ನವ ದೆಹಲಿ : ತನ್ನ ಸಹೋದರಿಯನ್ನು ಹಿಂಬಾಲಿಸಿ, ಆಕೆನ್ನು ಅಸಭ್ಯವಾಗಿ ಅವಮಾನಿಸಿದ ಮೂವರು ಯುವಕರನ್ನು ವಿರೋಧಿಸಿದಕ್ಕಾಗಿ ಹುಡುಗನನ್ನು ಹಿಗ್ಗಾಮುಗ್ಗಾವಾಗಿ ಥಳಿಸಿ, ಆತನ ಹೊಟ್ಟೆಗೆ ಇರಿದ ಘಟನೆ ಆಗ್ನೇಯ ದೆಹಲಿಯ ಕಲ್ಕಾಜಿ ಎಂಬಲ್ಲಿ ನಡೆದಿದೆ.
ಕಲ್ಕಾಜಿಯ ಶಾಲೆಯೊಂದರ ಬಳಿ ಘಟನೆ ಸಂಭವಿಸಿದೆ ಎಂದು ತಿಳಿದು ಬಂದಿದ್ದು, ಗಾಯಗೊಂಡ, ಕಲ್ಕಾಜಿ ನಿವಾಸಿ 17 ವರ್ಷದ ಹುಡುಗನನ್ನು ಏಮ್ಸ್ ನ ಟ್ರಾಮಾ ಸೆಂಟರ್ ಗೆ ದಾಖಲಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
“ನಾನು ನನ್ನ ಸಹೋದರನೊಂದಿಗಿದ್ದಾಗ, ಮೂವರು ಯುವಕರು ನನ್ನನ್ನು ಹಿಂಬಾಲಿಸಿದರು ಹಾಗೂ ಅಸಭ್ಯವಾಗಿ ವರ್ತಿಸಿದ್ದಾರೆ. ನನ್ನ ಸಹೋದರ ಅದನ್ನು ವಿರೋಧಿಸಿದಾಗ, ಅವರು ನನ್ನ ಸಹೋದರನನ್ನು ಥಳಿಸುವುದಕ್ಕಾರಂಭಿಸಿದರು, ಮೂವರಲ್ಲಿ ಒಬ್ಬ ಸಹೋದರನ ಹೊಟ್ಟೆಗೆ ಇರಿದು ಘಟನೆ ನಡೆದ ಸ್ಥಳದಿಂದ ಪರಾರಿಯಾಗಿದ್ದಾರೆ” ಎಂದು ನೊಂದ ಯುವತಿ ಪೊಲೀಸರಲ್ಲಿ ಹೇಳಿಕೊಂಡಿದ್ದಾಳೆ ಎಂದು ವರದಿಯಾಗಿದೆ.
ಏಮ್ಸ್ ನಲ್ಲಿ ಯುವಕ ಚಿಕಿತ್ಸೆ ಪಡೆಯುತ್ತಿದ್ದ ಕಾರಣ ಘಟನೆಯ ಬಗ್ಗೆ ಆತನಿಂದ ಹೇಳಿಕೆಯನ್ನು ಪಡೆಯಲಾಗಿಲ್ಲ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಸದ್ಯ, ಆ ಮೂವರು ಯುವಕರ ಮೇಲೆ ಐಪಿಸಿ ಸೆಕ್ಶನ್ 307(attempt to murder), 354ಡಿ (stalking), 509(word, gesture or act intended to insult the modesty of a woman) , 34(acts done by several persons in furtherance of common intention) ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ಘಟನೆಯ ಬಗ್ಗೆ ತನಿಖೆ ಮುಂದುವರಿಸಲಾಗಿದೆ ಎಂದು ಆಗ್ನೇಯ ದೆಹಲಿಯ ಡೆಪ್ಯೂಟಿ ಕಮಿಷನರ್ ಆಫ್ ಪೊಲೀಸ್ ಆರ್ ಪಿ ಮೀನಾ ತಿಳಿಸಿದ್ದಾರೆ.
ಗೋವಿಂದಪುರಿಯ ಗಿರಿ ನಗರದ ಜೆಜೆ ಕ್ಯಾಂಪ್ ನಿವಾಸಿಗಳಾದ ಆರೋಪಿಗಳನ್ನು ಪತ್ತೆ ಹಚ್ಚಲು ಕಾರ್ಯಾಚರಣೆ ಮಾಡಲಾಗುತ್ತಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
