ತಾಲಿಬಾನ್‌ ಸಂಸ್ಥಾಪಕ ಮುಲ್ಲಾ ಒಮರ್‌ ಸಮಾಧಿ ಸ್ಥಳ ಬಹಿರಂಗ

ಕಾಬೂಲ್‌: ಅನೇಕ ವರ್ಷಗಳಿಂದ ನಿಗೂಢವಾಗಿ ಇಟ್ಟಿದ್ದ ತಾಲಿಬಾನ್‌ ಸಂಸ್ಥಾಪಕ ಮುಲ್ಲಾ ಒಮರ್‌ ಸಮಾಧಿ ಸ್ಥಳ ಮತ್ತು ಪೋಟೋ ಕುರಿತ ಮಾಹಿತಿಯನ್ನು ತಾಲಿಬಾನ್‌ ಬಹಿರಂಗಪಡಿಸಿದೆ.

2001ರಲ್ಲಿ ಅಫ್ಘಾನಿಸ್ತಾನವನ್ನು ಅಮೆರಿಕ ತನ್ನ ತೆಕ್ಕೆಗೆ ತೆಗೆದುಕೊಂಡ ನಂತರ ತಾಲಿಬಾನ್‌ ಅನ್ನು ದೇಶದಿಂದ ಹೊರಕ್ಕೆ ಹಾಕಲಾಯಿತು. ಆಗಲೇ ಒಮರ್‌ ಅನಾರೋಗ್ಯದ ಬಗ್ಗೆ ವದಂತಿಗಳು ಹಬ್ಬಿದ್ದವು. ಆದರೆ ಎರಡು ವರ್ಷಗಳ ಮೊದಲೇ ಆತ ಮೃತಪಟ್ಟಿದ್ದಾಗಿ 2015ರ ಏಪ್ರಿಲ್‌ನಲ್ಲಿ ತಾಲಿಬಾನ್‌ ಘೋಷಿಸಿತು.

“ಅಫ್ಘಾನಿಸ್ತಾನದ ಜಾಬುಲ್‌ ಪ್ರಾಂತ್ಯದ ಸುರಿ ಜಿಲ್ಲೆಯ ಒಮರ್‌ಜೊ ಸಮೀಪದಲ್ಲಿರುವ ಮುಲ್ಲಾ ಒಮರ್‌ ಸಮಾಧಿ ಸ್ಥಳಕ್ಕೆ ತಾಲಿಬಾನ್‌ ಹಿರಿಯ ನಾಯಕರು ಭೇಟಿ ನೀಡಿ ಗೌರವ ಸಲ್ಲಿಸಿದ್ದಾರೆ,’ ಎಂದು ತಾಲಿಬಾನ್‌ ವಕ್ತಾರ ಜಬೀಹುಲ್ಲಾ ಮುಜಾಹೀದ್‌ ಭಾನುವಾರ ಮಾಹಿತಿ ನೀಡಿದ್ದಾನೆ.

20 ವರ್ಷಗಳ ನಂತರ ಅಮೆರಿಕ ತನ್ನ ಸೇನೆಯನ್ನು ಹಿಂಪಡೆದ ಬಳಿಕ ಕಳೆದ ವರ್ಷ ಆಗಸ್ಟ್‌ನಲ್ಲಿ ಪುನಃ ತಾಲಿಬಾನ್‌ ಅಧಿಕಾರ ಹಿಡಿಯಿತು.