ಬೆಂಗಳೂರಿಗೆ ಶರಾವತಿ ನೀರು ಅವೈಜ್ಞಾನಿಕ ಯೋಜನೆ’; ಯೋಜನೆ ವಿರುದ್ಧ ಬಿಜೆಪಿ ಹೋರಾಟ

ಉದಯವಾಣಿ ಸಮಾಚಾರ
ಭಟ್ಕಳ: ಶರಾವತಿ ನೀರನ್ನು ಬೆಂಗಳೂರಿಗೆ ತೆಗೆದುಕೊಂಡು ಹೋಗುವ ಯೋಜನೆ ಅವೈಜ್ಞಾನಿಕವಾಗಿದ್ದು ಇದಕ್ಕೆ ನಾಗರೀಕರ
ಹಾಗೂ ಬಿ.ಜೆ.ಪಿ. ತೀವ್ರ ವಿರೋಧವಿದೆ ಎಂದು ಮಾಜಿ ಶಾಸಕ ಹಾಗೂ ಬಿ.ಜೆ.ಪಿ. ರಾಜ್ಯ ಉಪಾಧ್ಯಕ್ಷ ಹರತಾಳು ಹಾಲಪ್ಪ
ಹೇಳಿದರು.

ಭಟ್ಕಳ ಬಿ.ಜೆ.ಪಿ. ಮಂಡಳ ಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಯೋಜನೆ ಜಾರಿಗೆ ಮುಂದಾದಲ್ಲಿ ಉಗ್ರ ಪ್ರತಿಭಟನೆ ನಡೆಸಲಾಗುವುದು. ಹಸಿರು ನ್ಯಾಯಾಧೀಕರಣ ಸೇರಿದಂತೆ ನ್ಯಾಯಾಲಯದಲ್ಲಿಯೂ ಕೂಡಾ ಹೋರಾಟ ಮಾಡಲಾಗುವುದು. ಪ್ರಥಮ ಹಂತದಲ್ಲಿ ಪ್ರತಿಭಟನೆ ಕೈಗೊಳ್ಳುವುದನ್ನು ನಿರ್ಧರಿಸಲು ಹೊನ್ನಾವರವನ್ನು
ಕೇಂದ್ರವನ್ನಾಗಿರಿಸಿಕೊಂಡು ಶೀಘ್ರದಲ್ಲೇ ಒಂದು ಸಭೆ ಮಾಡಲಾಗುವುದು ಎಂದರು.

ಶರಾವತಿ ನೀರನ್ನು 2800 ಅಡಿ ಎತ್ತರದ ಹಾಗೂ ಸುಮಾರು 480 ಕಿ.ಮೀ. ದೂರದ ಬೆಂಗಳೂರಿಗೆ ತೆಗೆದುಕೊಂಡು ಹೋಗುವ ಯೋಜನೆ ಕಾರ್ಯ ಸಾಧುವಲ್ಲ. ಆದರೆ ಈಗಿನ ಕಾಂಗ್ರೆಸ್‌ ಸರಕಾರ ಸುಮಾರು 22 ಸಾವಿರ ಕೋಟಿ ವೆಚ್ಚದ (ಮುಗಿಯುವಾಗ 30 ಸಾವಿರ ಕೋಟಿ ದಾಟುವ ಅಂದಾಜು) ಯೋಜನೆಗೆ ಮುಂದಾಗಿರುವುದು ಸಂಶಯ ಮೂಡಿಸುತ್ತಿದೆ. ಅಲ್ಲದೇ ಪರೋಕ್ಷವಾಗಿ ಇದಲ್ಲಿ ಹಲವು ಭ್ರಷ್ಟ ಕೈಗಳ ಹಸ್ತಕ್ಷೇಪವಿದೆ ಎಂದು ದೂರಿದರು.

ಯೋಜನೆ ವಿರೋಧಿಸಲು ಈಗಾಗಲೇ ಶಿವಮೊಗ್ಗ ಜಿಲ್ಲೆಯಲ್ಲಿ ಚರ್ಚೆ ನಡೆಸಲಾಗಿದೆ. ಶರಾವತಿ ಒಡಲನ್ನು ಅಗೆದು-ಬಗೆದು-ಸೀಳಿ ಪಶ್ಚಿಮಘಟ್ಟದಲ್ಲಿ ದೊಡ್ಡ ದುರಂತ ಸಂಭವಿಸಲು ಎಂದಿಗೂ ಅವಕಾಶ ಕೊಡೆವು. ವಿರೋಧದ ಮಧ್ಯೆಯೂ ಸರಕಾರ ಯೋಜನೆ ಜಾರಿಗೆ ಮುಂದಾದರೆ ನ್ಯಾಯಾಲಯದ ಮೆಟ್ಟಿಲೇರಲೂ ಸಿದ್ಧ. ಹಸಿರು ನ್ಯಾಯಾಧೀಕರಣ, ಸರ್ವೋಚ್ಚ ನ್ಯಾಯಾಲಯದ
ತನಕ ನ್ಯಾಯಕ್ಕಾಗಿ ಹೋರಾಟ ಮಾಡಲೂ ಸಿದ್ಧ.

ಈಗಾಗಲೇ ಪಶ್ಚಿಮಘಟ್ಟ ಪ್ರದೇಶದ ಜನ ಸಾಕಷ್ಟು ಕಷ್ಟ ಅನುಭವಿಸಿದ್ದೇವೆ. ನೂರಾರು ಕಿ.ಮೀ. ಹತ್ತಾರು ಅಡಿ ಆಳಕ್ಕೆ ಅಗೆದು ಪೈಪ್‌ ಹಾಕುವ ಪ್ರಕ್ರಿಯೆಯಲ್ಲಿ ನೂರಾರು ದೈತ್ಯ ಲಾರಿಗಳು, ಯಂತ್ರಗಳು ಓಡಾಡಿ ಮಣ್ಣು ಸಂಪೂರ್ಣ ಶಿಥಿಲ ಪರಿಸ್ಥಿತಿ ನಿರ್ಮಾಣವಾಗಲಿದೆ. 450 ಕಿ.ಮೀ. ದೂರ ಪೈಪ್‌ಲೈನ್‌ ಅಳವಡಿಸಲು ಗುಡ್ಡ ಅಗೆದು ಮರಗಳನ್ನು ಕಡಿದು ಕಾಮಗಾರಿ
ಕೈಗೊಳ್ಳಬೇಕು. ಅಲ್ಲದೇ ಶರಾವತಿಯಿಂದ 30-40 ಟಿ.ಎಂ.ಸಿ. ನೀರನ್ನು ಎತ್ತಿ ಬೆಂಗಳೂರಿಗೆ ತೆಗೆದುಕೊಂಡು ಹೋದರೆ ಹೊಳೆಯಲ್ಲಿ ಉಪ್ಪು ನೀರು ನುಗ್ಗಿ ನದಿ ಪಾತ್ರದಲ್ಲಿರುವ ಸಾವಿರಾರು ಎಕರೆ ಜಮೀನು ನಿಷ್ಪ್ರಯೋಜಕವಾಗಲಿದೆ ಎಂದರು.

ಈಗಾಗಲೇ 16 ಸಾವಿರ ಕೋಟಿ ವೆಚ್ಚ ಮಾಡಿದ ಎತ್ತಿನಹೊಳೆ ಯೋಜನೆಯಲ್ಲಿ  ಒಂದು ಹನಿ ನೀರು ಬೆಂಗಳೂರು ತಲುಪಿಲ್ಲ. ಸರಕಾರದ ಅಧಿಕಾರಿಗಳಲ್ಲಿಯೇ ಗೊಂದಲವಿದ್ದು ಹೇಗೆ ನೀರು ತೆಗೆದುಕೊಂದು ಹೋಗಬೇಕೆನ್ನುವ ಕುರಿತು ಸ್ಪಷ್ಟತೆ ಇಲ್ಲ
ಎಂದರು.

ಈ ಸಂದರ್ಭದಲ್ಲಿ ಮಾಜಿ ಶಾಸಕ ಸುನೀಲ್‌ ನಾಯ್ಕ, ಹಿಂದುಳಿದ ಮೋರ್ಚಾ ರಾಜ್ಯ ಉಪಾಧ್ಯಕ್ಷ ಈಶ್ವರ ಎನ್‌. ನಾಯ್ಕ, ಪಶ್ಚಿಮಘಟ್ಟ ಕಾರ್ಯಪಡೆ ಮಾಜಿ ಅಧ್ಯಕ್ಷ ಗೋವಿಂದ ನಾಯ್ಕ, ಬಿ.ಜೆ.ಪಿ. ಮಂಡಳ ಅಧ್ಯಕ್ಷ ಲಕ್ಷ್ಮಿ ನಾರಾಯಣ ನಾಯ್ಕ, ಹೊನ್ನಾವರದ ರಾಜು ಭಂಡಾರಿ, ಜಿಲ್ಲಾ ಕಾರ್ಯದರ್ಶಿ ಸುಬ್ರಾಯ ದೇವಾಡಿಗ, ಪ್ರಮುಖರಾದ ಕೇದಾರ ಕೊಲ್ಲೆ, ಶ್ರೀನಿವಾಸ ನಾಯ್ಕ, ಉಮೇಶ ನಾಯ್ಕ ಮುಂತಾದವರು ಉಪಸ್ಥಿತರಿದ್ದರು.