ಮಲ್ಪೆ: ಕಡಲ ತೀರಕ್ಕೆ ತೇಲಿ ಬಂತು ಬೂತಾಯಿ ಮೀನಿನ ರಾಶಿ!

ಮಲ್ಪೆ/ಸುರತ್ಕಲ್‌: ಬಡಾ ನಿಡಿಯೂರು ಕದಿಕೆ ಸಮುದ್ರ ತೀರ ಮತ್ತು ಮುಕ್ಕ ಜೋರ ಬಳಿಯಿಂದ ಮಿತ್ರಪಟ್ಣ ತನಕ ಸೋಮವಾರ ಮಧ್ಯಾಹ್ನ ರಾಶಿ ರಾಶಿ ಬೂತಾಯಿ ಮೀನು ದಡ ಸೇರಿದೆ. ಸುದ್ದಿ ತಿಳಿಯುತ್ತಿದ್ದಂತೆ ಸ್ಥಳೀಯರು ಹೆಕ್ಕಲು ಮುಗಿಬಿದ್ದಿದ್ದಾರೆ.

ಕೆಲವರು ಮನೆಗೆ ಕೊಂಡೊಯ್ದರೆ ಇನ್ನು ಕೆಲವರು ಮಾರಾಟ ಮಾಡಿದ್ದಾರೆ ಎನ್ನಲಾಗಿದೆ. ಸುಮಾರು 800 ಕೆ.ಜಿ. ಮೀನು ತೇಲಿಬಂದಿದೆ ಎಂದು ಸ್ಥಳೀಯ ಪ್ರವೀಣ್‌ ಕಾಂಚನ್‌ ತಿಳಿಸಿದ್ದಾರೆ.

ಈ ಭಾಗದ ಸಮುದ್ರದಲ್ಲಿ ಬೆಳಗ್ಗಿ ನಿಂದ ಹಲವಾರು ದೋಣಿಗಳು ಮೀನುಗಾರಿಕೆ ಮಾಡುತ್ತಿದ್ದು ದೋಣಿ ಎಂಜಿನಿನ ಸದ್ದಿಗೆ ಮೀನುಗಳು ತೀರಕ್ಕೆ ಆಗಮಿಸಿವೆ. ಕದಿಕೆ ಪರಿಸರದಲ್ಲಿ ಈ ರೀತಿ ಮೀನು ಮೊದಲ ಬಾರಿ ಕಂಡು ಬಂದಿದ್ದು, ಈ ಹಿಂದೆ ಕಾಪು, ಎರ್ಮಾಳು ಕಡೆಗಳಲ್ಲಿ ಸಮುದ್ರತೀರಕ್ಕೆ ಬಂದಿತ್ತು ಎಂದು ಮೀನುಗಾರರು ತಿಳಿಸಿದ್ದಾರೆ.