ಸುಪ್ರೀಂಗೆ ನವ ನ್ಯಾಯಮೂರ್ತಿಗಳು

ಹೊಸದಿಲ್ಲಿ: ಸುಪ್ರೀಂ ಕೋರ್ಟ್‌ನ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ ಮೂವರು ಮಹಿಳಾ ನ್ಯಾಯ ಮೂರ್ತಿಗಳು ಸೇರಿದಂತೆ ಒಟ್ಟು ಒಂಬತ್ತು ಮಂದಿ ಮಂಗಳವಾರ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ.

ಮುಖ್ಯ ನ್ಯಾಯಮೂರ್ತಿ ಎನ್‌.ವಿ.ರಮಣ  ಪದೋನ್ನತಿ ಪಡೆದ ನ್ಯಾಯಮೂರ್ತಿಗಳಿಗೆ ಪ್ರಮಾಣ ವಚನ ಬೋಧಿಸಿದ್ದಾರೆ. ಇದರೊಂದಿಗೆ ಒಟ್ಟು 34 ನ್ಯಾಯಮೂರ್ತಿಗಳ ಹುದ್ದೆಗಳ ಪೈಕಿ 33 ಭರ್ತಿಯಾದಂತಾಗಿದೆ.

ಕರ್ನಾಟಕದ ಮುಖ್ಯ ನ್ಯಾಯಮೂರ್ತಿಯಾಗಿದ್ದ ನ್ಯಾ| ಅಭಯ ಶ್ರೀನಿವಾಸ್‌ ಓಕಾ, ಕರ್ನಾಟಕ ಹೈಕೋರ್ಟ್‌ನ ನ್ಯಾ| ಬಿ.ವಿ.ನಾಗರತ್ನ,  ನ್ಯಾ| ವಿಕ್ರಮ್‌ ನಾಥ್‌, ನ್ಯಾ| ಜಿತೇಂದ್ರ ಕುಮಾರ್‌ ಮಹೇಶ್ವರಿ, ನ್ಯಾ|ಹಿಮಾ ಕೋಹ್ಲಿ, ನ್ಯಾ| ಸಿ.ಟಿ.ರವಿ ಕುಮಾರ್‌, ನ್ಯಾ| ಎಂ.ಎಂ.ಸುಂದರೇಶ್‌, ನ್ಯಾ| ಬೇಲಾ ಎಂ.ತ್ರಿವೇದಿ, ವಕೀಲರ ವಿಭಾಗದಿಂದ ಮಾಜಿ ಹೆಚ್ಚುವರಿ ಸಾಲಿಸಿಟರ್‌ ಜನರಲ್‌ ಪಿ.ಎಸ್‌.ನರಸಿಂಹ ಪ್ರಮಾಣ ವಚನ ಸ್ವೀಕರಿಸಿದ ನ್ಯಾಯ ಮೂರ್ತಿಗಳು.  ನೂತನ ನ್ಯಾಯಮೂರ್ತಿಗಳ ಪೈಕಿ ನ್ಯಾ| ವಿಕ್ರಮ್‌ ನಾಥ್‌, ನ್ಯಾ| ಬಿ.ವಿ.ನಾಗರತ್ನ, ನ್ಯಾ| ಪಿ.ಎಸ್‌.ನರಸಿಂಹ ಸೇವಾ ಜ್ಯೇಷ್ಠತೆ ಆಧಾರದಲ್ಲಿ ಮುಖ್ಯ ನ್ಯಾಯಮೂರ್ತಿಗಳಾಗಲಿದ್ದಾರೆ. ಈ ಪೈಕಿ ನ್ಯಾ| ಬಿ.ವಿ.ನಾಗರತ್ನ ಅವರು 2027ರಲ್ಲಿ ದೇಶದ ಮೊದಲ ಮಹಿಳಾ ಮುಖ್ಯ ನ್ಯಾಯಮೂರ್ತಿಗಳಾಗಲಿದ್ದಾರೆ.