ನಕ್ಸಲರ ಪತ್ತೆಗೆ ಶಿವಮೊಗ್ಗ ಪೊಲೀಸರು ಸಜ್ಜು : ಎಎನ್‌ಎಫ್‌ ಮಾದರಿಯಲ್ಲಿ ವಿಶೇಷ ಪೊಲೀಸ್‌ ಪಡೆ

ಶಿವಮೊಗ್ಗ: ನಕ್ಸಲ್‌ ನಾಯಕ ವಿಕ್ರಂ ಗೌಡ ಎನ್‌ಕೌಂಟರ್‌ ಬೆನ್ನಲ್ಲೇ ಶಿವಮೊಗ್ಗ ಪೊಲೀಸರು ಚುರುಕಾಗಿದ್ದು ಎಎನ್‌ಎಫ್‌ ಮಾದರಿಯಲ್ಲಿ ವಿಶೇಷ ಪೊಲೀಸ್‌ ಪಡೆಯನ್ನು ರಚಿಸಿದೆ.

ನಕ್ಸಲರ ಚಲನವಲನ ದಾಖಲಾಗಿದ್ದ ಆಗುಂಬೆ ಠಾಣೆ ವ್ಯಾಪ್ತಿ, ಹೊಸನಗರದ ನಗರ, ಮಾಸ್ತಿಕಟ್ಟೆ ವ್ಯಾಪ್ತಿಯಲ್ಲಿ ಮುಂಜಾಗ್ರತಾ ಕ್ರಮವಾಗಿ ಈ ಪಡೆಯನ್ನು ನಿಯೋಜಿಸಲಾಗುವುದು.

ಈಗಾಗಲೇ 25 ಸಿವಿಲ್‌, ಡಿಎಆರ್‌ ಪೊಲೀಸ್‌ ಸಿಬಂದಿಗೆ ಶಿವಮೊಗ್ಗದಲ್ಲಿ ತರಬೇತಿ ನೀಡಲಾಗುತ್ತಿದೆ. ಕೆಲವೇ ದಿನಗಳಲ್ಲಿ ಅವರು ಈ ಭಾಗದಲ್ಲಿ ಕೆಲಸ ಆರಂಭಿಸಲಿದ್ದಾರೆ. ಶಸ್ತ್ರಸಜ್ಜಿತ ಈ ಪಡೆ ಠಾಣೆಗೆ ಭದ್ರತೆ ನೀಡುವ ಜತೆಗೆ ನಕ್ಸಲ್‌ ಚಟುವಟಿಕೆ ಇದ್ದ ಗ್ರಾಮಗಳಲ್ಲಿ ಶೋಧ ನಡೆಸಲಿದೆ.

ಕೆಲವು ವರ್ಷಗಳ ಹಿಂದೆಯೂ ಇಂತಹ ಪಡೆ ಇತ್ತು. ನಕ್ಸಲ್‌ ಚಟುವಟಿಕೆ ತಣ್ಣಗಾದ ಹಿನ್ನೆಲೆಯಲ್ಲಿ ಅದನ್ನು ಕೈಬಿಡಲಾಗಿತ್ತು. ಈಗ ಮತ್ತೆ ಚಾಲನೆ ನೀಡಲಾಗಿದೆ. ವಿಕ್ರಂ ಹತ್ಯೆ ಹಿನ್ನೆಲೆಯಲ್ಲಿ ಆತನ ಸಹಚರರ ಮುಂದಿನ ನಡೆ ಹೇಗಿರುತ್ತದೋ ಗೊತ್ತಿಲ್ಲ. ಎಎನ್‌ಎಫ್‌ ಶೋಧ ನಡೆಸುತ್ತಿದ್ದು, ಶಿವಮೊಗ್ಗ ಭಾಗದಲ್ಲೂ ಕಟ್ಟೆಚ್ಚರ ಘೋಷಿಸಲಾಗಿದೆ.