ವನಿತಾ ಟಿ20: ಥಾಯ್ಲೆಂಡ್‌ ಸತತ ಗೆಲುವಿನ ದಾಖಲೆ

ಬ್ಯಾಂಕಾಕ್‌: ಥಾಯ್ಲೆಂಡ್‌ ತಂಡ ವನಿತಾ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಸತತ 17 ಗೆಲುವು ಸಾಧಿಸಿ ನೂತನ ವಿಶ್ವದಾಖಲೆ ಸ್ಥಾಪಿಸಿದೆ. ಆಸ್ಟ್ರೇಲಿಯದ ಸತತ 16 ಗೆಲುವಿನ ದಾಖಲೆ ಮುರಿದಿದೆ. ಚತುಷ್ಕೋನ ಕ್ರಿಕೆಟ್ ಕೂಟದಲ್ಲಿ ನೆದರ್ಲೆಂಡ್ಸ್‌ಗೆ 8 ವಿಕೆಟ್‌ಗಳ ಸೋಲುಣಿಸುವ ಮೂಲಕ ಥಾಯ್ಲೆಂಡ್‌ ಈ ದಾಖಲೆ ಬರೆಯಿತು.

ಥಾಯ್ಲೆಂಡ್‌ 2018ರ ಜುಲೈ ತಿಂಗಳಲ್ಲಿ ಗೆಲುವಿನ ಓಟ ಆರಂಭಿಸಿತ್ತು. ಅಂದು ಯುಎಇಯನ್ನು ಸೋಲಿಸಿದ ಥಾಯ್ಲೆಂಡ್‌, ಅನಂತರ ಉಗಾಂಡ, ಮ್ಯಾನ್ಮಾರ್‌, ಹಾಂಕಾಂಗ್‌, ಇಂಡೋನೇಶ್ಯ, ಭೂತಾನ್‌, ನೇಪಾಲ, ಚೀನ, ಕುವೈಟ್, ಮಲೇಶ್ಯ, ಸ್ಕಾಟ್ಲೆಂಡ್‌, ಐರ್ಲೆಂಡ್‌ ತಂಡಗಳಿಗೆ ಸೋಲುಣಿಸಿತು.