Liquor Sale; ರಾಜ್ಯದಲ್ಲಿ ಒಂದೇ ದಿನ 408 ಕೋಟಿ ರೂ ಮೌಲ್ಯದ ಮದ್ಯ ಮಾರಾಟ ದಾಖಲೆ

ಬೆಂಗಳೂರು: ಶನಿವಾರ ರಾಜ್ಯವ್ಯಾಪಿ ಸುಮಾರು 408.53 ಕೋಟಿ ರೂ. ಮೌಲ್ಯದಷ್ಟು ಮದ್ಯ ಮತ್ತು ಬಿಯರ್‌ ಮಾರಾಟವಾಗಿದ್ದು ಇದೊಂದು ದಾಖಲೆಯ ಮದ್ಯ ಮಾರಾಟವಾಗಿದೆ ಎಂದು ಫೆಡರೇಶನ್‌ ಆಫ್ ವೈನ್‌ ಮರ್ಚಂಟ್ಸ್‌ ಅಸೋಸಿಯೇಶನ್‌ ಕರ್ನಾಟಕ ಪ್ರಧಾನ ಕಾರ್ಯದರ್ಶಿ ಬಿ.ಗೋವಿಂದರಾಜು ಹೇಳಿದ್ದಾರೆ.

ಈ ಬಗ್ಗೆ ಮಾಹಿತಿ ನೀಡಿರುವ ಅವರು, ಪ್ರತಿನಿತ್ಯ 100 ಕೋಟಿ ರೂ. ವಹಿವಾಟು ನಡೆಯುತ್ತದೆ. ಆದರೆ ಮಾಜಿ ಪ್ರಧಾನಿ ಮನಮೋಹನ ಸಿಂಗ್‌ ನಿಧನದ ಹಿನ್ನೆಲೆಯಲ್ಲಿ ಡಿ.27ರಂದು ರಜಾ ಘೋಷಣೆಯಾಗಿದ್ದು ಮದ್ಯ ಖರೀದಿ ಸಾಧ್ಯವಾಗಿರಲಿಲ್ಲ. ಆದರೆ ಡಿ.28 ರಂದು ರಾಜ್ಯ ಮದ್ಯ ಮಾರಾಟಗಾರರ ಒಕ್ಕೂಟದ ವಿನಂತಿ ಮೇರೆಗೆ ಡಿಪೋಗಳು ತೆರೆದಿದ್ದು, ಕ್ರೆಡಿಟ್‌ ಫೆಸಿಲಿಟಿ ಅನ್ನು ಕೂಡ ಕೆಎಸ್‌ಬಿಸಿಎಲ್‌ ಅವರು ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಶನಿವಾರ 408.53 ಕೋಟಿ ರೂ. ಮದ್ಯ ಮತ್ತು ಬಿಯರ್‌ ಮಾರಾಟವಾಗಿದೆ ಎಂದು ತಿಳಿಸಿದ್ದಾರೆ.

ಸುಮಾರು 150 ಕೋಟಿಗೂ ಅಧಿಕ ಕ್ರೆಡಿಟ್‌ ಫೆಸಿಲಿಟಿ (ಅಬಕಾರಿ ಇಲಾಖೆ ಸನ್ನದುದಾರರಿಗೆ ಸಾಲ ಕೊಡುವುದು) ಯನ್ನು ಸನ್ನದುದಾರರು ಪಡೆದಿದ್ದಾರೆ. ರಜೆ ದಿನವೂ ಕ್ರೆಡಿಟ್‌ ಫೆಸಿಲಿಟಿ ನೀಡಿದ ಅಬಕಾರಿ ಇಲಾಖೆ ಮತ್ತು ಕೆಎಸ್‌ಬಿಸಿಎಲ್‌ ಅಧಿಕಾರಿಗಳಿಗೆ ಸಂಘದವತಿಯಿಂದ ಕೃತಜ್ಞತೆ ಸಲ್ಲಿಸುವುದಾಗಿ ತಿಳಿಸಿದ್ದಾರೆ.

6,22,062 ವಿಸ್ಕಿ ಸೇರಿ ಮತ್ತಿತರ ಮದ್ಯ ಪೆಟ್ಟಿಗೆ, 4,04,998 ಪೆಟ್ಟಿಗೆ ಬಿಯರ್‌ ಮಾರಾಟವಾಗಿದೆ. ಒಟ್ಟು 10,27,060 ಪೆಟ್ಟಿಗೆ ಮದ್ಯ ಮತ್ತು ಬಿಯರ್‌ ಮಾರಾಟವಾಗಿದೆ. ವಿಸ್ಕಿ ಸೇರಿ ಮತ್ತಿತರರ ಮದ್ಯಪಟ್ಟಿಗೆಗಳ ಮಾರಾಟದ ಮೊತ್ತ 327.50 ಕೋಟಿ ರೂ.ಆಗಿದೆ. 80.58 ಕೋಟಿ ರೂ.ಮೌಲ್ಯದ ಬಿಯರ್‌ ಮಾರಾಟವಾಗಿದೆ. ಇದು ರಾಜ್ಯದಲ್ಲಿ ಒಂದೇ ದಿನದಲ್ಲಿ ಅದಂತಹ ದಾಖಲೆ ಮಾರಾಟವಾಗಿದೆ.