ಈ ವಾರ ಆರು ಚಿತ್ರಗಳು ತೆರೆಗೆ: ಗಟ್ಟಿ ನಿಲ್ಲೋರ್ಯಾರು?

ಕನ್ನಡ ಚಿತ್ರರಂಗದಲ್ಲೀಗ ಸಿನಿಮಾ ಬಿಡುಗಡೆಯ ಪರ್ವ ಎನ್ನಬಹುದು. ಹೌದು, ಕಳೆದ ಮೂರು ವಾರಗಳಿಂದಲೂ ಸೂಕ್ಷ್ಮವಾಗಿ ಗಮನಿಸಿದರೆ, ಒಂಬತ್ತು, ಹತ್ತು, ಹನ್ನೊಂದು ಚಿತ್ರಗಳು ಬಿಡುಗಡೆಯಾಗುವ ಮೂಲಕ ದಾಖಲೆ ಬರೆದಿವೆ. ಈ ಪೈಕಿ ಒಳ್ಳೆಯ ಕಂಟೆಂಟ್‌ ಸಿನಿಮಾಗಳೂ ಬಂದಿವೆ. ಆದರೆ, ಚಿತ್ರಮಂದಿರ ಉಳಿಸಿಕೊಳ್ಳೋಕೆ ಹೊಸಬರು ಪರದಾಡುತ್ತಿರುವುದಂತೂ ನಿಜ. ಆದರೆ, ಈ ವಾರವೂ ಕೂಡ ಆರು ಚಿತ್ರಗಳು ಬಿಡುಗಡೆಯಾಗುತ್ತಿವೆ.

ಹೌದು, ಸಾಲು ಸಾಲು ಚಿತ್ರಗಳು ಬಿಡುಗಡೆಯಾಗುತ್ತಿದ್ದರೂ, ಚಿತ್ರಮಂದಿರಗಳಿಲ್ಲದೆ ಹೊಸಬರು ಪರದಾಡುತ್ತಿರುವ ವಿಷಯ ಗೊತ್ತಿದ್ದರೂ, ಈ ವಾರವೂ ಸಹ ಆರು ಚಿತ್ರಗಳು ಬಿಡುಗಡೆಯಾಗಲಿವೆ ಎನ್ನಲಾಗುತ್ತಿದೆ. ಅಂದಹಾಗೆ, “ದುನಿಯಾ’ ಸೂರಿ ನಿರ್ದೇಶನದ “ಪಾಪ್‌ ಕಾರ್ನ್ ಮಂಕಿ ಟೈಗರ್‌’ ಚಿತ್ರ ಬಿಡುಗಡೆಯಾಗುತ್ತಿದೆ. ಧನಂಜಯ್‌ ಇಲ್ಲಿ ವಿಶೇಷ ಆಕರ್ಷಣೆ.

ಇನ್ನು, ರಮೇಶ್‌ ಅರವಿಂದ್‌ ಅಭಿನಯದ ಆಕಾಶ್‌ ಶ್ರೀವಾತ್ಸವ್‌ ನಿರ್ದೇಶನದ “ಶಿವಾಜಿ ಸೂರತ್ಕಲ್‌’ ಕೂಡ ಬಿಡುಗಡೆ ಆಗುತ್ತಿದೆ. ಉಳಿದಂತೆ ತುಂಬಾ ದಿನಗಳಿಂದಲೂ ಸದ್ದು ಮಾಡದೇ ಇದ್ದ “ಆದ್ಯ’ ಕೂಡ ದಿಢೀರನೆ ಬಿಡುಗಡೆಗೆ ಸಜ್ಜಾಗಿದೆ. ಈ ಚಿತ್ರಕ್ಕೆ ಚಿರಂಜೀವಿ ಸರ್ಜಾ ಹೀರೋ. ಇನ್ನು ಇವುಗಳ ಜೊತೆ ಮಯೂರಿ ಅಭಿನಯದ “ಮೌನಂ’ ಹಾಗು “ಜ್ಞಾನಗಂಗೆ’ ಚಿತ್ರವೂ ಸೇರಿದೆ. “ಸೀತಮ್ಮ ಬಂದಳು ಸಿರಿಮಲ್ಲಿಗೆ ತೊಟ್ಟು’ ಎಂಬ ಚಿತ್ರ ಕೂಡ ಬಿಡುಗಡೆ ಆಗುತ್ತಿದೆ.

ಅಂದಹಾಗೆ, ಇವುಗಳು ಸದ್ಯಕ್ಕೆ ಬಿಡುಗಡೆ ಆಗಲಿವೆ ಎಂಬ ಸುದ್ದಿ ಪಕ್ಕಾ. ಆದರೆ, ಇನ್ನೆರೆಡು ದಿನಗಳಲ್ಲಿ ಬಿಡುಗಡೆ ಸಿನಿಮಾಗಳ ಸಂಖ್ಯೆ ಹೆಚ್ಚಲೂಬಹುದು. ಅಥವಾ ಹೀಗಿರುವ ಸಿನಿಮಾಗಳ ಸಂಖ್ಯೆ ಕಡಿಮೆಯಾಗಲೂಬಹುದು. ಸದ್ಯಕ್ಕೆ ಆರು ಸಿನಿಮಾ ಬರುತ್ತಿವೆ. ಈ ಪೈಕಿ ಗಟ್ಟಿಯಾಗಿ ನಿಲ್ಲೋರ್ಯಾರು ಎಂಬುದನ್ನು ಕಾದು ನೋಡಬೇಕು.