ಬೇಲಿಕೇರಿಯಲ್ಲಿ ಕಡಲ್ಕೊರೆತ ಮುಂದುವರಿಕೆ

ಕುಂದಾಪುರ: ಗಂಗೊಳ್ಳಿ  ಪರಿಸರದಲ್ಲಿ ಕಡಲ್ಕೊರೆತ  ಮುಂದುವರಿದಿದೆ. ಈ ವ್ಯಾಪ್ತಿಯ ಬೇಲಿಕೇರಿ, ಸಾಂತಯ್ಯನ ಕೇರಿ, ಬ್ಯಾಲಿ ಕೊಡೇರಿ , ಖಾರ್ವಿಕೇರಿ ಪ್ರದೇಶದಲ್ಲಿ  ಅಪಾಯದಲ್ಲಿರುವ ಸುಮಾರು 25 ಮನೆಗಳನ್ನು ಗುರುತಿಸಲಾಗಿದೆ.  ಈ ಭಾಗದ ತೆಂಗಿನ ಮರಗಳು, ಬೃಹತ್‌ ಗಾತ್ರದ ಮರಗಳು ಸಮುದ್ರ ಪಾಲಾಗಿದ್ದು  ಕಡಲ್ಕೊರೆತ ಹೀಗೆ ಮುಂದುವರಿದಲ್ಲಿ   ಮನೆಗಳಿಗೂ ಅಪಾಯವಿದೆ.

ಕಲ್ಲುಗಳು ಸಮುದ್ರ ಪಾಲು
ಬೇಲಿಕೇರಿ ಪ್ರದೇಶದಲ್ಲಿ  ನಿರ್ಮಿಸಲಾಗಿ ರುವ ತಾತ್ಕಾಲಿಕ ತಡೆಗೋಡೆ  ಅಪಾಯಕ್ಕೆ ಸಿಲುಕಿದೆ. ಸಮುದ್ರದ ಅಬ್ಬರಕ್ಕೆ , ಅಲೆಗಳ ಹೊಡೆತಕ್ಕೆ  ತಡೆಗೋಡೆ  ಕುಸಿಯುತ್ತಿದ್ದು, ಕಲ್ಲುಗಳು ಸಮುದ್ರ ಪಾಲಾಗುತ್ತಿವೆ.

ತಡೆಗೋಡೆ ರಚನೆಗೆ ಸೂಚನೆ 
ಬೇಲಿಕೇರಿ ಪ್ರದೇಶದಲ್ಲಿ ತಾತ್ಕಾಲಿಕ ತಡೆಗೋಡೆ ಸಮುದ್ರದ ಅಬ್ಬರಕ್ಕೆ ಕುಸಿಯುತ್ತಿದ್ದು ಈ ಪ್ರದೇಶದಲ್ಲಿ ಶಾಶ್ವತ ತಡೆಗೋಡೆ ರಚನೆ ಮಾಡುವ ಬಗ್ಗೆ ಈಗಾಗಲೇ ಟೆಂಡರ್‌ ಕರೆಯಲಾಗಿದ್ದು ಕಾಮಗಾರಿ  ನಡೆಯಲಿದೆ. 

ಇದಕ್ಕೂ ಮುನ್ನ  ಅಪಾಯದ ಸೂಚನೆ ಇರುವ ಪ್ರದೇಶದಲ್ಲಿ  ತಾತ್ಕಾಲಿಕ ತಡೆಗೋಡೆಯನ್ನು ರಚಿಸುವಂತೆ ಅಧಿಕಾರಿಗಳಿಗೆ ಸೂಚಿಸಲಾಗಿದೆ ಎಂದು ಸ್ಥಳಕ್ಕೆ ಭೇಟಿ ನೀಡಿದ ಶಾಸಕ ಕೆ. ಗೋಪಾಲ ಪೂಜಾರಿ ತಿಳಿಸಿದ್ದಾರೆ.

ಚಿತ್ರ: ಸುರಭಿ ಗಂಗೊಳ್ಳಿ