ಎರಡು ವರ್ಷ ಪೂರೈಸಿದ ಸರಳ ಜೀವನ ವಾಹಿನಿ ಚಾನೆಲ್

ಕನ್ನಡದ ಸರಳ ಜೀವನ ವಾಹಿನಿ ಇದೀಗ ಎರಡು ವರ್ಷಗಳನ್ನು ಪೂರೈಸಿ, ಮೂರನೇ ವರ್ಷಕ್ಕೆ ಕಾಲಿಟ್ಟಿದೆ. ಇದೊಂದಿಗೆ ರಾಜ್ಯದ ಸಮಗ್ರ ಸುದ್ದಿಯನ್ನೂ ನೀಡಲು ಅಣಿಯಾಗಿದೆ. ಫೆಬ್ರವರಿ 19ಕ್ಕೆ ಸರಳಜೀವನ ವಾಹಿನಿ ಮೂರನೇ ವರ್ಷಕ್ಕೆ ದಾಪುಗಾಲಿಡುತ್ತಿದ್ದು, ಮಾಹಿತಿ, ಮನರಂಜನೆ ಜೊತೆಗೆ ದಿನದಲ್ಲಿ ನಾಲ್ಕು ಸಲ ವಾರ್ತಾ ಸಂಚಿಕೆಗಳು ಪ್ರಸಾರಗೊಳ್ಳಲಿವೆ.

ಮಾಹಿತಿ ಹಾಗೂ ಮನರಂಜನಾ ಕ್ಷೇತ್ರದಲ್ಲಿ ಸರಳಜೀವನ ವಾಹಿನಿ ಮೆಚ್ಚುಗೆ ಪಡೆದಿದ್ದು, ಭಾರತೀಯ ಪುರಾಣ, ಇತಿಹಾಸ, ಪ್ರವಾಸ ಕಥನ, ಭಾರತೀಯ ಸಂಸ್ಕೃತಿ ಮತ್ತು ಪರಂಪರೆ ಆಧರಿಸಿದ ವಿಚಾರಪೂರ್ಣ ಕಾರ್ಯಕ್ರಮಗಳನ್ನು ಈಗಾಗಲೇ ವಾಹಿನಿ ಪ್ರಸಾರ ಮಾಡುತ್ತಿದೆ. ಇದರೊಂದಿಗೆ ಸಮಾಚಾರ ಸೌರಭ, ಮಧ್ಯಂತರ ವರದಿ, ನಮ್ಮೂರು ಸುದ್ದಿ ಕೂಡ ಸೇರ್ಪಡೆಯಾಗಿದೆ.

ಸರಳ ಸುದ್ದಿ ಸಂಚಿಕೆಗಳಲ್ಲಿ “ಸಮಾಚಾರ ಸೌರಭ’ ವಿಭಾಗವೂ ಇದೆ. ಇದರಲ್ಲಿ ಅಂದಿನ ಸುದ್ದಿಗಳು ಹಾಗೂ ಹಿಂದಿನ ದಿನದ ಸುದ್ದಿ ಮುಖ್ಯಾಂಶ ಬಿತ್ತರವಾಗಲಿದೆ. ಸಮಾಚಾರ ಸೌರಭದಲ್ಲಿ  ಮುಂಜಾನೆ 8 ಕ್ಕೆ ಸುದ್ದಿ ಸಂಚಿಕೆ ಬಿತ್ತರಗೊಳ್ಳಲಿದೆ. ಮಧ್ಯಂತರ ವರದಿಯಲ್ಲಿ ಪ್ರತಿದಿನ ಮಧ್ಯಾಹ್ನ 1ಕ್ಕೆ ವಾರ್ತಾ ಪ್ರಸಾರವಾಗಲಿದ್ದು, ಈ ವಾರ್ತಾ ಸಂಚಿಕೆಯಲ್ಲಿ ಮಧ್ಯಾಹ್ನದವರೆಗಿನ ರಾಜ್ಯದ ಪ್ರಮುಖ ಸುದ್ದಿಗಳ ಸಮಗ್ರ ಚಿತ್ರಣ ನಿಮಗೆ ಸಿಗಲಿದೆ.

ನಮ್ಮೂರು ಸುದ್ದಿಯಲ್ಲಿ ಸಂಪೂರ್ಣ ಗ್ರಾಮೀಣ ಸುದ್ದಿಯ ಹೂರಣ ಇರಲಿದೆ. ರಾಜ್ಯದ 30 ಜಿಲ್ಲೆಗಳ ಸಂಪೂರ್ಣ ಸುದ್ದಿ ಚಿತ್ರಣವನ್ನು ನಮ್ಮೂರು ಸುದ್ದಿಯಲ್ಲಿ ಕಾಣಬಹುದು  ಇನ್ನು, ಸ್ಥಳೀಯ ಸುದ್ದಿಗಳಿಗಾಗಿಯೇ ಮೀಸಲಾಗಿರುವ ಈ ವಾರ್ತಾ ಸಂಚಿಕೆ ಪ್ರತಿದಿನ ಸಂಜೆ 7.30ಕ್ಕೆ ಪ್ರಸಾರವಾಗಲಿದೆ.