ಶಾರದಾ ಚಿಟ್‌ ಫ‌ಂಡ್‌ ಹಗರಣ: ಸಿಬಿಐ ಎದುರು ಹಾಜರಾದ ಐಪಿಎಸ್‌ ಘೋಷ್‌

ಕೋಲ್ಕತ : ಬಹುಕೋಟಿ ಶಾರದಾ ಚಿಟ್‌ ಫ‌ಂಡ್‌ ಹಗರಣಕ್ಕೆ ಸಂಬಂಧಿಸಿ ಸಮನ್ಸ್‌ ಪಡೆದಿರುವ ಐಪಿಎಸ್‌ ಅಧಿಕಾರಿ ಅರ್ನಾಬ್‌ ಘೋಷ್‌ ಅವರಿಂದು ಸಾಲ್ಟ್ ಲೇಕ್‌ ನಲ್ಲಿರುವ ಸಿಬಿಐ ಕಚೇರಿಗೆ ಹಾಜರಾದರು.

ಘೋಷ್‌ ಅವರು, 2014ರಲ್ಲಿ ಸುಪ್ರೀಂ ಕೋರ್ಟ್‌ ಶಾರದಾ ಚಿಟ್‌ ಫ‌ಂಡ್‌ ಹಗರಣದ ತನಿಖೆ ನಡೆಸುವಂತೆ ಸಿಬಿಐಗೆ ಆದೇಶಿಸುವ ಮುನ್ನ ಈ ಹಗರಣದ ತನಿಖೆ ನಡೆಸುತ್ತಿದ್ದ, ಪಶ್ಚಿಮ ಬಂಗಾಲ ಸರಕಾರದಿಂದ ನೇಮಿಸಲ್ಪಟ್ಟಿದ್ದ, ವಿಶೇಷ ತನಿಖಾ ತಂಡದ (ಎಸ್‌ಐಟಿ) ಓರ್ವ ಸದಸ್ಯರಾಗಿದ್ದರು.

ಎಸ್‌ಐಟಿ ತಂಡದ ನೇತೃತ್ವ ವಹಿಸಿದ್ದ ಮಾಜಿ ಕೋಲ್ಕತ ಪೊಲೀಸ್‌ ಕಮಿಷನರ್‌ ರಾಜೀವ್‌ ಕುಮಾರ್‌ ಅವರಿಗೂ ಸಿಬಿಐ ಇದೇ ರೀತಿಯ ಸಮನ್ಸ್‌ ಕಳುಹಿಸಿದೆ. ಆದರೆ ಅವರಿನ್ನೂ ಅದಕ್ಕೆ ಸ್ಪಂದಿಸಿಲ್ಲ.

ಘೋಷ್‌ ಅವರ ಸಹಾಯಕರಾಗಿದ್ದ ಇನ್ನೋರ್ವ ಎಸ್‌ಐಟಿ ಅಧಿಕಾರಿ ಪ್ರಭಾಕರ ನಾಥ್‌ ಅವರನ್ನು ಕಳೆದ ಮಂಗಳವಾರ ಸಿಬಿಐ ತಾಸುಗಟ್ಟಲೆ ಪ್ರಶ್ನಿಸಿರುವುದಾಗಿ ವರದಿಗಳು ತಿಳಿಸಿವೆ.