ಅಚ್ಚರಿ ತಂದ ಪರಂ ಖಾನಾಪುರ ಭೇಟಿ

ಖಾನಾಪುರ: ಖಾಸಗಿ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲು ಹಠಾತ್ತನೇ ಪಟ್ಟಣಕ್ಕೆ ಆಗಮಿಸಿದ ಉಪಮುಖ್ಯಮಂತ್ರಿ ಜಿ. ಪರಮೇಶ್ವರ್‌ ಭೇಟಿ ಚರ್ಚೆಗೆ ಕಾರಣವಾಯಿತು. ಪಟ್ಟಣದಲ್ಲಿರುವ ಜ್ಯೋತಿಷ್ಯ ಶಾಸ್ತ್ರಿಗಳ ಮಕ್ಕಳ ಮದುವೆಗೆ ಪರಮೇಶ್ವರ್‌ ಕುಟುಂಬ ಸಮೇತ ಆಗಮಿಸಿ ರಾಜಕೀಯ ವಲಯದಲ್ಲಿ ಅಚ್ಚರಿಗೆ ಕಾರಣವಾದರು.

ಕಾಂಗ್ರೆಸ್‌ ಶಾಸಕ ರಮೇಶ ಜಾರಕಿಹೊಳಿ ರಾಜೀನಾಮೆ ನೀಡಬಹುದಾದ ಹಿನ್ನೆಲೆಯಲ್ಲಿ ಮುಖ್ಯಮಂತ್ರಿ ಸ್ಥಾನ ಪರಮೇಶ್ವರ್‌ ಅವರಿಗೆ ಒಲಿದು ಬರಲಿದೆ ಎನ್ನುವ ಊಹಾಪೋಹ ಹರಿದಾಡುತ್ತಿದ್ದು, ಅದಕ್ಕಾಗಿ ಇಲ್ಲಿ ಬರುತ್ತಿರಬಹುದು ಎನ್ನುವ ಚರ್ಚೆ ಕೂಡ ನಡೆಯಿತು. ಈ ಸಂದರ್ಭದಲ್ಲಿ ಶಾಸಕಿ ಡಾ. ಅಂಜಲಿ ನಿಂಬಾಳಕರ ಮತ್ತು ರಫೀಕ ಖಾನಾಪುರಿ ನಿವಾಸಕ್ಕೆ ಭೇಟಿ ನೀಡಿದರು.

ಕಳೆದ ವಿಧಾನಭಾ ಚುನಾವಣೆ ಸಂದರ್ಭದಲ್ಲಿ ಚುನಾವಣಾ ಪ್ರಚಾರಕ್ಕೆ ಆಗಮಿಸಿದ್ದ ಪರಮೇಶ್ವರ್‌ ಇದೇ ಶಾಸ್ತ್ರಿಯವರ ಮನೆಗೆ ತೆರಳಿ ತಮ್ಮ ರಾಜಕೀಯ ಭವಿಷ್ಯ ಕುರಿತು ಕೇಳಿ ತಿಳಿದು ಕೊಂಡಿದ್ದರು. ಶಾಸ್ತ್ರಿಯವರ ಭವಿಷ್ಯದ ಮೇಲೆ ಅಪಾರ ನಂಬಿಕೆ ಇಟ್ಟಿರುವ ಉಪಮುಖ್ಯಮಂತ್ರಿ ಅವರ ಮಕ್ಕಳ ಮದುವೆಗೆ ಹಾಜರಾಗಿದ್ದು ರಾಜಕೀಯ ವಲಯದಲ್ಲಿ ಅಚ್ಚರಿಗೆ ಕಾರಣವಾಗಿದೆ.