ಟಿ-ಸೀರಿಸ್‌ ಮುಖ್ಯಸ್ಥನ ವಿರುದ್ಧದ ಲೈಂಗಿಕ ಶೋಷಣೆ ದೂರು ವಾಪಸ್‌

ಹೊಸದಿಲ್ಲಿ : ಟಿ-ಸೀರಿಸ್‌ ಮುಖ್ಯಸ್ಥ ಹಾಗೂ ಚಿತ್ರ ನಿರ್ಮಾಪಕ ಭೂಷಣ್‌ ಕುಮಾರ್‌ ವಿರುದ್ಧ ನಿನ್ನೆ ಬುಧವಾರ ಮುಂಬಯಿಯ ಓಶಿವಾರಾ ಪೊಲೀಸ್‌ ಠಾಣೆಯಲ್ಲಿ ಲೈಂಗಿಕ ಶೋಷಣೆಯ ದೂರು ದಾಖಲಿಸಿದ್ದ  ಟಿ-ಸೀರಿಸ್‌ ಮಹಿಳಾ ಉದ್ಯೋಗಿ ಇಂದು ಗುರುವಾರ ತನ್ನ ದೂರನ್ನು ಹಿಂಪಡೆದಿರುವುದಾಗಿ ವರದಿಯಾಗಿದೆ. 

‘ನಾನು ಜುಗುಪ್ಸೆ ಮತ್ತು ಮಾನಸಿಕ ಒತ್ತಡದಿಂದ ದೂರು ನೀಡಿದ್ದೆ; ನನಗೆ ಭೂಷಣ್‌ ಅವರ ಪ್ರತಿಷ್ಠೆಗೆ ಮಸಿ ಬಳಿಯುವ ಯಾವುದೇ ಇರಾದೆ ಇಲ್ಲ’ ಎಂದಾಕೆ ತನ್ನ ದೂರು ಹಿಂಪಡೆವ ಹೇಳಿಕೆಯಲ್ಲಿ ಸ್ಪಷ್ಟಪಡಿಸಿದ್ದಾಳೆ. 

ಇದೇ ವೇಳೆ ಆಕೆ, ತನ್ನ ವಿರುದ್ಧ ಅಂಬೋಲಿ ಪೊಲೀಸ್‌ ಠಾಣೆಯಲ್ಲಿ ಹಣ-ಸುಲಿಗೆ ದೂರು ದಾಖಲಿಸಿರುವ ನಿರ್ಮಾಪಕ ಕೃಷನ್‌ ಕುಮಾರ್‌ ಕೂಡ ದೂರನ್ನು ಹಿಂಪಡೆಯಬೇಕೆಂದು ಕೇಳಿಕೊಂಡಿದ್ದಾಳೆ ಎಂದು ಮೂಲಗಳು ತಿಳಿಸಿವೆ.