ಮುಂಬಯಿ: ಮುಂಬಾ ದೇವಿ ನೆಲೆಸಿದ ಮಹಾನಗರದಲ್ಲಿ ಮಂತ್ರಾಲಯ ಶ್ರೀ ರಾಘವೇಂದ್ರ ಸ್ವಾಮಿಗಳ ಬೃಂದಾವನ ಮರು ಪ್ರತಿಷ್ಠಾಪನೆ ಹಿಂದೂ ಧರ್ಮದ ಸಾಮರಸ್ಯದ ಸಂಕೇತವಾಗಿ ಮಾರ್ಪಟ್ಟಿದ್ದು, ಅತೀವ ಸಂತೋಷ ತಂದಿದೆ. ಕಲಿಯುಗದ ಕಾಮಧೇನುವಾಗಿ ಬೃಂದಾವನದಲ್ಲಿ ನೆಲೆಸಿದರೂ ದೇಶ-ವಿದೇಶದಲ್ಲೂ ಭಕ್ತರು ಸಂಕಷ್ಟದಲ್ಲಿ ಕರೆದಾಗ ಮಗುವಿನ ಕೂಗಿಗೆ ತಾಯಿಯು ಪ್ರತಿಕ್ರಿಯಿಸುವಂತೆ ಬಂದು ಸಲಹುತ್ತಾರೆ. ದೇಶ-ವಿದೇಶಗಳಲ್ಲಿ ಸ್ಥಾಪಿಸಲ್ಪಟ್ಟ ಬೃಂದಾವನದಲ್ಲಿ ಮೂಲ ಬೃಂದಾವನದ ಮೃತ್ತಿಕವನ್ನು ವಿಶೇಷ ತೇಜೋರೋಪವಾಗಿ ಇಟ್ಟು ಪೂಜಿಸಲ್ಪಡುತ್ತದೆ. ಇದು ರಾಘವೇಂದ್ರ ಸ್ವಾಮಿಗಳು ಭಕ್ತರಿಗೆ ನೀಡುವ ಅನುಗ್ರಹವು ಹೌದು ಎಂದು ಶ್ರೀ ಮಂತ್ರಾಲಯ ಮೂಲಸಂಸ್ಥಾನದ ಪೀಠಾಧೀಪತಿ ಶ್ರೀ ಸುಭುದೇಂದ್ರ ತೀರ್ಥ ಸ್ವಾಮೀಜಿ ನುಡಿದರು.
ಮಾ. 20 ರಂದು ಮಂತ್ರಾಲಯ ಶ್ರೀ ಜೋಗೇಶ್ವರಿ ಮಠದಲ್ಲಿ ನೂತನ ಅಭಿನವ ಮಂತ್ರಾಲಯ ಪ್ರತಿಷ್ಠಾನಗೈದು ಆಶೀರ್ವಚನ ನೀಡಿದ ಅವರು, ಮುಂಬಯಿ ಮಹಾನಗರದಲ್ಲಿ 1971 ರಲ್ಲಿ ಅಂದಿನ ಪೀಠಾಧೀಪತಿಗಳಾದ ಶ್ರೀ ಸುಜಯೀಂದ್ರ ತೀರ್ಥರು ಮಹಾನಗರದ ಭಕ್ತರಿಗಾಗಿ ಬೃಂದಾವನವನ್ನು ಸ್ಥಾಪಿಸಿದರು. ಮೂಲ ಮೃತ್ತಿಕೆಯು ಮಂತ್ರಾಕ್ಷತೆಯ ಗಾತ್ರವನ್ನು ಅಂದು ಬೃಂದಾವನದಲ್ಲಿ ಅಳವಡಿಸಲಾಗಿದ್ದು, ಆನಂತರದ ಪೀಠಾಧಿಪತಿಗಳಾದ ಶ್ರೀ ಶುಶ್ಮೀಂದ್ರ, ತೀರ್ಥರು, ಶ್ರೀ ಸುಯತೀಂದ್ರ ತೀರ್ಥ ಮಹಾಸ್ವಾಮೀಜಿಗಳು ಈ ಬೃಂದಾವನಕ್ಕೆ ಆಗಮಿಸಿ ಆರಾಧನೆ ಮಾಡಿ, ಭಕ್ತರಿಗೆ ಆಶೀರ್ವಚನ ನೀಡುತ್ತಿದ್ದರು. ಮತ್ತೆ ಹಿರಿಯ ಯತಿಗಳ ಅನುಗ್ರಹದೊಂದಿಗೆ ಸ್ಥಾಪನೆಗೊಂಡ ಈ ನೂತನ ಅಭಿನವ ಮಂತ್ರಾಲಯದ ಲೋಕಾರ್ಪಣೆಗೈಯುವ ಪುಣ್ಯಕಾರ್ಯ ನನ್ನ ಪಾಲಿಗೆ ಒದಗಿ ಬಂದಿದೆ. ಇದೊಂದು ಅವಿಸ್ಮರಣೀಯ ದಿನವಾಗಿದೆ. ರಾಯರ ಭಕ್ತಿಯನ್ನು ಮಹಾರಾಷ್ಟ್ರದ ಮಹಾನಗರದಲ್ಲಿ ಭಕ್ತರಿಗೆ ಅರ್ಪಿಸುವ ಸೇವೆ ನನಗೆ ಒಲಿದು ಬಂದಿರುವುದು ದೈವಫಲ. ಈ ದೇಶದ, ಈ ರಾಜ್ಯದ, ಈ ಪ್ರದೇಶದ ಎಲ್ಲಾ ಭಕ್ತರಿಗೆ ಅಭಿನವ ಮಂತ್ರಾಲಯದ ಅನುಗ್ರಹ ದೊರೆಯಲಿ. ಈ ನೂತನ ಬೃಂದಾವನದಲ್ಲಿ ಶ್ರೀ ಜಗದ್ಗುರು, ವೆಂಕಟೇಶ್ವರ, ಮುಖ್ಯಪ್ರಾಣ, ರುದ್ರದೇವರು, ಶ್ರೀ ದುರ್ಗಾದೇವಿ ಮಂಚಾಲಮ್ಮ. ಗಣಪತಿ, ನವಗ್ರಹಗಳು ಕಲಿಯುಗದ ಕಾಮಧೇನು ಈ ಬೃಂದಾವನದಲ್ಲಿ ವಿಧಿ-ವಿಧಾನಗಳಶೊಂದಿಗೆ ಇಂದು ಪ್ರತಿಷ್ಠಾಪನೆಗೊಂಡಿದೆ ಎಂದು ಹೇಳಿದರು.
ಧಾರ್ಮಿಕ ಕಾರ್ಯಕ್ರಮವಾಗಿ ಬೆಳಗ್ಗೆ ಪೀಠಾಧಿಪತಿಗಳು ಪುರ ಪ್ರವೇಶದ ಮೂಲಕ ವಿಶೇಷ ಮೆರವಣಿಗೆಯೊಂದಿಗೆ ಬೃಂದಾವನಕ್ಕೆ ಸ್ವಾಗತಿಸಲಾಯಿತು. ಕಲಶ, ಡೋಲು, ಕೊಂಬು-ವಾದ್ಯಗಳ ಮೂಲಕ ಶ್ರೀಗಳನ್ನು ನೂತನ ಬೃಂದಾವನಕ್ಕೆ ಬರಮಾಡಿಕೊಳ್ಳಲಾಯಿತು. ಆನಂತರ ಅವರು ಅರ್ಚಕ ವೃಂದದವರ ಸಹಾಯದೊಂದಿಗೆ ಮರು ಪ್ರತಿಷ್ಠಾಪನೆಗೊಂಡ ರಾಯರ ಬೃಂದಾವನ. ವೆಂಕಟೇಶ್ವರ ವಿಗ್ರಹ, ಮುಖ್ಯಪ್ರಾಣ, ರುದ್ರ ದೇವರು, ಮಂಚಾಲಮ್ಮ ವಿಗ್ರಹಗಳಿಗೆ, ಶಂಖಕ್ಷೀರ, ತುಪ್ಪ, ಗಂಧ-ಫಲಾದಿಗಳನ್ನು ಅರ್ಪಿಸುವ ಮೂಲಕ ವಿಗ್ರಹಗಳನ್ನು ಪೂಜಿಸಿದರು. ರಾಯರ ನೂತನ ಬೃಂದಾವನಕ್ಕೆ ಮೂಲ ಮೃತ್ತಿಕೆಯನ್ನು ಸಮರ್ಪಿಸಿ ಪ್ರತಿಷ್ಠಾಪನೆಗೈದರು.
ಧಾರ್ಮಿಕ ಕಾರ್ಯಕ್ರಮದಲ್ಲಿ ಸ್ಥಳೀಯ ವಿಧಾನ ಸಭಾ ಸದಸ್ಯರು, ನಗರ ಸೇವಕರು, ಸಂಘಟಕರು ಪಾಲ್ಗೊಂಡು ಶ್ರೀಗಳು ಅನುಗ್ರಹ ಪಡೆದರು. ಮಠದ ಆಡಳಿತ ವರ್ಗದ ಪೂರ್ಣಚಂದ್ರ ವೆಂಕಟ್‌, ಪ್ರಬಂಧಕ ರಮಾಕಾಂತ್‌ ಮಾನ್ವಿ, ಅರ್ಚಕ ವೃಂದ ಹಾಗೂ ಮೂಲ ಸಂಸ್ಥಾನದ ಆಡಳಿತ ವರ್ಗದ ಸದಸ್ಯರು, ದಾನಿಗಳು, ಸಂಘಟಕರು ಪಾಲ್ಗೊಂಡು ಕಾರ್ಯಕ್ರಮದ ಯಶಸ್ಸಿಗೆ ಸಹಕರಿಸಿದರು. ಪ್ರತಿಷ್ಠಾಪನೆಯ ಆನಂತರ ಮೂಲ ರಾಮದೇವರ ಪೂಜೆಯನ್ನು ಶ್ರೀ ಸುಬುದೇಂದ್ರ ಶ್ರೀಗಳು ನೆರವೇರಿಸಿದರು. ಸಂಜೆ ಅನಂತ ಕುಲಕರ್ಣಿ ಮತ್ತು ಹುಸೈನ್‌ ಸಾಹೇಬ್‌ ಕನಕಗಿರಿ ಬಳಗದಿಂದ ಸಾಂಸ್ಕೃತಿಕ ಸಂಗೀತ ಕಾರ್ಯಕ್ರಮ ನಡೆಯಿತು. ಭಕ್ತಾದಿಗಳು ಅಧಿಕ ಸಂಖ್ಯೆಯಲ್ಲಿ ಪಾಲ್ಗೊಂಡಿದ್ದರು.
ನೂತನವಾಗಿ ನಿರ್ಮಿಸಲ್ಪಟ್ಟ ಬೃಂದಾನವು ವಿನೂತನ ಶಿಲ್ಪಕಲೆಯಿಂದ ನಿರ್ಮಿಸಲಾಗಿದ್ದು, ಭಕ್ತಾದಿಗಳ ಅನುಕೂಲಕ್ಕಾಗಿ ವಿವಿಧ ವಿಗ್ರಹ ಗಳನ್ನು ಸ್ಥಾಪಿಸಲಾಗಿದೆ. ಸನಾತನ ಧರ್ಮ, ಸಂಸ್ಕೃತಿಯನ್ನು ಉಳಿಸುವುದರ ಜೊತೆಗೆ ವಿವಿಧ ಹೋಮ, ಹವನ, ಜಪತಪಗಳು, ಆಧ್ಯಾತ್ಮಿಕ ಕಾರ್ಯಕ್ರಮಗಳು ಬೃಂದಾವನದಲ್ಲಿ ನಿರಂತರವಾಗಿ ನಡೆಯಲಿದ್ದು, ಬೃಂದಾವನದ ಪಕ್ಕದಲ್ಲಿಯೇ ನೂತನ ಕಲ್ಯಾಣ ಮಂಟಪ, ಗ್ರಂಥಾಲಯ, ಆಡಿಟೋರಿಯಂ, ಅತಿಥಿಗೃಹ, ಗೋಶಾಲೆ, ಯೋಗಕೇಂದ್ರವು ಶೀಘ್ರದಲ್ಲೆ ಎಲ್ಲಾ ರೀತಿಯ ಆಧುನಿಕ ಸೌಕರ್ಯಗಳೊಂದಿಗೆ ಭಕ್ತರಿಗೆ ಸಮರ್ಪಣೆಗೊಳ್ಳಲಿದೆ.
ಮುಸ್ಲಿಂ ಬಾಂಧವರು ಸ್ವಯಂ ಸೇವಕರಾಗಿ
ಜೋಗೇಶ್ವರಿಯಲ್ಲಿ ನೂತನವಾಗಿ ನಿರ್ಮಾಣ ಗೊಂಡಿರುವ ಅಭಿನವ ಮಂತ್ರಾಲಯವು ಮುಸ್ಲಿಂ ಬಾಹುಳ್ಯವನ್ನು ಹೊಂದಿರುವ ಸ್ಥಳದಲ್ಲಿ ಸ್ಥಾಪಿಸಲ್ಪಟ್ಟಿದ್ದು ವಿಶೇಷತೆಯಾಗಿದೆ. ಪರಿಸರದ ಮುಸ್ಲಿಂ ಬಾಂಧವರು ಸ್ವಯಂಸೇವಕರಾಗಿ ಉತ್ಸವದಲ್ಲಿ ದಿನಪೂರ್ತಿ ಕಾರ್ಯನಿರ್ವಹಿಸಿ ಎಲ್ಲರ ಪ್ರಶಂಸೆಗೆ ಪಾತ್ರರಾದರು. ಮಂದಿರದ ಸುತ್ತಮುತ್ತ ಮುಸ್ಲಿಂ ಧರ್ಮದ ನಾಯಕರು ಹಾಗೂ ನಿವಾಸಿಗಳು ಮುಖ್ಯದ್ವಾರ, ಸ್ವಾಗತ ಗೋಪುರಗಳನ್ನು ನಿರ್ಮಿಸಿ ಭಾವೈಕ್ಯತೆ ಮೆರೆದರು. ಸಂಭ್ರಮದಲ್ಲಿ ಇತರ ಧರ್ಮದವರೊಂದಿಗೆ ಮುಸ್ಲಿಂ ಸಮುದಾಯದವರ ಸಹಕಾರ ವಿಶೇಷತೆಯಾಗಿತ್ತು. ಮೂಲ ಮಂತ್ರಾಲಯದ ಸಂಸ್ಥಾನವು ಮುಸ್ಲಿಂ ರಾಜನು ಬಳುವಳಿಯಾಗಿ ನೀಡಿರುವುದನ್ನು ಇಲ್ಲಿ ನೆನಪಿಸಬಹುದು.
