ಪಾಕ್‌-ಲಂಕಾ ಪಂದ್ಯಕ್ಕೆ ಮಳೆ ಅಡ್ಡಿ

ರಾವಲ್ಪಿಂಡಿ: ಪಾಕಿಸ್ಥಾನ-ಲಂಕಾ ನಡುವಿನ ಟೆಸ್ಟ್‌ ಪಂದ್ಯದ ದ್ವಿತೀಯ ದಿನದಾಟಕ್ಕೆ ಮಳೆಯಿಂದ ತೀವ್ರ ಅಡಚಣೆಯಾಗಿದೆ. ಗುರುವಾರ ಕೇವಲ 18 ಓವರ್‌ಗಳಷ್ಟು ಆಟ ಮಾತ್ರ ಸಾಗಿದ್ದು, ಶ್ರೀಲಂಕಾ 6 ವಿಕೆಟಿಗೆ 263 ರನ್‌ ಮಾಡಿದೆ.ಮೊದಲ ದಿನವೂ ಪ್ರತಿಕೂಲ ಹವಾಮಾನದಿಂದ ಪಂದ್ಯ ಬೇಗನೇ ಕೊನೆಗೊಂಡಿತ್ತು. ಆಗ ಲಂಕಾ ಸ್ಕೋರ್‌ 5 ವಿಕೆಟಿಗೆ 255 ರನ್‌ ಆಗಿತ್ತು.

ದ್ವಿತೀಯ ದಿನದ ಮೊದಲ ಅವಧಿಯಲ್ಲಿ 7.5 ಓವರ್‌ಗಳ ಆಟ ಸಾಗಿದ ಬಳಿಕ ಭಾರೀ ಮಳೆ ಸುರಿಯಿತು. ಸುಮಾರು ಎರಡು ಮುಕ್ಕಾಲು ಗಂಟೆ ಬಳಿಕ ಪಂದ್ಯ ಆರಂಭವಾಯಿತಾದರೂ ಕೇವಲ 10 ಓವರ್‌ಗಳ ಆಟವಷ್ಟೇ ಸಾಧ್ಯವಾಯಿತು. ಈ ಅವಧಿಯಲ್ಲಿ ನಿರೋಷನ್‌ ಡಿಕ್ವೆಲ್ಲ (33) ವಿಕೆಟ್‌ ಉರುಳಿತು. 3.30ರ ವೇಳೆ ದಿನದಾಟವನ್ನು ಕೊನೆಗೊಳಿಸಲಾಯಿತು. ಆಗ ಧನಂಜಯ ಡಿ ಸಿಲ್ವ 72 ಮತ್ತು ದಿಲುÅವಾನ್‌ ಪೆರೆರ 2 ರನ್‌ ಮಾಡಿ ಆಡುತ್ತಿದ್ದರು.

ದಶಕದ ಬಳಿಕ ಪಾಕಿಸ್ಥಾನದಲ್ಲಿ ನಡೆಯುತ್ತಿರುವ ಟೆಸ್ಟ್‌ ಪಂದ್ಯ ಇದಾಗಿದ್ದರೂ ವೀಕ್ಷಕರ ಸಂಖ್ಯೆ ವಿರಳವಿತ್ತು.