ಶಿರ್ವ: ಮಲ್ಲಿಗೆ ಖರೀದಿ ಆರಂಭ

ಶಿರ್ವ: ಲಾಕ್‌ಡೌನ್‌ ಆರಂಭವಾದಲ್ಲಿಂದ ಸ್ಥಗಿತಗೊಂಡಿದ್ದ ಮಲ್ಲಿಗೆ ಮಾರುಕಟ್ಟೆ ಸೋಮವಾರ ಪುನರಾರಂಭಗೊಂಡಿದ್ದು, ಮಲ್ಲಿಗೆ ಅಟ್ಟೆಗೆ 120 ರೂ. ದರವಿತ್ತು.

ಮಲ್ಲಿಗೆಯ ಕಟ್ಟೆ ಮುಚ್ಚಿರುವುದರಿಂದಾಗಿ ದಿನನಿತ್ಯದ ಮಲ್ಲಿಗೆ ವ್ಯಾಪಾರ ವಹಿವಾಟು ಸ್ಥಗಿತಗೊಂಡ ಕಾರಣ ಬೆಳೆಗಾರರು ಕಂಗಾಲಾಗಿದ್ದರು. ಇದರ ಲಾಭ ಪಡೆದ ಕೆಲವರು ನೇರವಾಗಿ ಬೆಳೆಗಾರರಿಂದ ಖರೀದಿಸಲು ಮುಂದಾಗಿದ್ದರು. ಬೆಳೆಗಾರರ ಹಿತಾಸಕ್ತಿಯನ್ನು ಗಮನಿಸಿ ಮಲ್ಲಿಗೆ ವ್ಯವಹಾರ ಪುನರಾರಂಭಿಸಲಾಗಿದೆ. ಲಾಕ್‌ಡೌನ್‌ ಅವಧಿ ಮುಗಿಯುವ ತನಕ ನಿತ್ಯ ಬೆಳಗ್ಗೆ 10 ಗಂಟೆಯ ವರೆಗೆ ಮಲ್ಲಿಗೆ ವಹಿವಾಟು ನಡೆಯಲಿದೆ ಎಂದು ಮಲ್ಲಿಗೆ ವ್ಯಾಪಾರಿ ಸಂಜೀವ ಕುಲಾಲ್‌ ಪಂಜಿಮಾರು ತಿಳಿಸಿದ್ದಾರೆ.