PM Modi ಮುಂದೆ ಬಾಗಿದ ಸ್ಪೀಕರ್‌: ರಾಹುಲ್‌-ಬಿರ್ಲಾ ಜಟಾಪಟಿ!

ಹೊಸದಿಲ್ಲಿ: ಲೋಕಸಭೆಯ ಅತ್ಯುನ್ನತ ಹುದ್ದೆ ಯಲ್ಲಿರುವ ಸ್ಪೀಕರ್‌ ಓಂ ಬಿರ್ಲಾ ಅವರು ಪ್ರಧಾನಿ ನರೇಂದ್ರ ಮೋದಿ ಅವರ ಎದುರು ಬಾಗಿದ್ದಕ್ಕೆ ಲೋಕಸಭೆ ವಿಪಕ್ಷ ನಾಯಕ ರಾಹುಲ್‌ ಗಾಂಧಿ ಸಂಸತ್ತಿನಲ್ಲಿ ಮಾತಿನ ಚಾಟಿ ಬೀಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಓಂ ಬಿರ್ಲಾ ಮತ್ತು ರಾಹುಲ್‌ ನಡುವೆ ವಾಗ್ಯುದ್ಧ ಏರ್ಪಟ್ಟಿದೆ. ರಾಷ್ಟ್ರಪತಿಗಳ ಭಾಷಣದ ಮೇಲಿನ ವಂದನಾ ನಿರ್ಣಯ ಕುರಿತಂತೆ ಲೋಕಸಭೆಯಲ್ಲಿ ಚರ್ಚೆ ನಡೆಯುತ್ತಿರುವಂತೆಯೇ ರಾಹುಲ್‌ ಈ ವಿಚಾರ ಪ್ರಸ್ತಾವಿಸಿ “ನೀವು ಲೋಕಸಭೆ ಸ್ಪೀಕರ್‌ ಆಗಿ ಆಯ್ಕೆಯಾದಾಗ ನಿಮ್ಮನ್ನು ಅಭಿನಂದಿಸಲು ನಾನು ಮತ್ತು ಮೋದಿ ಅವರು ಬಂದಿದ್ದೆವು. ನನ್ನ ಕೈಯನ್ನು ಹಿಡಿದು ನೇರವಾಗಿ ನಿಂತು ಹಸ್ತಲಾಘವ ಮಾಡಿದ ನೀವು, ಮೋದಿ ಅವರು ಕೈ ನೀಡುತ್ತಿದ್ದಂತೆ ಬಾಗಿದ್ದೇಕೆ’ ಎಂದು ಪ್ರಶ್ನಿಸಿದ್ದಾರೆ.

ಇದಕ್ಕೆ ಉತ್ತರಿಸಿದ ಬಿರ್ಲಾ, ಹಿರಿಯರನ್ನು ಕಂಡಾಗ ಬಾಗುವುದು ನನ್ನ ಸಂಸ್ಕೃತಿ. ನಾನು ಅದನ್ನು ಪಾಲಿಸುತ್ತಾ ಬಂದಿದ್ದೇನೆ. ಹಾಗಾಗಿ ಮೋದಿ ಅವರೆದುರು ಬಾಗಿದೆ ಎಂದಿದ್ದಾೆ. ಇದಕ್ಕೆ ರಾಗಾ ಮತ್ತೆ ಪ್ರತಿಕ್ರಿಯೆ ನೀಡಿ, ನೀವು ಹೇಳಿದ್ದನ್ನು ನಾನು ಒಪ್ಪುತ್ತೇನೆ! ಆದರೆ ನೀವು ಲೋಕಸಭೆಯ ಅತ್ಯುನ್ನತ ನಾಯಕರು. ನಿಮ್ಮ ಹುದ್ದೆಗಿಂತ ದೊಡ್ಡವರು ಇಲ್ಲಿ ಯಾರೂ ಇಲ್ಲ, ಎಲ್ಲರೂ ಈ ಹುದ್ದೆಗೆ ತಲೆಬಾಗಬೇಕು. ನಾನು ಮತ್ತು ಇಡೀ ವಿಪಕ್ಷವೂ ಕೂಡ ಇದಕ್ಕೆ ಹೊರತಲ್ಲ’ ಎಂದಿದ್ದಾರೆ.