ವರ್ಷದ ಹಿಂದೆ ಬಾಲ ಮಂದಿರದಿಂದ ಬಾಲಕಿ ನಾಪತ್ತೆ:ಬೆನ್ನುಬಿದ್ದ ಪೊಲೀಸರು

ವಿಜಯಪುರ:ನಗರದಲ್ಲಿರುವ ಸರ್ಕಾರಿ ಬಾಲಕಿಯರ ಬಾಲ ಮಂದಿರದಿಂದ ವರ್ಷದ ಹಿಂದೆ ಕಾಣೆಯಾಗಿರುವ ಬಾಲಕಿಯೊಬ್ಬಳ ಶೋಧಕ್ಕಾಗಿ ಪೊಲೀಸರು ಬೆನ್ನುಬಿದ್ದಾರೆ.

2020 ಏಪ್ರಿಲ್ 12 ರಂದು ನಗರದ ಮನಗೂಳಿ ರಸ್ತೆಯಲ್ಲಿರುವ ಬಾಲಕಿಯರ ಬಾಲ ಮಂದಿರದಿಂದ 17 ವರ್ಷದ ಶೃತಿ ಶಂಕರ ಶಿತೋಳಿ ಎಂಬ ಬಾಲಕಿ ಕಾಣೆಯಾಗಿದ್ದಾಳೆ.

ಈ ಕುರಿತು ಕಳೆದ ವರ್ಷ ಎಪ್ರೀಲ್ 23 ರಂದು ಜಲನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಸದರಿ ಬಾಲಕಿ ನಾಪತ್ತೆ ಹಿಂದೆ ಅಪಹರಣ ಮಾಡಿರುವ ಶಂಕೆಯೂ ಇದೆ ಎಂದು ಸರಕಾರಿ ಬಾಲಕಿಯರ ಬಾಲ ಮಂದಿರದ ಅಂದಿನ ಪ್ರಭಾರ ಅಧೀಕ್ಷಕಿ ಅತೀಕ ಸಿದ್ದಿ ದೂರು ನೀಡಿದ್ದರು.

ಬಾಲಕಿ ಕಾಣೆಯಾಗಿ 15 ತಿಂಗಳಾಗುತ್ತ ಬಂದರೂ ಎಲ್ಲಿಯೂ ಆಕೆಯ ಸುಳಿವು ಸಿಕ್ಕಿಲ್ಲ. ಹೀಗಾಗಿ ಕಳೆದ ವಾರದ ಹಿಂದಷ್ಟೇ ಜಲನಗರ ಠಾಣೆಯಲ್ಲಿ ಅಧಿಕಾರ ವಹಿಸಿಕೊಂಡಿರುವ ಎಸೈ ಎಸ್ಐ ಎಸ್.ಎಂ.ಶಿರಗುಪ್ಪಿ ವಿಶೇಷ ಆಸಕ್ತಿ ತೋರಿ ಬಾಲಕಿಯ ಶೋಧಕ್ಕೆ ಬೆನ್ನು ಬಿದ್ದಾರೆ.