Test debut ಯಶಸ್ಸು ತಂದೆಗೆ ಅರ್ಪಣೆ: ಆಕಾಶ್‌ದೀಪ್‌

ರಾಂಚಿ: ಟೆಸ್ಟ್‌ಗೆ ಪದಾರ್ಪಣೆಗೈದ ಪಂದ್ಯದಲ್ಲಿಯೇ ಮೂರು ವಿಕೆಟ್‌ ಕಿತ್ತ ಸಾಧನೆಯನ್ನು ವೆಗಿ ಆಕಾಶ್‌ದೀಪ್‌ ಅವರು ತನ್ನ ತಂದೆಯವರಿಗೆ ಅರ್ಪಿಸಿದ್ದಾರೆ. ಜೀವನದಲ್ಲಿ ಏನಾದರೂ ಆಗಬೇಕೆಂಬ ತಂದೆಯವರ ಕನಸು ಪೂರೈಸಿದ ಖುಷಿ ಇವತ್ತು ನನಗಿದೆ ಎಂದವರು ಪ್ರತಿಕ್ರಿಯೆ ನೀಡಿದ್ದಾರೆ.

ಆಕಾಶ್‌ದೀಪ್‌ ಅವರ ತಂದೆ ರಾಮ್‌ಜಿ ಸಿಂಗ್‌ ಪ್ಯಾರಾಲಿಸಿಸ್‌ನಿಂದ ಮೃತಪಟ್ಟಿದ್ದರು. ಇದಾಗಿ 6 ತಿಂಗಳಲ್ಲಿ ಅವರು ಹಿರಿಯ ಸಹೋದರ ಕೂಡ ಮೃತಪಟ್ಟಿದ್ದರು. ವರ್ಷದೊಳಗಾಗಿ ತಂದೆ ಮತ್ತು ಸಹೋದರನನ್ನು ಕಳೆದುಕೊಂಡ ಬಳಿಕ ಜೀವನದಲ್ಲಿ ಏನಾದರೂ ಸಾಧಿಸಬೇಕೆಂದು ಹಠತೊಟ್ಟಿದ್ದೆ. ಅದಕ್ಕಾಗಿ ಕ್ರಿಕೆಟ್‌ ಆಡಲು ಆರಂಭಿಸಿದೆ. ಗೆಲ್ಲುವುದೇ ನನ್ನ ಯೋಚನೆಯಾಗಿತ್ತು ಎಂದವರು ತಿಳಿಸಿದರು.

ದೇಶೀಯ ಕ್ರಿಕೆಟ್‌ ಮತ್ತು ಇಂಗ್ಲೆಂಡ್‌ ಲಯನ್ಸ್‌ ವಿರುದ್ಧ ನಡೆದ ಭಾರತ “ಎ’ ತಂಡದ ಪರ ನೀಡಿದ ಅಮೋಘ ನಿರ್ವಹಣೆಯ ಆಧಾರದಲ್ಲಿ ಮುಕೇಶ್‌ ಕುಮಾರ್‌ ಬದಲಿಗೆ ತಂಡ ದಲ್ಲಿ ಸ್ಥಾನ ಪಡೆದ ಆಕಾಶದೀಪ್‌ ಶುಕ್ರವಾರ ಕೋಚ್‌ ರಾಹುಲ್‌ ದ್ರಾವಿಡ್‌ ಅವರಿಂದ ಕುಟುಂಬ ಸದಸ್ಯರ ಸಮ್ಮುಖದಲ್ಲಿ ಕ್ರಿಕೆಟ್‌ ಮೈದಾನದಲ್ಲಿ ಟೆಸ್ಟ್‌ ಕ್ಯಾಪ್‌ ಪಡೆದರು. ಈ ವೇಳೆ ಅವರು ಅಮ್ಮನನ್ನು ಆಲಂಗಿಸಿಕೊಂಡು ಭಾವುಕರಾದರು. ಸಹೋದರನ ಇಬ್ಬರು ಪುತ್ರಿಯರು ಜತೆಗಿದ್ದರು.