ಇಡ್ಲಿಗೆ ಟಾಯ್ಲೆಟ್‌ ನೀರು!

ಮುಂಬಯಿ: ರಸ್ತೆ ಬದಿ ಇಡ್ಲಿ ಮಾರುವ ವ್ಯಾಪಾರಿಯೊಬ್ಬರು ರೈಲ್ವೇ ನಿಲ್ದಾಣದ ಶೌಚಾಲಯದಿಂದ ನೀರು ತಂದು ಅಡುಗೆಗೆ ಬಳಸಿದ್ದ ವೀಡಿಯೋ ಈಗ ವೈರಲ್‌ ಆಗಿದೆ. ಈ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಜನರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಂತೆ, ಆಹಾರ ಮತ್ತು ಔಷಧ ಪ್ರಾಧಿಕಾರ(ಎಫ್ಡಿಎ) ಈ ಕುರಿತು ತನಿಖೆ ಆರಂಭಿಸಿದೆ. ಜತೆಗೆ, ಈ ರೀತಿ ಕಲುಷಿತ ನೀರು ಬಳಸದಂತೆ ವ್ಯಾಪಾರಿಗಳಿಗೆ ಎಚ್ಚರಿಕೆ ನೀಡಿದೆ. ಈ ವಿಡಿಯೋ ನಮ್ಮ ಗಮನಕ್ಕೆ ಬಂದಿದ್ದು, ಇಡ್ಲಿ ಮಾರುವಾತ ಮತ್ತು ಇತರ ರಸ್ತೆ ಬದಿ ಆಹಾರ ಮಾರುವವರ ವಿರುದ್ಧ ತನಿಖೆ ನಡೆಸಲಾಗುವುದು. ಈ ರೀತಿ ವಂಚನೆ ನಡೆಸುವವರ ಪರವಾನಗಿ ರದ್ದುಪಡಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.