ಜತೆಗೆ ಈ ಜಲಾಶಯದ ನೀರು ಬಳಸಿ ವಿದ್ಯುತ್‌ ಉತ್ಪಾದಿಸಲಾಗುತ್ತಿದೆ. ಒಂದು ಜಲಾಶಯ ಮೂರು ಉಪಯೋಗ ಎಂಬುದು ತುಂಗಾ ಜಲಾಶಯದ ಧ್ಯೇಯವಾಗಿದೆ.