ಲಂಡನ್‌: ಇಂಗ್ಲೆಂಡ್‌ ವಿರುದ್ಧ ನಡೆಯಲಿರುವ ಟೆಸ್ಟ್‌ ಸರಣಿಗೆ ದಕ್ಷಿಣ ಆಫ್ರಿಕಾವು ತಂಡವನ್ನು ಪ್ರಕಟಿಸಿದೆ.ಆರಂಭಿಕ ಆಟಗಾರ ಹೈನೊ ಕುನ್‌ ಸಹಿತ ತಂಡದಲ್ಲಿ ಮೂವರು ಹೊಸ ಆಟಗಾರರಿದ್ದಾರೆ. ಆ್ಯಂಡಿಲ್‌ ಪೆಹ್ಲುಕ್ವಾಯೊ ಮತ್ತು ಐಡೆನ್‌ ಮಾರ್ಕ್‌ರಾಮ್‌ ಇನ್ನಿಬ್ಬರು. ಸ್ಟೀಫ‌ನ್‌ ಕುಕ್‌ ಮತ್ತು ವೇನ್‌ ಪಾರ್ನೆಲ್‌ ಅವರನ್ನು ಕೈಬಿಡಲಾಗಿದೆ. ನ್ಯೂಜಿಲ್ಯಾಂಡ್‌ ವಿರುದ್ಧದ ಸರಣಿ ವೇಳೆ ತಂಡದಲ್ಲಿದ್ದ ಡ್ಯಾನ್‌ ಪೀಡ್‌¤ ಅವರು ಕೂಡ ತಂಡದಲ್ಲಿ ಕಾಣಿಸಿಲ್ಲ. ಕೇಶವ್‌ ಮಹರಾಜ್‌ ಒಬ್ಬರೇ ನುರಿತ ಸ್ಪಿನ್ನರ್‌ ಆಗಿದ್ದಾರೆ.
ವಿಕೆಟ್‌ಕೀಪರ್‌ ಕೂಡ ಆಗಿರುವ ಕುನ್‌ ಲಂಡನ್‌ನಲ್ಲಿ ಟೆಸ್ಟ್‌ಗೆ ಪಾದಾರ್ಪಣೆಗೈಯುವ ಸಾಧ್ಯತೆಯಿದೆ. ಫಾ ಡು ಪ್ಲೆಸಿಸ್‌ ಬದಲಿಗೆ ಮಾರ್ಕ್‌ರಾಮ್‌ ಅವರನ್ನು ಸೇರಿಸಿಕೊಳ್ಳಲಾಗಿದೆ. ಮೊದಲ ಮಗುವಿನ ನಿರೀಕ್ಷೆಯಲ್ಲಿರುವ ದಕ್ಷಿಣ ಆಫ್ರಿಕಾ ಟೆಸ್ಟ್‌ ನಾಯಕ ಮೊದಲ ಟೆಸ್ಟ್‌ನಲ್ಲಿ ಆಡುವುದು ಅನುಮಾನವಾಗಿದೆ. ಒಂದು ವೇಳೆ ಪ್ಲೆಸಿಸ್‌ ಪಂದ್ಯ ಆರಂಭವಾಗುವ ಸಮಯದೊಳಗೆ ಇಂಗ್ಲೆಂಡಿಗೆ ಮರಳದಿದ್ದರೆ ಅವರ ಅನುಪಸ್ಥಿತಿಯಲ್ಲಿ ಡೀನ್‌ ಎಲ್ಗರ್‌ ತಂಡವನ್ನು ಮುನ್ನಡೆಸಲಿದ್ದಾರೆ.
ಜೂ. 29ರಿಂದ ಇಂಗ್ಲೆಂಡ್‌ ಲಯನ್ಸ್‌ ವಿರುದ್ಧ ನಡೆಯುವ ಅಭ್ಯಾಸ ಪಂದ್ಯದಲ್ಲಿ ಎಲ್ಗರ್‌ ದಕ್ಷಿಣ ಆಫ್ರಿಕಾ ತಂಡವನ್ನು ಮುನ್ನಡೆಸಲಿದ್ದಾರೆ. ಮೊದಲ ಟೆಸ್ಟ್‌ ಪಂದ್ಯ ಜುಲೈ 6ರಿಂದ 10ರ ವರೆಗೆ ನಡೆಯಲಿದೆ.
ತಂಡಕ್ಕೆ ಆಯ್ಕೆಯಾಗಿರುವ ಪೆಹ್ಲುಕ್ವಾಯೊ ಕೇವಲ 24 ಪ್ರಥಮ ದರ್ಜೆ ಪಂದ್ಯವನ್ನಾಡಿದ್ದಾರೆ. ಅವುರ ಪಾರ್ನೆಲ್‌ ಬದಲಿಗೆ ಎರಡನೇ ಆಲ್‌ರೌಂಡರ್‌ ಆಗಿ ತಂಡವನ್ನು ಸೇರಿದ್ದಾರೆ. ಹಾಶಿಮ್‌ ಆಮ್ಲ, ತೆಂಬ ಬವುಮ ಮತ್ತು ಡ್ಯುಮಿನಿ ಮಧ್ಯಮ ಕ್ರಮಾಂಕದಲ್ಲಿ ಆಡಲಿದ್ದಾರೆ.
ದಕ್ಷಿಣ ಆಫ್ರಿಕಾ ತಂಡ: ಫಾ ಡು ಪ್ಲೆಸಿಸ್‌ (ನಾಯಕ), ಹಾಶಿಮ್‌ ಆಮ್ಲ, ತೆಂಬ ಬವುಮ, ತ್ಯುನಿಸ್‌ ಡಿ ಬ್ರುನ್‌, ಕ್ವಿಂಟನ್‌ ಡಿ ಕಾಕ್‌, ಜೀನ್‌ಪಾಲ್‌ ಡ್ಯುಮಿನಿ, ಡೀನ್‌ ಎಲ್ಗರ್‌, ಹೈನೊ ಕುನ್‌, ಕೇಶವ್‌ ಮಹಾರಾಜ್‌, ಐಡೆನ್‌ ಮಾರ್ಕ್‌ರಾಮ್‌, ಮಾರ್ನೆ ಮಾರ್ಕೆಲ್‌, ಕ್ರಿಸ್‌ ಮೊರಿಸ್‌, ಡುವಾನೆ ಆಲಿವರ್‌, ಆ್ಯಂಡಿಲ್‌ ಪೆಹ್ಲುಕ್ವಾಯೊ, ವೆರ್ನನ್‌ ಪಿಲಾಂಡರ್‌, ಕಾಗಿಸೊ ರಬಾಡ.
