ಎಸೆಸೆಲ್ಸಿ ಫ‌ಲಿತಾಂಶ : ದಕ್ಷಿಣ ಕನ್ನಡ ಜಿಲ್ಲೆಗೆ “ಎ’ಗ್ರೇಡ್‌

ಮಹಾನಗರ: ಕೊರೊನಾ ಮುನ್ನೆಚ್ಚರಿಕೆಯನ್ನು ಪಾಲಿಸಿಕೊಂಡು ಜು. 19, 22ರಂದು ನಡೆದ ಎಸೆಸೆಲ್ಸಿ ಪರೀಕ್ಷೆಯ ಫಲಿತಾಂಶ ಸೋಮವಾರ ಪ್ರಕಟವಾಗಿದೆ. ದ.ಕ. ಜಿಲ್ಲೆ “ಎ’ ಗ್ರೇಡ್‌ ಪಡೆದುಕೊಂಡಿದೆ.

ಮಾರ್ಚ್‌ ಅಂತ್ಯದಲ್ಲೇ ಮುಗಿಯಬೇಕಾದ ಪರೀಕ್ಷೆ ಲಾಕ್‌ಡೌನ್‌ನಿಂದಾಗಿ ಜುಲೈ ಮಧ್ಯ ಭಾಗಕ್ಕೆ ಮುಂದೂಡಲ್ಪಟ್ಟಿತ್ತು. ದ್ವಿತೀಯ ಪಿಯು ಪರೀಕ್ಷೆ ನಡೆಸದ ಕಾರಣದಿಂದ ಎಸೆಸೆಲ್ಸಿ ಕೂಡ ಪರೀಕ್ಷೆ ಬೇಡ ಎಂಬ ಬಗ್ಗೆ ಚರ್ಚೆ ನಡೆದಿತ್ತು. ಆದರೆ ವಿದ್ಯಾರ್ಥಿಗಳ ಹಿತದೃಷ್ಟಿಯಿಂದ ಎಸೆಸೆಲ್ಸಿ ಪರೀಕ್ಷೆ ನಡೆಯಲೇಬೇಕು ಎಂಬ ಶಿಕ್ಷಣ ಇಲಾಖೆ ಒತ್ತಾಸೆಯಿಂದಾಗಿ ಕೇವಲ ಎರಡೇ ದಿನದಲ್ಲಿ ಕೊರೊನಾ ನಿಯಮಾವಳಿ ಪಾಲಿಸಿಕೊಂಡು ಯಶಸ್ವಿಯಾಗಿ ಪರೀಕ್ಷೆ ನಡೆಸಲಾಗಿತ್ತು.

2018-19ರಲ್ಲಿ ದ.ಕ. ಜಿಲ್ಲೆ ಶೇ.86.85 ಫಲಿತಾಂಶದೊಂದಿಗೆ  7ನೇ ಸ್ಥಾನದಲ್ಲಿತ್ತು. ಆದರೆ ಕಳೆದ ಬಾರಿ ಕೊರೊನಾ ಕಾರಣದಿಂದ ಶೇಕಡಾವಾರು ಫಲಿತಾಂಶದ ಬದಲು ಗ್ರೇಡ್‌ ನೀಡಲಾಗಿತ್ತು. ಹೀಗಾಗಿ ಕಳೆದ ಬಾರಿ ಜಿಲ್ಲೆಗೆ “ಬಿ’ ಗ್ರೇಡ್‌ ಲಭಿಸಿದ್ದರೆ ಈ ಬಾರಿ “ಎ’ ಗ್ರೇಡ್‌ ದೊರಕಿದೆ.

ಮೊಬೈಲ್‌ನಲ್ಲೇ ಫಲಿತಾಂಶ:

ಎಸೆಸೆಲ್ಸಿ ಫಲಿತಾಂಶ ಸೋಮವಾರ ಸಂಜೆ ಪ್ರಕಟವಾಗುತ್ತಿದ್ದಂತೆ ಮಂಗಳೂರು ನಗರ ಸಹಿತ ಜಿಲ್ಲೆಯ ಬಹುತೇಕ ವಿದ್ಯಾರ್ಥಿಗಳು ಮನೆಯಲ್ಲಿರುವ ಲ್ಯಾಪ್‌ಟಾಪ್‌, ಕಂಪ್ಯೂಟರ್‌ಗಳ ಮುಖಾಂತರವೇ ಫಲಿತಾಂಶ ಪಡೆದುಕೊಂಡರು. ಇನ್ನು ಕೆಲವು ಮಂದಿ ಸ್ನೇಹಿತರು, ಸಂಬಂಧಿಕರಿಗೆ ಪರೀಕ್ಷಾ ಸಂಖ್ಯೆಯನ್ನು ನೀಡಿ ಫಲಿತಾಂಶ ಪಡೆದುಕೊಂಡರು. ಕೊರೊನಾ ಕಾರಣದಿಂದ ವಿದ್ಯಾರ್ಥಿಗಳಿಗೆ ಶಾಲೆಗಳಿಗೆ ಆಗಮಿಸಲು ಸಾಧ್ಯವಾಗದ ಕಾರಣ ಈ ಬಾರಿ ವಿದ್ಯಾರ್ಥಿಗಳ ಹೆತ್ತವರ ಮೊಬೈಲ್‌ಗೇ ಫಲಿತಾಂಶ ಕಳುಹಿಸುವ ವ್ಯವಸ್ಥೆಯನ್ನು ಇಲಾಖೆ ಮಾಡಿತ್ತು. ಹೀಗಾಗಿ ವಿದ್ಯಾರ್ಥಿಗಳಿಗೆ ಫಲಿತಾಂಶ ವೀಕ್ಷಿಸಲು ಯಾವುದೇ ತೊಡಕಾಗಲಿಲ್ಲ.

ಶುಭಾಶಯ ವಿನಿಮಯ :

ಫಲಿತಾಂಶ ಬಂದ ಬಳಿಕ ವಿದ್ಯಾರ್ಥಿಗಳು ಸ್ನೇಹಿತರೊಂದಿಗೆ ಪರಸ್ಪರ ಶುಭಾಶಯ ವಿನಿಮಯ ಮಾಡಿಕೊಂಡರು. ಮನೆಮಂದಿ ಸಿಹಿ ಹಂಚಿ ಸಂಭ್ರಮಿಸಿದರು. ಈ ಬಾರಿ ಹೊಸ ಬಗೆಯ ಪರೀಕ್ಷೆ ನಡೆದ ಕಾರಣದಿಂದ ವಿದ್ಯಾರ್ಥಿಗಳು ಹಾಗೂ ಹೆತ್ತವರಿಗೆ ಫಲಿತಾಂಶದ ಬಗ್ಗೆ ಬಹು ನಿರೀಕ್ಷೆ ಹಾಗೂ ಕುತೂಹಲವಿತ್ತು. ಹೆತ್ತವರು ಕೂಡ ತಮ್ಮ ಮಕ್ಕಳು ಗಳಿಸಿದ ಅಂಕಕ್ಕೆ ಅನುಗುಣವಾಗಿ ಕಾಲೇಜು ಸೇರ್ಪಡೆ, ವಿಷಯ ಆಯ್ಕೆಯ ಬಗ್ಗೆ ಲೆಕ್ಕಾಚಾರ ಹಾಕಲು ಪ್ರಾರಂಭಿಸಿದ್ದಾರೆ.

ವರ್ಷಾವಾರು ಫ‌ಲಿತಾಂಶ

ವರ್ಷ  ಶೇ.      ಸ್ಥಾನ

2014-15           89.35   8

2015-16           88.12   3

2016-17           82.39   2

2017-18           85.61   4

2018-19           86.85   7

2019-20           “ಬಿ’ ಗ್ರೇಡ್‌           -

2020- 21         “ಎ’ ಗ್ರೇಡ್‌        –