ನಿಲ್ಲದ ಕೋವಿಡ್‌ ಕೇಕೆ

ಶಿವಮೊಗ್ಗ: ಜಿಲ್ಲೆಯಲ್ಲಿ ಶುಕ್ರವಾರ 6 ಮಂದಿಗೆ ಕೋವಿಡ್‌ ವೈರಸ್‌ ಕಾಣಿಸಿಕೊಂಡಿದ್ದು, ಒಟ್ಟು ಸೋಂಕಿತರ ಸಂಖ್ಯೆ 89ಕ್ಕೆ ಏರಿಕೆಯಾಗಿದೆ. ಹಾಗೆಯೇ, 43 ಜನ ಗುಣಮುಖರಾಗಿ ಹೋಂ ಕ್ವಾರಂಟೈನ್‌ನಲ್ಲಿ ಇದ್ದಾರೆ. 46 ಸಕ್ರಿಯ ಪ್ರಕರಣಗಳಿವೆ.

ಶುಕ್ರವಾರ ಪತ್ತೆಯಾದ 6 ಪ್ರಕರಣಗಳಲ್ಲಿ ಇಬ್ಬರು ಮಹಾರಾಷ್ಟ್ರದಿಂದ ವಾಪಸಾದವರಾಗಿದ್ದು, ಮೂವರಿಗೆ ಪಿ 2830 ಸಂಪರ್ಕದಿಂದ ಬಂದಿದೆ. ಬೆಂಗಳೂರಿನಿಂದ ಪಾದರಾಯನಪುರ ಡ್ನೂಟಿಯಲ್ಲಿದ್ದ ಕೆಎಸ್‌ಆರ್‌ಪಿ ಪೇದೆಗಳು ಈಚೆಗೆ ಜಿಲ್ಲೆಗೆ ಮರಳಿದ್ದರು. ಅವರಲ್ಲಿ 7 ಮಂದಿಗೆ ಪಾಸಿಟಿವ್‌ ಬಂದಿತ್ತು. ಇದರಲ್ಲಿ ಪಿ 2830 ಸಂಪರ್ಕದಲ್ಲಿದ್ದ ಮೂವರಿಗೆ ಕೋವಿಡ್‌ ದೃಢಪಟ್ಟಿದೆ.

12 ಮಂದಿ ಬಿಡುಗಡೆ: ಒಂದೆಡೆ ಪ್ರಕರಣಗಳ ಸಂಖ್ಯೆ ಏರಿಕೆಯಾಗುತ್ತಿದ್ದು, ಇತ್ತ ಗುಣಮುಖರಾಗಿ ಮನೆಗೆ ತೆರಳುತ್ತಿರುವ ಪ್ರಮಾಣವೂ ಹೆಚ್ಚಳವಾಗಿದೆ. ಶುಕ್ರವಾರ ಒಟ್ಟು 12 ಮಂದಿ ಗುಣಮುಖರಾಗಿದ್ದಾರೆ. ಪಿ 1499, ಪಿ 1501, ಪಿ 1503, ಪಿ 2852, ಪಿ 2853, ಪಿ 3854, ಪಿ 2855, ಪಿ3194, ಪಿ 3304, ಪಿ 3305, ಪಿ 3306, ಪಿ 3308 ಗುಣಮುಖರಾದವರು.

ವೈದ್ಯೆಗೆ ಕೋವಿಡ್‌: ಇನ್ನೂ ಜಿಲ್ಪಾಸ್ಪತ್ರೆಯಲ್ಲಿ ಕೋವಿಡ್‌-19 ಚಿಕಿತ್ಸೆ ನೀಡುತ್ತಿರುವ ಹೊರಗುತ್ತಿಗೆ ಟ್ರೈನಿ ವೈದ್ಯೆಗೂ ಸೋಂಕು ಹರಡಿದೆ. ಅಷ್ಟೆಲ್ಲ ಮುಂಜಾಗ್ರತಾ ಕ್ರಮ ಕೈಗೊಂಡರೂ ಸೋಂಕು ಹರಡಿರುವುದು ವೈದ್ಯರಲ್ಲಿ ಆತಂಕ ಮನೆ ಮಾಡಿದೆ. ರಕ್ಷಕರಿಗೇ ರಕ್ಷಣೆ ಇಲ್ಲದಂತಾಗಿದೆ.