ಚೀನ: ಮಕ್ಕಳಿಗೆ ಸೋಷಿಯಲ್‌ ಡಿಸ್ಟಾನ್ಸ್‌ ಟೋಪಿ

ಬೀಜಿಂಗ್‌: ಇಡೀ ವಿಶ್ವಕ್ಕೆ ಮಾರಣಾಂತಿಕ ಸೋಂಕನ್ನು ಹಬ್ಬಿಸಿದ ಆರೋಪಕ್ಕೆ ಒಳಗಾಗಿರುವ ಚೀನದಲ್ಲಿ ಜನಜೀವನ ಸಹಜ ಸ್ಥಿತಿಗೆ ಮರಳುತ್ತಿದೆ. ಶಾಲಾ-ಕಾಲೇಜುಗಳೂ ಪುನರಾರಂಭಗೊಂಡಿವೆ. ಜತೆಗೆ ಶಾಲೆಗಳಲ್ಲಿ ಸಾಮಾಜಿಕ ಅಂತರ ಕಾಯ್ದಕೊಳ್ಳಲು ವಿಭಿನ್ನ ವಿಧಾನವನ್ನು ಪಾಲಿಸುತ್ತಿದೆ. ಸುಮಾರು ಮೂರು ತಿಂಗಳ ನಂತರ ವಿದ್ಯಾರ್ಥಿಗಳು ಶಾಲೆಯತ್ತ ಮುಖ ಮಾಡುತ್ತಿದ್ದು,

ಸಾಮಾಜಿಕ ಅಂತರ ಕಾಯ್ದುಕೊಳ್ಳಲು ಸೋಷಿಯಲ್‌ ಡಿಸ್ಟಾನ್ಸ್‌ ಟೋಪಿಯನ್ನು ಮಕ್ಕಳಿಗೆ ನೀಡಲಾಗಿದೆ. ಒಂದು ಮೀಟರ್‌ ಅಂತರವಿರುವಂತೆ 2 ಕೋಲುಗಳ ಸಹಾಯದಿಂದ ಈ ಟೋಪಿಯನ್ನು ತಯಾರಿಸಿದ್ದು, ಮಕ್ಕಳೆಲ್ಲಾ ಒಟ್ಟಿಗೆ ಒಂದೆಡೆ ಸೇರಿದಾಗ ಸಾಮಾಜಿಕ ಅಂತರದ ಬಗ್ಗೆ ಅವರಿಗೆ ತಿಳಿ ಹೇಳುವುದು ಕಷ್ಟ ಎನ್ನುವ ಕಾರಣಕ್ಕೆ ಈ ಉಪಾಯ ಮಾಡಲಾಗಿದೆ.

ಈ ವಿಧಾನವನ್ನು ಹ್ಯಾಂಗ್‌ಝೌ ಎಂಬ ಪ್ರಾಂತ್ಯದ ಯಾಂಗ್‌ಜೆಂಗ್‌ ಪ್ರಾಥಮಿಕ ಶಾಲೆ ಅನ್ವೇಷಣೆ ಮಾಡಿದ್ದು, ನಿಯಮವನ್ನು ಕಠಿಣವಾಗಿ ಜಾರಿಗೊಳಿಸುವತ್ತ ಕಾರ್ಯಾಚರಿಸುತ್ತಿದೆ.

ಮಕ್ಕಳೆಲ್ಲಾ ತಲೆಯ ಮೇಲೊಂದು ಹೆಲ್ಮೆಟ್‌ರೀತಿಯ ಟೋಪಿ ಧರಿಸಿ ಹೋಗುತ್ತಿರುವ ವಿಡೀಯೋ ಚೀನದೆಲ್ಲಡೆ ವೈರಲ್‌ ಆಗಿದ್ದು, ಇದರ ಜತೆಗೆ ಮಾಸ್ಕ್ ಧಾರಣೆಯನ್ನು ಕಡ್ಡಾಯ ಮಾಡಲಾಗಿದೆ.