ಐಸಿಸಿ ವಿಶ್ವ ಟೆಸ್ಟ್‌ ಚಾಂಪಿಯನ್‌ಶಿಪ್‌ ಫೈನಲ್‌ಗೆ ಓವಲ್‌ ಆತಿಥ್ಯ

ದುಬಾೖ: ಈ ಬಾರಿಯ ಐಸಿಸಿ ವಿಶ್ವ ಟೆಸ್ಟ್‌ ಚಾಂಪಿಯನ್‌ಶಿಪ್‌ ಫೈನಲ್‌ ಪಂದ್ಯದ ತಾಣ ನಿಗದಿಯಾಗಿದೆ. ಇದು ಜೂ. 7ರಿಂದ 11ರ ತನಕ ಲಂಡನ್‌ನ ಓವಲ್‌ ಅಂಗಳದಲ್ಲಿ ನಡೆಯಲಿದೆ. ಜೂ. 12 ಮೀಸಲು ದಿನವಾಗಿರುತ್ತದೆ.

ಈಗಿನ ಲೆಕ್ಕಾಚಾರದ ಪ್ರಕಾರ ಆಸ್ಟ್ರೇಲಿಯ (75.56) ಮತ್ತು ಭಾರತ (58.93) ಮೊದಲೆರಡು ಸ್ಥಾನದಲ್ಲಿವೆ. ಇತ್ತಂಡಗಳ ನಡುವೆ ಗುರುವಾರದಿಂದ 4 ಪಂದ್ಯಗಳ ಟೆಸ್ಟ್‌ ಸರಣಿ ಆರಂಭವಾಗಲಿದ್ದು, ಇದು ಫೈನಲ್‌ ತಂಡಗಳನ್ನು ಖಾತ್ರಿಗೊಳಿಸಲು ನಿರ್ಣಾಯಕವೆನಿಸಲಿದೆ.

ಶ್ರೀಲಂಕಾ ಮತ್ತು ದಕ್ಷಿಣ ಆಫ್ರಿಕಾ ಕ್ರಮವಾಗಿ 3ನೇ ಹಾಗೂ 4ನೇ ಸ್ಥಾನಿಯಾಗಿವೆ. ಇವುಗಳಿಗೂ ದೂರದ ಫೈನಲ್‌ ಸಾಧ್ಯತೆ ಇದೆ.

ಸೌತಾಂಪ್ಟನ್‌ನಲ್ಲಿ ನಡೆದ ಚೊಚ್ಚಲ ಟೆಸ್ಟ್‌ ಚಾಂಪಿಯನ್‌ಶಿಪ್‌ ಫೈನಲ್‌ನಲ್ಲಿ ಭಾರತವನ್ನು ಸೋಲಿಸಿದ ನ್ಯೂಜಿಲ್ಯಾಂಡ್‌ ಪ್ರಶಸ್ತಿ ಎತ್ತಿತ್ತು.