ಹೀಗೂ ಉಂಟು: ಒಂದು ಪಂಚಾಯತ್‌ಗೆ ಎರಡು ಕ್ಷೇತ್ರ..!

ಬಂಟ್ವಾಳ: ಸಾಮಾನ್ಯ ಒಂದಷ್ಟು ಪಂಚಾಯತ್‌ಗಳನ್ನು ಸೇರಿಸಿಕೊಂಡು ಒಂದು ವಿಧಾನಸಭಾ ಕ್ಷೇತ್ರ ಮಾಡಲಾಗುತ್ತದೆ. ಆದರೆ ಬಂಟ್ವಾಳ ತಾಲೂಕಿನ ಒಂದು ಪಂಚಾಯತ್‌ 2015ರ ವರೆಗೆ ಎರಡು ಕ್ಷೇತ್ರಗಳ ವ್ಯಾಪ್ತಿಗೆ ಸೇರಿತ್ತು.

ತಾಲೂಕಿನ ತುಂಬೆ ಹಾಗೂ ಕಳ್ಳಿಗೆ ಗ್ರಾಮಗಳು ಸೇರಿ ತುಂಬೆ ಪಂಚಾಯತ್‌ ಇದ್ದು, ಅದರಲ್ಲಿ ತುಂಬೆಯು ಮಂಗಳೂರು (ಉಳ್ಳಾಲ) ವಿಧಾನಸಭಾ ಕ್ಷೇತ್ರಕ್ಕೂ, ಕಳ್ಳಿಗೆ ಬಂಟ್ವಾಳ ವಿಧಾನಸಭಾ ಕ್ಷೇತ್ರಕ್ಕೂ ಸೇರಿತ್ತು. ಬಳಿಕ 2015ರಲ್ಲಿ ರಾಜ್ಯದಲ್ಲಿ ಹೊಸ ಪಂಚಾಯತ್‌ಗಳು ಅಸ್ತಿತ್ವಕ್ಕೆ ಬಂದ ಸಂದರ್ಭದಲ್ಲಿ ಕಳ್ಳಿಗೆ ಗ್ರಾಮ ಪ್ರತ್ಯೇಕಗೊಂಡು ಸ್ವತಂತ್ರ ಪಂಚಾಯತ್‌ ಆಗಿ ಅಸ್ತಿತ್ವಕ್ಕೆ ಬಂದ ಬಳಿಕ ಈ ಸಮಸ್ಯೆ ಪರಿಹಾರವಾಯಿತು.

2008ರಲ್ಲಿ ಕ್ಷೇತ್ರ ಪುನರ್‌ ವಿಂಗಡನೆಗೆ ಮೊದಲು ಎರಡು ಗ್ರಾಮಗಳನ್ನು ಒಳಗೊಂಡ ತುಂಬೆ ಪಂಚಾಯತ್‌ ವಿಟ್ಲ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿದ್ದು, ಎರಡೂ ಗ್ರಾಮಗಳಿಗೂ ಒಂದೇ ಕ್ಷೇತ್ರವಾಗಿತ್ತು. ಆದರೆ 2008ರಲ್ಲಿ ವಿಟ್ಲ ಕ್ಷೇತ್ರ ರದ್ದಾದ ಸಂದರ್ಭದಲ್ಲಿ ಒಂದು ಗ್ರಾಮವನ್ನು ಮಂಗಳೂರಿಗೂ, ಮತ್ತೂಂದನ್ನು ಬಂಟ್ವಾಳಕ್ಕೂ ಸೇರಿಸಲಾಗಿತ್ತು. ಹೀಗಾಗಿ 2008ರಿಂದ 2015ರ ವರೆಗೆ ಒಂದೇ ಪಂಚಾಯತ್‌ಗೆ ಎರಡು ಕ್ಷೇತ್ರಗಳು ಒಳಪಟ್ಟಿದ್ದವು.