ಸೂರ್ಯಕುಮಾರ್‌ ಯಾದವ್‌ ಐಪಿಎಲ್‌ನಿಂದ ಹೊರಕ್ಕೆ

ಮುಂಬಯಿ: ಮುಂಬೈ ಇಂಡಿಯನ್ಸ್‌ ತಂಡದ ಪ್ರಮುಖ ಬ್ಯಾಟರ್‌ ಸೂರ್ಯಕುಮಾರ್‌ ಯಾದವ್‌ ಎಡ ಮೊಣಕೈ ಸ್ನಾಯು ಸೆಳೆತದಿಂದಾಗಿ ಐಪಿಎಲ್‌ನಿಂದ ಹೊರಬಿದ್ದರು. ಮೇ 6ರ ಗುಜರಾತ್‌ ಎದುರಿನ ಪಂದ್ಯದ ವೇಳೆ ಯಾದವ್‌ ಈ ಸಮಸ್ಯೆಗೆ ಸಿಲುಕಿದ್ದರು ಎಂಬುದಾಗಿ ಐಪಿಎಲ್‌ ತನ್ನ ಪ್ರಕಟನೆಯಲ್ಲಿ ತಿಳಿಸಿದೆ.

ಸೂರ್ಯಕುಮಾರ್‌ ಯಾದವ್‌ ಮೊದಲೆರಡು ಪಂದ್ಯಗಳ ವೇಳೆಯೂ ಮುಂಬೈ ತಂಡದಿಂದ ಹೊರಗುಳಿದಿದ್ದರು. ಆಗ ಬೆಂಗಳೂರು ಎನ್‌ಸಿಎಯಲ್ಲಿ ಪುನಶ್ಚೇತನ ಪ್ರಕ್ರಿಯೆಯಲ್ಲಿ ತೊಡಗಿದ್ದರು. ಪ್ರವಾಸಿ ವೆಸ್ಟ್‌ ಇಂಡೀಸ್‌ ವಿರುದ್ಧ ಫೆಬ್ರವರಿಯಲ್ಲಿ ನಡೆದ ಅಂತಿಮ ಟಿ20 ಪಂದ್ಯದ ವೇಳೆದ ಫೀಲ್ಡಿಂಗ್‌ ನಡೆಸುವಾಗ ಅವರು ಗಾಯಾಳಾಗಿದ್ದರು.

ಸೋಮವಾರದ ಐಪಿಎಲ್‌ ಪಂದ್ಯಕ್ಕಾಗಿ ಸೂರ್ಯಕುಮಾರ್‌ ಯಾದವ್‌ ಸ್ಥಾನದಲ್ಲಿ ರಮಣದೀಪ್‌ ಸಿಂಗ್‌ ಕಾಣಿಸಿಕೊಂಡರು.

ಕೆಕೆಆರ್‌ 5 ಬದಲಾವಣೆ
ಕೆಕೆಆರ್‌ ಬರೋಬ್ಬರಿ 5 ಬದಲಾವಣೆಗಳೊಂದಿಗೆ ಕಣಕ್ಕಿಳಿಯಿತು. ಅಜಿಂಕ್ಯ ರಹಾನೆ, ವೆಂಕಟೇಶ್‌ ಅಯ್ಯರ್‌, ಪ್ಯಾಟ್‌ ಕಮಿನ್ಸ್‌, ಶೆಲ್ಡನ್‌ ಜಾಕ್ಸನ್‌, ವರುಣ್‌ ಚಕ್ರವರ್ತಿ ಹನ್ನೊಂದರ ಬಳಗದಲ್ಲಿ ಅವಕಾಶ ಪಡೆದರು.