T20 World Cup; ಗಾಯಗೊಂಡಿದ್ದರೂ ಬಾಂಗ್ಲಾ ತಂಡದಲ್ಲಿ ತಸ್ಕಿನ್‌ಗೆ ಸ್ಥಾನ!

ಢಾಕಾ: ಸ್ನಾಯುಸೆಳೆತಕ್ಕೆ ಸಿಲುಕಿ ಇನ್ನೂ ಚೇತರಿಸಿಕೊಳ್ಳದ ವೇಗದ ಬೌಲರ್‌ ತಸ್ಕಿನ್‌ ಅಹ್ಮದ್‌ ಬಾಂಗ್ಲಾದೇಶ ಟಿ20 ವಿಶ್ವಕಪ್‌ ತಂಡಕ್ಕೆ ಅಚ್ಚರಿಯ ಕರೆ ಪಡೆದಿದ್ದಾರೆ. ಅಷ್ಟೇ ಅಲ್ಲ, ತಂಡದ ಉಪನಾಯಕರೂ ಆಗಿ ಆಯ್ಕೆಯಾಗಿದ್ದಾರೆ.

ಪ್ರವಾಸಿ ಜಿಂಬಾಬ್ವೆ ಎದುರಿನ ಅಂತಿಮ ಟಿ20 ಪಂದ್ಯದ ವೇಳೆ ತಸ್ಕಿನ್‌ ಈ ಸಮಸ್ಯೆಗೆ ಸಿಲುಕಿದ್ದರು. ತಂಡವನ್ನು ನಜ್ಮುಲ್‌ ಹುಸೇನ್‌ ಮುನ್ನಡೆಸಲಿದ್ದಾರೆ. ಅಷ್ಟೇನೂ ಫಾರ್ಮ್ನಲ್ಲಿಲ್ಲದ ಆರಂಭಕಾರ ಲಿಟ್ಟನ್‌ ದಾಸ್‌ ಕೂಡ ಆಯ್ಕೆಗಾರರ ಕೃಪೆಗೆ ಪಾತ್ರರಾಗಿದ್ದಾರೆ.

ಸ್ಟಾರ್‌ ಆಲ್‌ರೌಂಡರ್‌ ಶಕಿಬ್‌ ಅಲ್‌ ಹಸನ್‌ ಬಾಂಗ್ಲಾ ತಂಡದ ಅತ್ಯಂತ ಹಿರಿಯ ಆಟಗಾರನಾಗಿದ್ದಾರೆ. ಇದರೊಂದಿಗೆ 2007ರ ಚೊಚ್ಚಲ ಪಂದ್ಯಾವಳಿಯಿಂದ ಮೊದಲ್ಗೊಂಡು ಬಾಂಗ್ಲಾ ಪಾಲ್ಗೊಂಡ ಎಲ್ಲ ಟಿ20 ವಿಶ್ವಕಪ್‌ ಕೂಟಗಳಲ್ಲೂ ಆಡಿದ ಹಿರಿಮೆ ಶಕಿಬ್‌ ಅವರದ್ದಾಗಲಿದೆ.