ಬಿಎಸ್‌ವೈ ವಿರುದ್ಧ ಹೊತ್ತಿದ್ದ ಹರಕೆ ಫಲಿಸಿದೆ: ಬೇಳೂರು

ಶಿವಮೊಗ್ಗ: ನನಗೆ ಮೋಸ ಮಾಡಿದ ಬಿ.ಎಸ್‌.ಯಡಿಯೂರಪ್ಪಗೆ ಅಧಿಕಾರ ಸಿಗಬಾರದು ಎಂದು ನನ್ನ ಮನೆದೇವರಾದ ಹುಚ್ಚರಾಯಸ್ವಾಮಿಗೆ ಹರಕೆ ಹೊತ್ತಿದ್ದು, ಕೊನೆಗೂ ಫಲಿಸಿದೆ ಎಂದು ಮಾಜಿ ಶಾಸಕ ಬೇಳೂರು ಗೋಪಾಲಕೃಷ್ಣ ಹೇಳಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ನನಗೆ ಅಧಿಕಾರ ಸಿಗಬಾರದು ಎಂದು ಯಡಿಯೂರಪ್ಪ ವಂಚನೆ ಮಾಡಿದರು. ಆಗಲೇ ಯಡಿಯೂರಪ್ಪನವರಿಗೂ ಅಧಿಕಾರ ದಕ್ಕಬಾರದು ಎಂದು ಹರಕೆ ಹೊತ್ತೆ. ನನ್ನ ಹರಕೆ ಈಡೇರಿದೆ. ಬಿಎಸ್‌ವೈ ಅಧಿಕಾರದಿಂದ ವಂಚಿತರಾಗಿದ್ದಾರೆ ಎಂದರು.

ಈಗಾಗಲೇ ಬಿಜೆಪಿಯ 10ಕ್ಕೂ ಹೆಚ್ಚು ಶಾಸಕರು ಕಾಂಗ್ರೆಸ್‌ ಸಂಪರ್ಕದಲ್ಲಿದ್ದಾರೆ. ಅದರಲ್ಲಿ ಮೂರ್‍ನಾಲ್ಕು ಮಂದಿ ನನ್ನ ಸಂಪರ್ಕದಲ್ಲಿದ್ದಾರೆ. ಅವರು ಯಾರೆಂಬುದನ್ನು ಮುಂದಿನ ದಿನದಲ್ಲಿ ತಿಳಿಸುವೆ ಎಂದು ಇದೇ ವೇಳೆ ಹೊಸ ಬಾಂಬ್‌ ಸಿಡಿಸಿದರು.