ಲುಂಗಿ ಎನ್‌ಗಿಡಿಗೆ ಕೋವಿಡ್‌ ಪಾಸಿಟಿವ್‌

ಜೊಹಾನ್ಸ್‌ಬರ್ಗ್‌: ದಕ್ಷಿಣ ಆಫ್ರಿಕಾದ ವೇಗಿ ಲುಂಗಿ ಎನ್‌ಗಿಡಿಗೆ ಕೋವಿಡ್‌-19 ದೃಢಪಟ್ಟಿದೆ.

ಹೀಗಾಗಿ ಅವರು ನೆದರ್ಲೆಂಡ್ಸ್‌ ಎದುರಿನ ತವರಿನ ಏಕದಿನ ಸರಣಿಯಿಂದ ಹೊರಗುಳಿಯಲಿದ್ದಾರೆ. ಈ ಸ್ಥಾನಕ್ಕೆ ಜೂನಿಯರ್‌ ಡಾಲಾ ಅವರನ್ನು ಸೇರಿಸಿಕೊಳ್ಳಲಾಗಿದೆ.

ಈ ಸರಣಿಗಾಗಿ ಮೊದಲ ಆಯ್ಕೆಯ ಕ್ರಿಕೆಟಿಗರಾದ ಟೆಂಬ ಬವುಮ, ಮಾರ್ಕ್‌ರಮ್‌, ಕ್ವಿಂಟನ್‌ ಡಿ ಕಾಕ್‌, ರಸ್ಸಿ ವಾನ್‌ ಡರ್‌ ಡುಸೆನ್‌, ಕಾಗಿಸೊ ರಬಾಡ, ಅನ್ರಿಚ್‌ ನೋರ್ಜೆ ಮೊದಲಾದವರಿಗೆಲ್ಲ ವಿಶ್ರಾಂತಿ ನೀಡಲಾಗಿತ್ತು.

ಈಗ ಎನ್‌ಗಿಡಿ ಕೂಡ ಹೊರಬಿದ್ದಿರುವುದರಿಂದ ತಂಡ ಯುವ ಕ್ರಿಕೆಟಿಗರನ್ನೇ ನಂಬಿಕೊಂಡು ಕಣಕ್ಕಿಳಿಯಬೇಕಿದೆ. ಕೇಶವ್‌ ಮಹಾರಾಜ್‌ ತಂಡವನ್ನು ಮುನ್ನಡೆಸಲಿದ್ದಾರೆ.