ಕಲಬುರಗಿಯಲ್ಲಿ ಮತ್ತೆ ಆರು ಜನರಿಗೆ ಕೋವಿಡ್ ದೃಢ: 141ಕ್ಕೆ ಸೋಂಕಿತರ ಸಂಖ್ಯೆ ಏರಿಕೆ

ಕಲಬುರಗಿ: ಜಿಲ್ಲೆಯಲ್ಲಿ ಕೋವಿಡ್-19 ಸೋಂಕಿನ ಆರ್ಭಟ ಮುಂದುವರೆದಿದ್ದು, ರವಿವಾರ ಮತ್ತೆ ಆರು ಜನರಿಗೆ ‌ಮಹಾಮಾರಿ ರೋಗ ದೃಢಪಟ್ಟಿದೆ. ‌ಇದರೊಂದಿಗೆ ಒಟ್ಟು ಕೋವಿಡ್ ಸೋಂಕಿತರ ಸಂಖ್ಯೆ 141ಕ್ಕೆ ಏರಿಕೆಯಾಗಿದೆ.

ಹೊರ ರಾಜ್ಯಗಳಿಂದ ಬಂದವರಿಗೇ ಕೋವಿಡ್ ಸೋಂಕು ಪತ್ತೆಯಾಗಿದೆ. ಐವರು ಸೋಂಕಿತರು ಮಹಾರಾಷ್ಟ್ರದಿಂದ ಬಂದವರಾಗಿದ್ದರೆ, ಮತ್ತೋರ್ವ ಆಂಧ್ರ ಪ್ರದೇಶದ ಪ್ರವಾಸ ಹಿನ್ನೆಲೆ ಹೊಂದಿದ್ದಾರೆ. ಇದರಲ್ಲಿ ಓರ್ವ ಮಹಿಳೆಯೂ ಸೇರಿದ್ದಾರೆ.

ಮಹಾರಾಷ್ಟ್ರದಿಂದ ಬಂದ 32 ವರ್ಷದ ಪುರುಷ (ಪಿ-1965), 20 ವರ್ಷದ ಯುವಕ (ಪಿ-1966), 48 ವರ್ಷದ ಪುರುಷ (ಪಿ-1967), 50 ವರ್ಷದ ಮಹಿಳೆ (ಪಿ-1968), 45 ವರ್ಷದ ಪುರುಷ (ಪಿ-2000) ಹಾಗೂ ಆಂಧ್ರಪ್ರದೇಶದದಿಂದ 30 ವರ್ಷದ ಪುರುಷ (ಪಿ-2001)ನಿಗೆ ಕೋವಿಡ್ ಸೋಂಕು ಖಚಿತವಾಗಿದೆ.

ಜಿಲ್ಲೆಯ ಒಟ್ಟು 141 ಕೋವಿಡ್ ಸೋಂಕಿತರ ಪೈಕಿ ಇದುವರೆಗೆ 62 ಜನ ಗುಣಮುಖರಾಗಿದ್ದಾರೆ. ಏಳು ಜನರು ಸೋಂಕಿಗೆ ತುತ್ತಾಗಿ ಸಾವನ್ನಪ್ಪಿದ್ದಾರೆ. ಉಳಿದಂತೆ 72 ಜನ ಕೋವಿಡ್ ಪೀಡಿತರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.