Theft: ಮನೆ ಕೀಲಿ ಹುಡುಕಿ ಕನ್ನ ಹಾಕುತ್ತಿದ್ದ ಡೆಲಿವರಿ ಬಾಯ್‌

ಬೆಂಗಳೂರು:  ಬೀಗ ಹಾಕಿ ಮನೆ ಮುಂಭಾಗದಲ್ಲಿ ಕೀಗಳನ್ನು ಇಡಬೇಡಿ ಎಂದು ಪೊಲೀಸರು ಜಾಗೃತಿ ಮೂಡಿ ಸಿದರೂ ಲೆಕ್ಕಿಸದ ಮಾಲೀಕ ರೊಬ್ಬರ ಬೇಜವಾಬ್ದಾರಿತನ ವನ್ನು ಬಂಡವಾಳ ಮಾಡಿ ಕೊಂಡ  ಡೆಲಿವರಿ ಬಾಯ್‌ವೊಬ್ಬ ಮನೆ ಮುಂದಿಟ್ಟಿದ್ದ ಕೀ ಬಳಸಿ ಚಿನ್ನಾಭರಣ ಮತ್ತು ನಗದು ದೋಚಿ ಇದೀಗ ವೈಟ್‌ಫೀಲ್ಡ್‌ ಪೊಲೀಸರ ಅತಿಥಿಯಾಗಿದ್ದಾನೆ.

ವೈಟ್‌ಫೀಲ್ಡ್‌ ನಿವಾಸಿ ಪ್ರದೀಪ್‌ (30) ಬಂಧಿತ. ಆರೋಪಿಯಿಂದ 10 ಲಕ್ಷ ರೂ. ಮೌಲ್ಯದ 152 ಗ್ರಾಂ ಚಿನ್ನ ಹಾಗೂ 1 ಬೈಕ್‌ ವಶಕ್ಕೆ ಪಡೆದುಕೊಳ್ಳಲಾಗಿದೆ. ಆರೋಪಿ ಬಿಗ್‌ ಬಾಸ್ಕೆಟ್‌ನಲ್ಲಿ ಡೆಲಿವರಿ ಬಾಯ್‌ ಆಗಿ ಹಲವು ತಿಂಗಳಿಂದ ಕೆಲಸ ಮಾಡುತ್ತಿದ್ದ. ಡೆಲಿವರಿ ಮಾಡಲು ಮನೆಗೆ ಹೋದಾಗ ಅಕ್ಕ-ಪಕ್ಕದ ಮನೆಗಳ ಮಾಲಿಕರು ಕೀಯನ್ನು ಯಾವ ಜಾಗದಲ್ಲಿ ಇಡುತ್ತಾರೆ ಎಂಬುದು ತಿಳಿದುಕೊಂಡಿದ್ದ. ಬಳಿಕ ಯಾರು ಇಲ್ಲದ ವೇಳೆ ಆ ಮನೆಯ ಬೀಗ ತೆರೆದು ಚಿನ್ನಾಭರಣ ದೋಚಿ ಪರಾರಿಯಾಗುತ್ತಿದ್ದ ಎಂದು ಪೊಲೀಸರು ಹೇಳಿದರು.

ಕಳ್ಳತನ ಆಗಿರುವುದು ಮಾಲಿಕರಿಗೇ ಗೊತ್ತಿಲ್ಲ!:

ಅಚ್ಚರಿಯ ವಿಚಾರವೆಂದರೆ, ಆರೋಪಿಯ ವಿಚಾರಣೆಯಲ್ಲಿ ವೈಟ್‌ಫೀಲ್ಡ್‌ ಠಾಣೆ ವ್ಯಾಪ್ತಿಯಲ್ಲೇ 5 ಮನೆಗಳ ಕಳ್ಳತನದ ವಿಚಾರ ಬಾಯಿಬಿಟ್ಟಿದ್ದಾನೆ. ಆದರೆ, ಈ ವಿಚಾರ ಮನೆ ಮಾಲಿಕರಿಗೆ ಗೊತ್ತಿಲ್ಲ. ಆರೋಪಿ ವಿಚಾರಣೆ ವೇಳೆ ನೀಡಿದ ಮಾಹಿತಿ ಆಧರಿಸಿ ಮನೆ ಮಾಲಿಕರಿಗೆ ವಿಷಯ ತಿಳಿಸಿದ್ದಾರೆ. ಬಳಿಕ ಮನೆಯ ಬೀರು, ಕಬೋರ್ಡ್‌ ಪರಿಶೀಲಿಸಿದಾಗ ಕಳವು ಗೊತ್ತಾಗಿದೆ. ಈ ಸಂಬಂಧ ಮನೆ ಮಾಲಿಕರಿಂದ ದೂರು ಪಡೆದು ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಆರೋಪಿ ಮೋಜಿನ ಜೀವನಕ್ಕಾಗಿ ಕಳವು ಕೃತ್ಯ ಎಸಗುತ್ತಿದ್ದ ಎಂಬುದು ಗೊತ್ತಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದರು.